2565 buddha Jayanti ADV

लुयाच्वनी सदां नुगः नुगलय्... स्वयम्भूराज शाक्य (लुमन्ति च्वसु)

नेवा: अनलाइन न्युज | २०७८ जेठ १४, शुक्रबार १९:५६:४४

सुरजवीर बज्राचार्य 

कडाउन जुइ छुं दिं न्ह्यः वरिष्ठ संगीतकःमि स्वयम्भूराज शाक्य नाप लाःगु खः । वयकःनाप छुं वाः न्ह्यःनिसें छगू न्हूगु ज्याझ्वः ग्वसाःया विषय सलहल ब्याकेगु खँ जुयाच्वंगु खः । उगु हे खँयात ज्याकथं न्ह्याकेत वडाया ग्वाहालिया नितिं इनाप यायेत थःगु वडाया नायः नापलानाः वयकःया साथ दइगु जुल । आः ज्या न्ह्याकेमाल धायेत वयकः थ्यंकादीगु खः जिगु ज्याकुथिइ । निम्हसिया दथुइ सहलह ब्यात । ज्याझ्वःया प्रस्तावना तयार याये अले हानं छकः झी च्वनाः सहलह ब्याकेगु निष्कर्षनाप बायापिं सदांया नितिं बाय् थें जुल । झी सकसित ख्वय्काः इलं वरिष्ठ म्येहालामि झी सकसिया यःम्ह कलाकार स्वयम्भूराज शाक्ययात चफ्फुना यन । 

५ गू दशकया सांगीतिक जीवनया प्रभाव धइगु आपालं संगीत ख्यलय् मन क्वसाःपिनिगु नितिं छम्ह आदर्श ब्यक्तित्व खः वय्कः । नुगलं सदां हनातयाम्ह ब्यक्तित्वया छगू ज्याझ्वः वरिष्ठ म्येहालामि स्वयम्भूराज शाक्यया सांगीतिक सनिलया ग्वसाःया झ्वलय् ज्याझ्वः न्ह्याकामिया भाला चूलाःगु खः जेष्ठ नागरिकपिनिगु नितिं समर्पित मुदिता सेवा गृहया ग्वाहालिया नितिं जूगु खः ज्याझ्वः ‘आरोह सन्ध्या’ । याकः इन्टरप्राइजेज्या ग्वसालय् जूगु ज्याझ्वः झःझः धाःगु जक मखःसे समाजय् ग्वाहालिया भावया संचार यानाः थुकिया नितिं सकसित प्रेरित यायेमा धइगु मनसुवा नं खना, व नं थःगु कर्म, सृजना न्यंका ग्वाहालिया नितिं आव्हान यायेगु व समर्पत नं छगू दसू खः । गुलि ब्यक्तित्व जहां थी उलि हे सरल, प्रष्ट विचार व उगु विचार प्रभावं जाय्क कनादीगु पहः, सकसित थः नालाः यानादीगु ब्यवहार स्वयम्भूराज शाक्यया धात्थेंगु ब्यक्तित्व खः । 

मेमेगु आपालं ज्याझ्वलय् ज्याझ्वः न्ह्याकामिकथं वय्कः स्वयम्भूराज शाक्यया नितिं आपालं उद्घोष यायेनंगु लुमन्ति नं सदां लुइ थ्व नुगलय् । उकी जीवनया अतिकं मूवंगु अनुभव दु । मंगल इन्टरटेन्टमेन्टया ग्वसालय् जुजु वेयर्स “ओ प्रिय लिफः स्वयाः, एकल सांगीतिक सनिल”या ग्वसालय् ज्याझ्वः न्ह्याकामि जक मखःसें ज्याझ्वः डिजाइन, संयोजकथं उगु ज्याझ्वः झःझः धायेकेगु नितिं मेहेनत यायेखंगु व अनुभव नं वयकः स्वयम्भूराज शाक्यया दोहलपा खः जिगु नितिं । थुगु ज्याझ्वलय् स्वकुमिपिन्सं थः यःम्ह कलाकारया म्ये प्रत्यक्ष न्यनेखंगुया लसता लुमंकी । तर मेमेगु आपालं खँ दसूकथं थुगु ज्याझ्वःनाप स्वानावइ । 

दकले न्हापां ला ज्याझ्वः निःशुल्क । धेबा पुलेमा ज्याझ्वः स्वयेत । “जितः न्यनादीपिं स्वयादीपिनिगु नितिं खः थुगु ज्याझ्वः उकिं थुगु ज्याझ्वः जिगु दोहलपा खः जितः माया यानादीपिनिगु नितिं” वयकःया बिचाः व ग्वसाः । अले थुगु ज्याझ्वः वयकःया जन्म त्वालय् जुल । त्वालय् च्वंपिं दाजुकिजापिन्त स्वयम्भूराज शाक्य जिगु त्वाःयाम्ह धायेबलय् गौरव ताः । थुकथं गौरव तायेकीपिनिगु नितिं उगु हे त्वालय् तःजिगु दबू दयेका झःझः धायेक आपालं पाहाँपिं मुंकाः म्ये न्यनेगु, न्यंकेगु जक मखु, उगु ज्याझ्वः ब्यवस्थापनया नितिं मेहेनत नं यायेखंगु त्वाःबासीपिन्सं शायद गुबलें ल्वमंकी मखु जुइ । 

ज्याझ्वलय् थःगु म्ये न्यंकेगु जक मखु । थःगु जीवनय् प्रभाव तयादीपिं, तिबः बियादीपिं, हःपा बियादीपिं कलाकारपिनिगु म्ये नं वय्कलं न्ह्यब्वयादिल । प्रेमध्वज प्रधानया ‘नमान लाज यस्तरी’ व नारायण गोपालया ‘जीवनय् गुबलें छकःसां प्रेम जिं यायेनंगु दु’ । “जिगु सांगीतिक जीवन निरन्तर यायेत सांस्कृतिक संस्थानय् जागीर नयाच्वनाबलय् नारायण गोपालं बियादीगु हःपा जिगु प्रत्येक पलाःया नितिं शक्ति जूगु दु ।” वयकलं थःगु नुगलय् लुयाच्वंगु समर्पण थुकथं न्ह्यब्वयादिल । 

उलि जक मखु थःगु एकल सांगीतिक ज्याझ्वलय् थःगु त्वाःया न्हूगु पुस्ताया म्येहालामिपिं अनु शाक्य व प्रियंका शाक्ययात नं थाय् बियादिल म्ये न्यंकेत दबू बियादिल । “न्हूगु पुस्तायात नं नापनापं यंकेमाः” वय्कःया मेगु बिचाः नं थुगु ज्याझ्वलय् लूगु खः । 

२०१३ साल मंसीर महिनाय् अबु बुद्धिराज शाक्य व नानीबेटी शाक्यया कोखं जन्म जुयादीम्ह वरिष्ठ म्येहालामि स्वयम्भूराज शाक्यपाखें मेगु निगू नं एकल सांगीतिक ज्याझ्वः यानादीगु खः । २०६१ सालय् पद्मावती वचत तथा ऋण सहकारी संस्था लिमिटेड नःबहाःया ग्वसालय् अले छगू ज्याझ्वः नारायण गोपालया देछाःसें ‘नारायण गोपालको सम्झनामा......” यानादीगु खः । थुगु ज्याझ्वः बागमती सफाई अभियानं ग्वसाः ग्वःगु खः । 

“कलाकारपिन्त मालीबलय् ग्वाहालि यायेगु क्षमता कलाकारपिंके हे दयेमा, थजाःगु अवस्थाय् कलाकारपिनिगु हे छगू धिसिधाःगु संगठन झीसं दयेकेमाः ।” सदां न्यनावयागु वय्कःया मनसुवाः खः थ्व । सकसिगु च्यूता कयादीम्ह वरिष्ठ संगीतकःमि स्वयम्भूराज शाक्य कोरोना संक्रमणया हुनिं मन्त । वैशाख २६ गते अस्पताल भर्ना जुयादीम्ह वय्कः २०७८ जेठ ११ गते मन्त धइगु खबरं च्यानाच्वंगु मत फसं पुइकू थें संसार ख्युंयाबिल । 

तर 

कलाकार गुबलें बिनावनी मखु । 

व स्वां गुबलें गनावनीमखु । 

सदां त्वयाच्वनी

निभाः थें झलमल्ल....

स्वयम्भूराज शाक्य ।

( च्वमिं नेवाः राट्रिय दबूया नायः खः–स.)

Categorized in बिचा: