२०७२ आषाढ ४, शुक्रबार १६:०८:३३

फिल्म पिदने न्ह्यः उकिया ट्रेलर दयेकेगु चलन ला चले हे जुयच्वंगु चलन खः । आः वयाः सफू पिदने न्ह्यः उकिया ट्रेलर दयेकेगु चलन नं शुरु जूगु दु । छुं नं न्हूगु सफू पिदने न्ह्यः उकियात कयाः चर्चा यायेगु वा पिदनेत्यंगु सफूया सारांश पिकायेगु नं चलन दु । तर आः वयाः न्हूगु सफू पिकायेगु झ्वलय् सफूया दुने कनातःगु खँयात भिजुअल दयेकाः ट्रेलर पिकायेगु चलन चले जुया वःगु दु ।

भारतय् थौंकन्हय् थथे सफूया ट्रेलर दयेकेगु चलन न्हियान्हिथं अप्वया वयाच्वंगु दु । छुं नं सफू पिदने न्हयः सफूया बाखंयात ड्रामाटाइज यानाः ट्रेलर दयेकाः क्यनेबलय् उकिं ब्वमि दथुइ सफूप्रति छगू पोजिटिभ च्यूताः ब्वलनीगु खँ भारतया नांजाःम्ह च्वमि अमिश त्रिपाठीं भारतीय मिडियायात ब्यूगु खँल्हाबल्हाकथं सीदु । अमिश त्रिपाठीया ‘इमोर्टल्स अफ मेलुहा’ सफुतिं न्ह्याःगु खःसा आः वय्कःया मेगु सफू ‘सियोन अफ इक्ष्वाकु’या नं ट्रेल पिहाँ वयेत्यंगु दु । थथे ट्रेलर दये्कीबलय् काल्पनिक पात्रकथं कलाकारतय्त अभिनय याकेगु वा एनिमेशनया लिधंसा कायेगु चलन दु । भारतया छगू तसकं लोकंह्वाःगु सफू ‘द कृष्णा’या च्वमि अश्विनी गान्धीं बीबीसीलिसे याःगु खँल्हाबल्हाय् नं थःगु न्हापांगु सफू “रोजबल”या नं ट्रेलर दयेकाः पितब्यूगु खनेदुसा आः पिहाँ वयेत्यंगु ‘चाणक्यज चाय्ट’या भिजुअल ट्रेलर पिदनेत्यंगु दु । थथे पिदनीगु ट्रेलर यूट्यूबलगायत मेमेगु माध्यमय् नं तयः सफूया प्रचार यायेगु चलनं सफूप्रति ब्वमिपिनिगु च्यूताः न्हियान्हिथं अप्वय्का ब्यूगु दु धकाः हार्पर कोलिन्स पब्लिकेशन्सया अमृता तलवारं बीबीसीलिसे याःगु खँल्हाबल्हाय् कनादीगु खः ।