–नारद बज्राचार्य

– जि विकल ।

ल्हाः मिले यायेत थःगु जवल्हाः न्ह्यःने ब्वब्बं वं थःगु परिचय बिल ।

– तर, जिं ला छितः म्हसिके मफुत...

थःगु न्ह्यःने जव ल्हाः न्ह्यब्वयाः ल्हाः मिले यायेत वःम्ह मनूयात वं लिसः बिल । गुम्ह मनू मिखा निगः जक त्वालां खनेदयेक न्हाय् म्हुतु रुमालं भुनाच्वंगु दु ।

– क ! नकतिनि हे छिं बाखं च्वयेत मत्तिइ तःम्ह पात्र जि । जि विकल ।

– विकल !
अजू चाल लेखक । बाखं छपु च्वयेगु मतिइ तःगु नं खः लेखकं । प्लट छगू लुइकाः उके मन ब्वाकूगु नं खः लेखकं । तर, थन ला स्वयं पात्र हे उत्पति जुइधुंकल । पात्रं थः थम्हं थःगु नां तयेधुंकल । अले, लेखक पात्रय् दुबिनाच्वंगु मखु । बरु, पात्र थःहे लेखकयात नापलाः वयाच्वन ।

छगू अजूचायापुगु संजोग । च्यागूगु आश्चर्य ।

– जिं ला थथे न्हाय्, म्हुतु त्वपुयातःम्ह पात्रया कल्पना हे यानागु मदु ।

लेखकं पत्याः याये फयाच्वंगु मदु । थःगु न्ह्यःने दनाच्वंम्ह हत्ताकत्ताम्ह जवानम्ह मनू, गुम्हेसिया ख्वाः रुमालं त्वपुयातःगुलिं बांलाक सीमदु । व मनू थःहे पात्र खः धकाः ।

– स्यू जिं । थ्व जिं थनया हे लकसयात बिचाः यानाः तयावइगु खः ।

वाह ! पात्रं थःथम्हं बिचाः यानाः, मनंतुनाः ज्या यात कि लेखकं मनंतुं थें, बिचाः याः थें बाखं गथे सिर्जना जुइ ।

लेखक धयापिं न्ह्याबलें छगू नं छगू प्लटय् दुबिना हे च्वनी छाय्धाःसा समाजया चीधंगुया चीधंगु घटना नं अमिगु नायूगु नुगःयात प्रभावित याना हे च्वंगु दइ । थ्व खँ स्यूम्ह, थ्व गुम्हं बहुरुपि जुइमाः । थन छुं षड्यन्त्र सुलाच्वंगु दयेमाः । उकें थ्व लिसे च्वनाः भिं जुइमखु ।

थुलि खँ मनय् लुइवं लेखक व मनू खनाः तसकं हे ग्यात । थ्व मनूपाखें तापायेगु हे भिं जुइगु भाःपिल । अले फहिलाः बेतोडं बिस्युं वनेत पलाः छु ल्ह्वन –

– जि निलिमा ।
थःलिसे ल्हाः मिले यायेत छम्ह मय्जुया ल्हाः न्ह्याः वल । लेखक तक्क दित । थःगु न्ह्यःने दनाच्वंम्ह । हिसिं भय्ब्यूम्ह । म्हधिकः नं माक्व दुम्ह । तसकं बांलाःम्ह । स्वःलिसे स्वये मगाःम्ह । छम्ह जवानम्ह मिसा । स्वस्वं हे लेखक थः हे लट्टु जुल । लेखकया दुनुगः मुसुकाल । वास्तवय् वं न्हापांनिसें मालाच्वंम्ह मिसा – थुजाःम्ह हे खः ।

– जिं ला छितः म्हसिके मफुत । थ्व सिबय् न्ह्यः गनं खना थें मच्वं नि ।

– मखन खइ । तर म्ह हे मस्यूम्ह ला खइमखु । छिगु नुगलय् गुलि इरुथिरु जुइधुंम्ह खः जि । नकतिनि छिं बाखं च्वयेत ग्वसाः ग्वःगु प्लटया मिसापात्र जि । जि निलिमा ।

आः धाःसा लेखकयात पक्का विश्वास जुल । व गुगुं मायावी षड्यन्त्रय् फसे जुइत्यंगु दु । वया खैरियत मदु ।

नकतिनि हे लेखक, छगू न्हूगु संघय् दुजः जुइगु बारे सहलह यानावःगु । थ्व खँ गुगुं मेगु संस्थां सीकाः वयात थःगु संस्थाय् सालाकायेत जालय् क्यंकेगु थ्व छगू ग्वसाः जुइफु । थ्व देश माफियामय जुयाच्वंगु इलय् – थन छु जुइ, छु मजुइ – सुनां छु धायेफु । थन सुनां सुयात छु याइ, छु मयाइ छुं हे धायेमफु । थन मजुइमाःगु न्ह्याग्गुं जुइफु । जुइमाःगु छुं हे मजुइफु ।

धौबजि वाल, लेखकया मनय् । लँय् दत्थुइ पनाः थ्व निम्ह पात्रं थःत गुखे यंकेत्यंगु खः, लेखकं छुं हे तिफ्याये मफुत ।

अन्तय्, थ्व अद्भूतपिं निम्ह पात्रपाखें बिस्युं वनाः बिस्युं वनेमफइगु खनेदयेवं, लेखक थः हे संयमित जुल ।

– छिकपिं छथासं हे झायापिं खः ला ?

– मखु । व उखें वःगु जि थुखें वइगु ।

– अर्थात्... छिकपिनि दत्थुइ छुं कथंया हे स्वापू मदु ?

– स्वापू... छिं मनय् तिनि बाखंया ग्वसाः ग्वःगु खः । वै बिया । छिं जिमिगु दत्थुइ छुं गुंकथंया स्वापू ला तयादीगु हे मदुनि...

खः । सत्य खः । लेखकं मनय् तिनि ग्वसाः ग्वःगु खः । मिसा मिजं । मात्र मिसा । मात्र मिजं । अथे खःसा... मतलब... अर्थात्... थुपिं धात्थें लेखकया हे पात्र खत ला । गुम्हं इच्छाधारी, षड्यन्त्रकारी, अपहरणकारी, लुटेरा आदि छुं मखुत ला ।

अहो ! अहो !! लेखकयाके दुनंनिसें हे छगू कथंया उत्तेजना फैले जुल । आः वं च्वइगु बाखं सजिव जुयाः पिदनीगु जुल । लेखकया लय्ताःया थाःगाः हे मन्त ।

आः लेखकं हे थुमित, थुमिगु स्वापूयात कयाः परिभाषित यानाबी मालीगु जुल । लेखकं ग्वसाः ग्वःकथं थुमिसं थःगु भूमिका म्हितीगु जुल ।

लेखकं मत्तिइ तल – आः थुमित मतिनामि दयेकाबी...

लेखक थःहे छम्ह असफल मतिनामि खः । तःकः तःकः हे वया मतिना क्वःदःगु दु । वया दुनुगलय् सुलाच्वंगु पूवंगु मतिनाया स्केचं आकार कायेत वालावाला सनाहल । लेखकं थम्हं पूवंकेमखंगु मतिना थुमिपाखें पूवंकेगु ग्वसाः ग्वल ।

थुमित पक्कापिं मतिनामि दयेकाबी । विरह व वेदनां मतिनायात क्वातुकेबी । पीडा व छटपतिं पलख हे बायेमफइगु स्थिति लाकाबी । अले छन्हु मतिनाय् दुबिब्युं दुबिब्युं थःत हे ल्वःमंकाः हनुमानध्वाखाया छगः देगलय् च्वंच्वनीबलय् बाखंया क्लाइमेक्स सज्र्यान्त न्हिनय् मतिनाया मूति कायेके बी...

अथेमखु, अथेमखु – लेखकया मन हिल – ख्वालय् रुमालं त्वपुयातःगु हे दु । उकिं उमित सुनां म्हसिके फइ हे मखु । अथे ला खंसां छुं पाइगु ला ख हे मखु छाय्धाःसा थुपिं ला मात्र पात्र हे मखा । बरु थुमिगु ल्हातिइ अत्याधुनिक बन्दूक छपु छपु ज्वंकेमाली । अले देया छगू तःधंगु बैंकय् लुटे याके छ्वयेमाली । थौंकन्हय् लेखकयात ध्यबाया तसकं हे सिसिककः जुयाच्वंगु दु । निम्ह मस्तय्त युएस छ्वयेया निंतिं च्वं च्वनागु छेँ मियाः, थः डेराय् च्वं वनेमालीगु अवस्था वयाच्वंगु दु । पात्रं सक्कलिगु नोट बोरां बोरां ज्वनावयेवं – वं व पात्रतय्त इरेजरं हुयाबी ।

बस् ।

लेखक पात्रयात कयाः बाखंया ग्वसाः ग्वग्वं, थःहे मूलपात्र जुयाः पिदनेगु तरखरय् लाःवन ।

तर, थ्व अद्भूतपिं पात्रत धाःसा लेखकयात अन हे त्वःताः थम्हं हे बाखं भोगे यायेत महानगरया दुने दुने दुहां वनेधुंकल ।

वँवं अपिं महानगरया नुगःचुइ थ्यन । छगू तःधंगु झलमल्लगु दुवातय् पलख दित । दन । प्यखरें स्वत । निम्हेसिया सहलह यात । अले, अन हे दुवातय् लिपा नापलायेगु क्वःछिनाः अपिं बाल ।

अर्थात्,

बाखंयात याकः याकः भोगे यायेत, आनन्द कायेत महानगरया दुने दुने दुहां वन ।
    ...

महानगर ! ख्युं ख्युं धयावःलिसे सूद्र्यःयात हे माथ यायेभनं थीथी रंगया मत झलमल्ल जुयावल ।

स्वाभाविक रुपं पात्रयात नं त्यानुल । नये पित्यात । झासु लनेत । पित्याः तंकेत – होटलपाखे मिखा ब्वल ।

वं होटेलय् मिखा छु ब्वल, झासँ झासँ धाधां हिसिचा हिसिचा दुपिं नानिचापिंसं ल्हाः ज्वनाः हे वैत छगू होटल दुने दुतयंकल ।

होटल सुनसान ।

पर्सनालिटीं भय्ब्यूम्ह । हत्ताकत्ताम्ह । जवानम्ह । व हे छम्ह जक ग्राहक ।

नानिचापिं वया हे जःखः हां भुने थें भुंवल ।

छम्हसें मिनु न्ह्यब्वः वल । छम्हसें गिलासय् लः तःवल । वं मिनु स्वस्वं । अमिके हे न्यँन्यं अनेतने नसाज्वलं अर्डर यात । सवाः काकां लुधंक नल । त्यंक प्वाः जायेकल ।

नानिपिं वया म्हय् म्हय् घिसिपिसि यानाः हे ख्याः याः वैच्वन । अमिसं म्हय् म्हय् सनाः ख्याः याःवःबलय् वया म्हय् दुने दुने थ्यंक कुचुकुचु मिनावल ।

जिमि नं नये पित्यात । जिमित नं नकि रे, वया न्यतालय् चुपा ननं नानिपिंसं वैत पिरे यात । वं अमित नं नसा अर्डर यानाबिल । नकल ।

छम्ह हत्ताकत्ताम्ह – लाहुरे मुर्गा । गनं अथें त्वःते ज्यू । पसल्या साहुं सुयात छु मिखा भाय् यात मस्यू । छम्ह नानिचां ल्हाः ज्वनाः, लुत्तुलुयाः हे होटलया तलय् कोथाय् ब्वनायंकल । वया कुमारत्व भंग यानाबिल ।

नये सिधल । त्यानु लन । न्ह्यइपुसे नं च्वन । वने ला माल । वनेत व मूलुखा पाखे सरासर पलाः छु न्ह्याकल – अरे ! छगू तःधंगु समस्यां कक्कु ज्वं वल ।

ध्यबा ।

ध्यबा ला दुगु ख हे मखुत । कोट फिनातःगु जूसा साहुं कोट त्वका काइगु जुइ । तर पात्रयाके कोट मदु । घडि न्ह्यानातःगु जूसा साहुं घडि त्वका काइगु जुइ । तर, पात्रयाके घडि मदु । मोबाइल ज्वना जूगु खःसा साहुं मोबाइल लाकाः काइगु जुइ । तर पात्रयाके मोबाइल नं मदु ।

साहुं म्हुतु वावां वैत भ्वसुक्क दाल । न्हाचः न्ह्यइपुक्क ख्याः याःवयाच्वंपिं नानिचापिंसं नं वैत चिचित्यात । साहुं वइगु सँ ज्वनाः सालाः होटेलया दुने यंकल । द्वंचिंक दयाच्वंगु चिप सिइकल । सब्बु चान्हय् पसः तिइ त्ययेकाः वया जन्हु फातय् यांकयाः लाकमं च्वानाः सतकय् थ्यंक हुतांचा नकल ।

थुखे ।

मय्जु पात्रयात नं व हे समस्या वल । त्यंक नयाः, याउँक झासु लनाः पिहां वयेत्यनं ध्यबां हे कक्कु ज्वं वल ।

वयाके नं ध्यबा ला दुगु ख हे मखुत । सिखः क्वखाना तःगु जूसा सिखः त्वयाबीगु जुइ । तर पात्रयाके सिखः मदु । अंगू न्ह्यानातःगु जूसा अंगु त्वयाबीगु जुइ । तर पात्रयाके अंगु मदु । मोबाइल ज्वनाजूगु खःसा मोबाइल त्वःता थकीगु जुइ । तर पात्रयाके मोबाइल नं मदु ।

ज्या याइपिं हाल । भचा भचा ब्वः नं बिल । हाःसः तायाः वःम्ह साहुं पलखं सकतां भाय् थुइकल । थ्व कन्या, सुदूरगामं नकतिनि वःम्ह खः । शहर स्वयेत वःम्ह, शहरय् उखेलाः थुखेलाः मदयाः तनाः थन लाःवःम्ह खः ।

– म्वाःल म्वाःल । पित्यनाः नःवःगु खः । ध्यबाया छुं खँ मदु । छिपिं हुँ ।

साहुं ज्या याइपिंत गन । पात्रयात ल्हाः ज्वनाः थःगु दुनेच्वंगु कोथाय् ब्वनायंकल ।

– साहुया थौंया चा रंगीन जुइगु जुल ।

छथ्वः अस्यःत न्हिल ।

साहुं पात्रयाके बांलाक हे अन्तर्वार्ता काल । अन्तर्वार्ता धुनेवं साहुं पात्रयात महानगरीय संस्कृति ब्वलनावःगु बाखंया मूति सवाः कायेके बिल । मिसा मिजं धयागु छु खः ? बांलाक ध्वाथुइका बिल ।

अले । कन्हय् कुन्हु पात्रं हे मसीक पात्रयात महानगरया छगू तसकं नांजाःगु डान्स रेष्टुरेन्टया मालिकयात निगू लाखं मियाबिल ।

पात्र ।

बाखनं पिहां वयाः धात्थेंगु जिन्दगीया अनुभव याःवःम्ह पात्र ।

जिन्दगीया थीथी सवाः कायेगुलिइ मस्त जुल ।

न्हापा ।

ममः छगू प्लेट । पीजा छकू । सूप छगू बाउल त्वंबलय् ध्यबा धयागु मसियाः ध्यबा मदयाः वाथावाथा कंम्ह पात्र ।

आः ।

आः वया ध्यबा धयागु छुं मखया बिल । न्हि न्हिं वयात ध्यबां स्वांवा गायाच्वन । अर्थात् पात्र शहरया नांजाःम्ह डान्सर जुल ।

देया सम्भ्रान्त वर्ग – कर्मचारी, वकिल, प्राध्यापक, लेखक, कलाकार, समीक्षक, विद्यार्थी, साहु, महाजन वया जःखः हां भुने थें भुनाच्वन । प्याखंपा काकां पात्र सुया सुया मुलय् फ्यतू वन– उमिसं थःत धन्य धन्य तायेकल ।

पात्रया कमाल हे थ्व कि, संगीतया तालय् फोहरां वःगु लखय् जब पचिनांगां जुयाः म्वःल्हुइ, हलय् च्वंपिं सकल मनूत म्ह छम्हं झूचायेक प्याइ ।

पात्र छकलं बिख्यात जुल ।

पात्रया न्ह्यःने मगधया अम्बपाली फिक्का जुल । पात्र महानगरया ल्याय्म्हतय् नुगःया धुकधुकी जुयाबिल । ल्याय्म्हतय् मोबाइल मोबाइलय् वया पोज पोजया किपा सेभ जुल ।

पात्रं प्याखंपा कयां च्वन । प्याखंपा काकां पात्रं महानगरीय संस्कृतियात बांलाक ध्वाथुइकल ।

अले, छन्हु दक्व ल्याय्म्हतय्त म्वाय्चुइकाः महानगरया तःमिम्ह साहुया पिनेयाम्ह कलाः जुयाः सुटुक्क वनाबिल ।

पात्रयात समाजं तसकं चलाख जुइ सयेकाबिल ।

चलाखम्ह पात्र साहुया शोकेसया ब्वसा जक जुयाच्वनीगु खँ हे मन्त । वं थःयात साहुया अफिसय् इन्भल्भ यायां यंकल । बुलुहुँ व्यापारिक लागाय् थःगु म्हसीका स्थापित यात ।

आः धयाच्वने म्वाःल । साहुया दक्व सक्व कारोबारया व हर्ताकर्ता जुल ।

बस् । थुथाय् पात्र भतिचा भावुक जुल । मां जुयाया अनुभव कायेत पात्र लालायित जुल ।

मां ।

वया मां सु खः पात्रं मस्यू । तर व मां जुइत हथाय् चाल ।

पात्रया मन छखे ब्वाँय् वनाच्वन । ईया फय् मेखे न्ह्याः वनाच्वन ।

छन्हु,

शहरं भचा तापाक्क याकःचा कारय् सयर यानाच्वंबलय्, आकाझाकां न्यागः खुगः मेमेगु कारं वयात घेरे याःवल । बाध्य जुयाः हे वं थःगु कार दिकेमाल । वं थःगु कार जक छु दिकल, मेमेगु कारय् च्वनावःपिं गुण्डातसें वयात झातापाता यानाः अपहरण यानायंकल ।

पात्रं जब मिखा चायेकल, महानगरं यक्व यक्व तापाक्कच्वंगु छगू कोठीइ थःत थसः पायाच्वंगु लुइकल ।

लिपा सिल पात्रं । थ्व फुक्क साहुया छेँय् च्वंम्ह कलाःया योजना कथं जूगु जुयाच्वन ।

अनं लिपा...

अनं लिपा...

लेखक वँय् थें जुल । वया निम्हं पात्र थपाय्धंगु महानगरय् तन ।

पुलिसयात खोलुवा पौ ब्यू वने, अःखतं वँय् धकाः ब्वः बियाहइ । पत्रपत्रिकाय् विज्ञापन ब्यू वने – वया खँ सुनां पत्याः याइ । सुनां छापे याइ ।

‘जिगु पात्र तन ।’ वं सुयाके हारगुहार फ्वनेगु ? लेखकं छुं हे मसिल । व थःथम्हं हीमी चाल । हीमी चाचां हे लेखक महानगरया हूल हूलय् दुहां वन ।

फिल्म हल हलय् स्वः जुल ।

अय्लाः पसः पसलय् दुस्वः जुल ।

रानीपुखू चाः हुल । पार्क–पार्कय् माः जुल ।

तर, गनं मलू ।

लेखकया नया तिलय् मग्यन । मिखां न्ह्यः बिसि वन । सुथंनिसें बहनी बाचा बाचा तक लेखक उखें थुखें तनाच्वंपिं पात्र माः जुयाच्वन ।

तर, पात्र गनं मलू । गनं मखं ।

थः धयापिं सुं मदुगु थ्व थासय् वया पात्र गन च्वन जुइ । छु नल जुइ । लेखकयात तसकं हे धन्दा जुल । थ्वहे पीरं लेखक बाम्ह जुल ।

छन्हु ।

तःन्हु लिपाया छन्हु ।

वहे दुवातय् । गन वया निम्ह पात्र बायावंगु खः । अन हे लेखक थ्यन । थनं गुखेपाखे स्वयाः वने धकाः बिचाः यानाच्वंबलय्, हुंकन – वया हे मिजंपात्र विकल ल्हातय् पेस्तोल ज्वनाः, तुतामं चुचुं छपा तुति लुत्तु लुयाः वइच्वंगु खन ।

लेखकया लय्ताःया थाःगाः मन्त । वया पात्र लुल । वया तंम्ह पात्र लुल । तर, पात्र धाःसा मेय् मिखा कनाः लेखकयात हे बन्दुकं कयेके कथं ताके यानाः वइच्वन ।

छु जूगु जुयाच्वन धाःसा...

तःन्हु लिपाया छन्हु । प्यखेरं हण्डर ननं व लँया सिथं सिथं हे वनाच्वंगु खः । अथे खःसां छगः बेतोडं ब्वाकाहःगु मिनिबसं वयात ठक्कर नकल ।

ख ला मिनिबसया ड्राइभरं उघ्रिंमय् ब्याक् यानाः वयात खत्तम यानाबीत्यंगु खः । वया भाग्य बल्लाःगुलिं धायेमाल, मिनिबसय् च्वंपिं मनूत – अय् अय् मनू दु, मनू दु धकाः हाःगुलिं वं अथे यायेमफुत ।

मनूत ला मुना हे च्वंपिं खत । झन्नेलि ब्याक् यानाः स्यायेत्यंगु धाधां मुनाच्वंपिं मनूतसें मिनिबसयात चुंचुं यानाबिल । ड्राइभरयात लट्ठाय् चित ।

व ला याकःचा खत । थः धयापिं सुं दुगु हे मखु । अथे खःसां, वया अन थः धयापिं यक्व दयावल ।

‘थ्व जिमिम्ह मनू । थ्व जिमिम्ह मनू’ धाधां देया विपक्षी पार्टीया मनूत वया पँ लित । संजोग गुज्वःगु जुयाबिल धाःसा – व मिनिबसया ड्राइभर सत्ताधारी पार्टीया कार्यकर्ता लानाच्वन ।

आः धयाच्वने हे म्वाःल । वया नामय् चक्काजाम जुल । क्षतिपूर्ति व वासःयात कयाः वार्ताटोली गठन जुल । व शहरया नांजाःगु हस्पिटलय् थसः पायाच्वन ।

प्यन्हु कुन्हु वार्ता क्वचाल ।

मिनिबस सेवा समितिं स्वंगू लाख पुलाबिल । वया थः धाःपिं गुपिं वार्ताय् च्वंपिं खः, मध्यस्थता याःपिं पुलिस, गुपिं खँ मिले याःपिं खः, सकलें मुसुकाल । थःथवय् दक्व ध्यबा इनाकाल ।

स्थिति शान्त जुल । बहनी उपिं व लिसे हे नये त्वने यानाः बिदाबाजि जुल ।

कन्हय् कुन्हुनिसें पात्र बेवारिसे जुल ।

पात्र बेवारिसे जुल धयागु सीवं – हस्पितलं नं वइत तुतां छपु ज्वंकाः पिने लुखाय् वायेहल ।

त्वःधुगु तुति लुत्तुलुयाः खुत्यां खुत्यां काकां हस्पितलं वइच्वंगु । थजाःगु शहरय् थःत पात्र दयेकाः थनेहःम्ह लेखकयात बाकि हे तयेमखु धकाः पाः फफंवःगु ।

उकिं वं तापालंलिसें लेखकयात खनेवं – वया छाति हे ह्वखनेत पेस्तोलया निशाना तःगु ।

लेखक वया पहचह खनाः ग्यात । थन च्वनाः भिं जुइमखु धकाः बेतोडं बिस्युं वनेत छु फहिल – उखें नं वया मिसा पात्र निलिमा झुलिझुलि नःलि नःलिगु वसतय् एड्सग्रस्त म्ह ज्वनाः वया छाति ह्वखनेत पेस्तोल धस्वाकाच्वन ।

लेखक ठिङ्ग दन ।

निपा ल्हाः थछ््वयाः आत्मसमर्पण यात । नुगः हे चुं चुं जुयाः धू जुइधुंकूपिं पात्रतसें वया आत्मसमर्पणयात वास्ता मयासे ट्रेगर तियाबिल ।

महानगरया व्यस्त दुवातय् लेखक विभत्स नक्सां चातुवात ।

निम्हं पात्र अलप जुल ।
    ...

निम्हं पात्रतसें थनया जीवनयात भोगे यानावन ।

आः थ्व पात्रतसें सिर्जना यानाथकूगु घटनां यानाः महानगर÷देशं छु रुप काइगु खः व स्वयेगु, भोगे यायेगु जिम्मा थनच्वंपिंत हे ।