नेवा: अनलाइन न्युज – ललेन्द्र शाक्य | २०७८ श्रावण १८, सोमबार ११:०६:२१

भारतीय सुरक्षाकःमि सीबीआईपाखें तुइनया खिपः चानाः ब्यूबलय् दार्चुलाया व्यास गाउँपालिका २ या जयसिंह धामी महाकाली खुसिइ कुतुंवनाः बेपत्ता जूगु घटनाबारे अनुसन्धान यायेत गृहमन्त्रालयं नीस्वंगु छानविन पुचः थौं सोमवाः दार्चुला वंगु दु ।

छानविन समितिया कजि लिसें गृहमन्त्रालयया सहसचिव जनार्दन गौतम नेतृत्वया पुचः थौं सोमवाः दार्चुला थ्यंकूगु खः । पुचः सोमवाः येँपाखें हवाईजहाजं कैलालीया धनगढी थ्यंकाः मंगलवाः धनगढीं हेलिकोप्टरपाखें दार्चुला थ्यंकेगु ज्याझ्वः तयातःगु दु ।

छानविन समितिया दुजःतकं जूम्ह दार्चुलाया सहायक प्रमुख जिल्ला अधिकारी ज्योत्सना भट्ट जोशीं धाःगु दु, ‘येँया पुचः थौं सोमवाः धनगढीइ च्वनाः कन्हय् मंगलवाः दार्चुला थ्यंकी, वधुंकाः छगू राउण्ड सहलह ब्याकाः ज्या न्ह्याकेगु जुइ ।’ सहायक प्रजिअ जोशीया कथं प्रत्यक्षदर्शीलिसे नं छानविन पुचलं नापलाइगु जूगु दु ।

भारतपाखेया लँपु जुयाः सदरमुकाम खलंगा वयेगु झ्वलय् तुइनं वनाच्वंम्ह ३३ दँया धामी तुइनया तारलिसें महाकाली खुसिइ कुतुंवनाः बेपत्ता जूगु खः । थ्व घटनाबारे सत्य तथ्य छानविन यानाः १० न्हुया दुने प्रतिवेदन पेस यायेत गृहमन्त्री बालकृष्ण खाँणं न्याम्ह दुजःया समिति नीस्वंगु खः ।

सहसचिव गौतमया संयोजकत्वय् नीस्वंगु छानविन समितिइ नेपाल प्रहरीया प्रहरी नायव महानिरीक्षक पुरुषोत्तम कँडेल, राष्ट्रिय अनुसन्धान विभागया अनुसन्धान निर्देशक हुतराज थापा, सशस्त्र प्रहरी बल नेपालया सशस्त्र प्रहरी बरिष्ठ उपरीक्षक सुरेशकुमार श्रेष्ठ व जिल्ला प्रशासन ज्याकुथि दार्चुलाया सहायक प्रमुख जिल्ला अधिकारी ज्योत्सना भट्ट जोशी दु ।

Categorized in दुर्घटना-अपराध