nepal investment baink

कातिप्याखं संरक्षण समितियात यल १६ वडापाखें ग्वाहालि

नेवा: अनलाइन न्युज – ललेन्द्र शाक्य | २०७७ मङ्सिर १४, आइतबार १५:०५:१३

यल महानगरपालिका १६ वडां कातिप्याखं संरक्षण समितियात दां ग्वाहालि याःगु दु । अक्षयकोष पलिस्थाया नितिं उगु वडां वंगु शुक्रवाः बहनी समितिया सम्बन्धित व्यक्तियात १० लख तकाया चेक लःल्हाःगु खः ।

उगु प्याखं संरक्षणया नितिं वंगु दँ अक्षयकोष पलिस्था यायेगु हल्ला जुइधुंकाः थुगु दँ वडाध्यक्ष निर्मलरत्न शाक्यं १० लख तकाया चेक लःल्हाःगु समितिया नायः किरण चित्रकारं धाःगु दु । चित्रकारं धाःगु दु, महानगरपालिकाया प्रमुख चिरिबाबु महर्जनं नं अक्षयकोष पलिस्था यायेत ५० लख तका ग्वाहालि यायेगु घोषणा यायेधुंकूगु दु । थ्वलिसें पर्यटनमन्त्री योगेश भट्टराई नं कोष पलिस्था यायेत १० लख बिइधाःगु व उगु दां कायेत मन्त्रीलिसे नापलाये मखनाच्वंगु दु ।

दँय् दसं कार्तिक शुक्लपक्ष द्वादसी तिथिइ क्यनाः वयाच्वंगु कातिप्याखं अन्तर्गतया बराह प्याखं शुक्रवाः बहनी क्वचाःगु खः । विष्णुपुराणय् आधारित बाखं कथं वंगु दँ १२ न्हु क्यंगु उगु कातिप्याखं थुगु दँ धाःसा निन्हु जक क्यनेगु आज्जु कथं बराह व नृसिंह अवतार क्यंगु खः । वि.सं. १६९७ स यलया जुजु सिद्धिनरसिंह मल्लं देस व जनताया कल्याणार्थ थुगु प्याखं चलेयाःगु खः । कातिप्याखं हलिंया हे दकले ताःहाकःगु जूगु जिकिर याःगु दु ।

कार्तिक नाट्य महोत्सवं जनतायात छगू हे सुत्रय् चिनाः धार्मिक, नैतिक व सामाजिक ज्ञां तकं बियाः वयाच्वंगु दु । कातिप्याख. न्हापांगुखुसि न्यागू व सिद्धिनरसिंह मल्लया काय् जुजु श्रीनिवास मल्लया पालंनिसें बाथः प्याखं, सुदामा प्याखं थप यानाः १५ न्हु क्यंगु यलया बासिन्दां धाःगु दु ।

अथेहे, श्रीनिवास मल्लया काय् योगनरेन्द्र मल्लं उषाहरण व माधवानल निगू लीलायात थप यानाः कार्तिक महिनाज्वःछि २७ न्हु क्यंगु जानकारी ब्यूगु दु ।

मुलुकया ऐतिहासिक लिसें सांस्कृतिक सम्पदाया पायछि कथं संरक्षण व प्रवद्र्धन यायेगु आज्जुं बि.सं. २०७० सालय् निन्हु थप यानाः १० न्हु व वधुंकाः मेगु निन्हु थप यानाः १२ न्हु क्यनेगु यानाच्वनागु जानकारी समितिं ब्यूगु दु ।

जुजु सिद्धिनरसिंहया छय् योगनरेन्द्र मल्लया पालय् कार्तिक महिनाज्वःछि न्ह्याकूगु उगु प्याखनय् १७ गू विाया बाखं वा प्याखं क्यनेगु याइगु खः ।

कोरोना महामारी वयेन्ह्यः मुलुकया हे ताःहाकःगु प्याखं स्वयेत स्वदेशीया लिसेलिसें विदेशी मुलुकया आपालं पर्यटकपिं तकं यलय् वइगु खः । थुगु दँ धाःसा स्वये मंदुपिं जनतां थःथःगु छेँपाखें प्याखंया आनन्द काःगु खः ।

Categorized in नेवाः