नेवा: अनलाइन न्युज – ललेन्द्र शाक्य | २०७९ जेठ ३, मंगलबार ११:५३:३०

तिब्बत मामला स्वइम्ह अमेरिकी अधिकारी उज्रा जिया थौं मंगलवाः सुथय् हे भारत थ्यंकूगु दु । भारत थ्यंकूम्ह जिया भ्रमण मानवअधिकार, लोकतान्त्रिक सुशासन व मानवीय विषयबारे सहलह यायेगु ट्वीटपाखें जानकारी बिइधुंकूगु दु ।

जियां ट्वीटरय् थःगु भ्रमणया एजेन्डाबारे च्वःगु खः । गुकी मानवअधिकारया विषय प्राथमिकताय् दु । नागरिक सुरक्षा, लोकतन्त्र व मानवअधिकार सम्बन्धी अमेरिकी अधिकारी जिया नेपाः नं वइगु तयारी जूगु दु । जिया भारतीय अधिकारीलिसे संवाद यायेधुंकाः नेपाः वइ ।

अमेरिकाया विदेश मन्त्रालयं प्रेस विज्ञप्तिइ भारत व नेपाःलिसे एयर अफ एक्सन फर द समिट फर डेमोक्रेसीइ सहलह यायेगु न्ह्यथंगु दु । जियालिसे युएसएडया एसिया स्वइम्ह सहायक प्रशासक अञ्जली कौर नं भ्रमण दलय् दु ।

अमेरिकां तिब्बतया विषययात प्राथमिकताय् तयेगु याःगु दु । वं दलाइ लामालिसे निकटता दयेकूगु दु । चीन धाःसा भारतया थुज्वःगु पलाःप्रति सतर्क जुइगु जुयाच्वंगु दु । नेपालय् तिब्बती शरणार्थीपिं दु । थुकिं यानाः नं तिब्बत मामला स्वइपिनिगु थ्वप्रति च्यूताः दु ।

जिया सन् २०२१ या डिसेम्बरय् तिब्बत मामला स्वइम्ह अमेरिकी विशेष संयोजक नियुक्त जूगु खः । व भारतीय मूलया अमेरिकी नागरिक खः ।

Categorized in अन्तर्राष्ट्रिय