नेवा: अनलाइन न्युज – ललेन्द्र शाक्य | ने.सं. ११४४ चिल्लागा दुतिया (२०८० चैत्र १४ गते) बुधवाः

सर्वोच्च अदालतं हतियारलिसें गिरफ्तारी लाःपिं दुर्गा प्रसाईंया बडीगार्डपिन्त तत्काल त्वःतेत आदेश ब्यूगु दु ।

सर्वोच्चया न्यायाधीशपिं नहकुल सुवेदी व सुनिलकुमार पोखरेलया इजलासं रामकुमार धिमाल व दीपक खड्कायात त्वःतेत आदेश ब्यूगु खः ।

इपिं छुं दिं न्ह्यः सर्वोच्च परिसरपाखें हतियारलिसें गिरफ्तारीइ लाःगु खः । उगु हतियार मेडिकल व्यवसायी प्रसाईं नं अनुमति कयाः तःगु खः । वि एण्ड सी मेडिकल कलेजया मुद्दाया सुनुवाइया झ्वलय् प्रसाईं लिसें सर्वोच्च थ्यंकूपिं बडीगार्डपिन्सं हतियार नं नापं यंकेधुंकाः नियन्त्रणय् काःगु खः ।

प्रसाईंया बडीगार्ड निम्हेसिगु छेँजःपिन्सं गैरकानूनी थुनाय् तःगु धासें सर्वोच्चय् बन्दीप्रत्यक्षीकरणया रिट दायर याःगु खः । वहे रिटय् सुनुवाई यासें सर्वोच्चं तत्काल त्वःतेगु नितिं धाःगु खः ।

आदेशय् धयातःगु दु, “हतियार इजाजत पौया शर्त कथं ज्वनाजूगु ज्यायात प्रचलित कानूनं कसुर कायम याःगु खनेमदूगु जुयाः उगु निवेदनयात मुलुकी अपराध संहिता, २०७४ या दफा १३२ या कसुरय् जरुरी पक्राउ पुर्जी जारी यानाः पक्राउ याःपिं व येँ जिल्ला अदालतपाखें अनुसन्धानया नितिं म्याद थप याःगु तकंया अनुसन्धान तहकिकातया ज्या कानून सम्मत मजूसे निवेदकया थुना गैरकानूनी खनेदत ।”

Categorized in दुर्घटना-अपराध