नेवा: अनलाइन न्युज – ललेन्द्र शाक्य | २०७७ जेठ ३, शनिबार ०९:५५:४९

यूट्युबय् दकले अप्वः स्वःगु कोरोना भाइरस सम्बन्धी हलंज्वलंया भिडियोमध्ये छगू चौथाइ भिडियोया हलंज्वलंत गलत व भ्रामक जूगु छगू अध्ययनं क्यंगु दु ।

अध्ययन कथं, उज्वःगु गलत व भ्रामक भिडियोत समग्रय् ६ करोड २० लखसिबें अप्वः स्वःगु दु ।

यूट्युबय् अपलोड यानातःगु गुलिखे उज्वःगु भ्रामक भिडियोय् वासः उत्पादन कम्पनीतसें कोरोना भाइरसया खोप दयेकेधुंकूगु तर बिक्री वितरणया नितिं अस्वीकार यानाच्वंगु दाबी यानातःगु दु ।

सरकारी संयन्त्र व स्वास्थ्य विज्ञपिन्सं कोरोना भाइरस सम्बन्धी सही सुचं दुथ्याःगु व गुणस्तरीय भिडियो हलंज्वलं अपलोड यानाच्वंगु धासें यूट्युबं भ्लगर्स व यूट्युब स्टार्सपिन्सं धाःसा कोरोना भाइरस सम्बन्धी सही सुचं प्रवाह यायेगु नितिं खास हे भूमिका म्हितेमफूगु जानकारी ब्यूगु दु ।

बीएमजे ग्लोबल हेल्थ जर्नलय् पिथंगु उगु अध्ययन कथं मनोरञ्जन सम्बन्धी समाचार प्रवाह याइगु समाचार माध्यमत यूट्युबय् कोरोना भाइरस सम्बन्धी गलत सुचं प्रवाह यायेगु ज्याय् दकले न्ह्यःने दु । 

अथेहे, राष्ट्रिय पत्रिकात व इन्टरनेट समाचार साइटतपाखें तकं यूट्युबय् गलत व भ्रामक जानकारीत प्रवाह जुइगु जुयाच्वंगु लुइकूगु दु । थ्वहे झ्वलय् १८ प्रतिशत भ्रामक भिडियोत थीथी यूट्युबर्सपिन्सं अपलोड याःगु दु ।

उखे, यूट्युबं धाःसा थःगु प्लाटफर्मपाखें गलत व भ्रामक सुचंत ब्वलंके मबिइगु नितिं प्रतिबद्ध जूगु व कडाईया रुपं पलाः न्ह्याकाच्वनागु धयाः वयाच्वंगु दु । 

कोरोना भाइरसविरुद्ध गलत तथ्य दुथ्याःगु भिडियोयात बन्देज तयेगु नीति यूट्युबया दूगु धासें कम्पनीं नीति उल्लंघन उज्वःगु भिडियोयात तत्काल हे डिलेट यायेगु जानकारी ब्यूगु दु ।

एजेन्सी

Categorized in अन्तर्राष्ट्रिय