zero media family planning adv

‘वल वल विद्युत महसुलनिसे. स्कूल शुल्कतकया ब्यागलं ब्यागलं राहत प्याकेज’ : नेपाल सरकार

नेवा: अनलाइन न्युज – ललेन्द्र शाक्य | २०७६ चैत्र १७, सोमबार १५:०७:०३

नेपाल सरकारं कोरोना भाइरस कोभिड १९ संक्रमणपाखें लिच्वः लाःपिन्त राहत प्याकेज घोषणा याःगु दु । मन्त्रिपरिषदया आइतवाः च्वंगु बैठकं नीजि स्कूलया शुल्कनिसें विद्युत महसुल छ्यापं (छूट)तकया राहत प्याकेज हःगु खः ।

सरकारया थ्व निर्णयलिसें मासिक १५० युनिटतक विद्युत उपभोग याइपिं ग्राहकपिन्सं विद्युत महसुलय् २५ प्रतिशततक छूट कायेखनीगु जूगु दु । विद्युत, खानेपानी, टेलिफोन शुल्क फाल्गुन व चैत्र महिनाया महसुल भुक्तानी बैशाख मसान्ततक पूसा विलम्ब भुक्तानी वा जरिवाना लगेजुइमखु ।

दूरसंचार कम्पनीं लकडाउन इलय् इन्टरनेट व डाटा प्याकेज छ्यलीपिन्त २५ प्रतिशत छ्यापं बिइजूगु जूगु दुसा नीजि सेवा प्रदायकिपिन्सं नं थुज्वःगु छूट बिइमालीगु जूगु दु ।

अथेहे, खाद्य व्यवस्था व व्यापार कम्पनी व साल्ट ट्रेडिङ्गं जाकि, चुं, केँ, चिकं व चीन लिसेंया खाद्य वस्तुया खरिदय् आःया मूल्यस १० प्रतिशत छ्यापं बिइगु जूगु दु । अथेहे, सवारीचालकया लाइसेन्स, रुट परमिट लिसेंया नवीकरण याइगु इलय् नं बैशाख मसान्ततक थप याःगु दु । थ्व इलय् छुं नं बिलम्ब शुल्क मकायेगु सरकारं जानकारी ब्यूगु दु ।

माध्यमिक तहतकया नीजि स्कूलतसें नं लच्छिया शुल्कय् आवासबाहेक मेगु छ्यापं बिइमाःगु न्ह्यथंगु दु । शहरी क्षेत्रया असंगठित श्रमिकपिनिगु लच्छिया छेँबालं छूट बिइत घरबेटीपिन्त सरकारं औपचारिक रुपं हे आग्रह याःगु दु । थथे याःसा सरकारं घरबेटीपिन्त लच्छिया छेँबालं कर छूट बिइगु सरकारं जानकारी ब्यूगु दु ।

अथेहे, पूर्णरुपं बन्द जूगु पर्यटन क्षेत्रलिसे सम्बन्धित प्रतिष्ठानतसें न्हिथं वा मासिक ज्यालादारीइ ज्या याइपिं श्रमिकपिन्त चैत्र महिनाया मुक्कं तलब बिइमालीगु जूगु दु । व्यवसाय संचालन मजुतले तकया नितिं रोजगारदातापिन्सं श्रमिकपिन्त ज्याला भुक्तानी यायेत प्रतिष्ठान स्तरया कल्याणकार िकोषया रकम उपयोग यायेफइसा सामाजिक सुरक्षा कोषय् मुंकेमाःगु रकम धाःसा सरकारं ब्यहोरे याइगु जूगु दु ।

सरकारी, नीजि स्वास्थ्य संस्थातसें स्वास्थ्य उपकरणत आयात याइबलय् भन्सार छूट कायेखनीगु जूगु दु । सरकारं टीटीया सीमायात ३० हजारपाखें अप्वयेकाः १ लख डलर थ्यंकूगु दु । अथेहे, नीजि स्वास्थ्य संस्थातय्गु चैत्र महिनाया सेवा शुल्कय् २० प्रतिशततक छूट बिइगु सरकारं घोषणा याःगु राहत प्याकेजय् न्ह्यथनातःगु दु ।

व्यवसायीपिन्सं मूल्य अभिवृद्धि व आयकर पुलेगु ई २०७७ बैशाखतक थप याःगु दु । अथेहे, सरकारया कोरोना उपचार कोषय् योगदान याःगु रकम कर योग्य आयलय् क्वपालेगु कथं निर्णय जूगु दु । वैदेशिक रोजगारीया नितिं श्रम स्वीकृति कयाः विदेश वनेमख.पिं वा लिहाँ वmपिन्त स्थानीय तहपाखें रोजगार केन्द्रय दर्ता याकेगु व प्रधानमन्त्री रोजगार कार्यक्रमय् परिचालित यायेगु निर्णय नं सरकारं याःगु दु ।

अथेहे, सरकारं आयातय् छुं रोक नं तःगु दु ।

५० हजार डलर (६० लख)सिबें अप्वःया सवारीसाधन आयातय् रोक तःगु दु । थ्वहे झ्वलय् अयलाः, मरिच, ग्वय्, केगू, छ्वःरा आयातय् नं रोक तःगु दुसा न्हिथं लुँ पैठारीयात २० पाखें १० किलोय् क्वकाःगु दु ।

अथेहे, लकडाउनसिबें न्ह्यः याःगु फुक्क खरिद सम्झौताया म्याद लच्छि थप यायेगु निर्णय याःगु दु । चैत्र महिनाय् बैंक ग्यारिन्टीया ई क्वचाइगु जूसा विना दस्तुर लकडाउन चालीगु लच्छितक कायम यायेगु प्याकेजय् न्ह्यथनातःगु दु ।

मन्त्रिपरिषद बैठकं कोभिड १९ संक्रमण व रोकथामय् खटेजुइपिं स्वास्थ्यकःमि व सुरक्षाकःमिपिन्त असार मसान्तकतया नितिं २५ लखया बीमा यानाबिइगु निर्णय याःगु अर्थ व संचार लिसें सूचना प्रविधिमन्त्री डा. युवराज खतिवडां जानकारी ब्यूगु दु ।

Categorized in राजनीति