२०७२ आश्विन १, शुक्रबार ०९:५१:१०

आः कम्प्युटरं हे मनूया सीगु दिंया भविष्यवाणी याइगु जूगु दु । अमेरिकाय् छगू थुज्वःगु सुपर कम्प्युटरया विकास जूगु दुकि गुकिं सुं नं मनू सीगु सम्भावनाया विषयस भविष्यवाणी यायेफु । मिडिया रिपोर्टया कथं सुपर कम्प्युटरं याइगु भविष्यवाणी शत्प्रतिशत सही जूगु दु ।
बेलायती संचार माध्यम दी मिररया कथं अमेरिकाया बोस्टनय् च्वंगु बेथ इसरायल डिकोन्सेन्स मेडिकल सेन्टरय् थ्व सुपर कम्प्युटर नीस्वंगु दु । थुगु कम्प्युटरय् थ्यंमथ्यं ३० दँ ई तुकाः अढाइ लखसिबें अप्वः मनूतय्गु थीथी जानकारीत मुंकातःगु दु ।
हस्पिटलया प्रमुख डा. स्टिभ हर्गं धयादी– यदि छि थन वल धाःसा जिमिसं छिगु विषयस फुक्क जानकारीत कायेखनी । उगु जानकारीतय्गु तुलना जिमिसं समान लक्षणवाला मेमेपिं ल्वगिपिंनाप यायेफइ व भविष्यय् छिगु उपचार गथे जुइ, थुकिया विषयस नं जानकारी बिइफइ । थ्व असाधारण खोजय् न्हापांगुखुसि विग डाटा सिद्धान्त छ्यलातःगु दु ।
वय्कः डा, हर्गया कथं थ्व सुपर कम्प्युटं प्रत्येक ३ मिनेटय् ल्वगिया थीथी कथंया तथ्य व जानकारीत मुंकी, गुकी हिइ च्वंगु अक्सिजनया मात्रानिसें रक्तचापतक दुथ्याइ । अस्पताल प्रमुख डा. हर्गया कथं थुकिया हुनिं डाक्टरतय्के ल्वगिपिनिगु वासः यायेगु व सुसाकुसा यायेगु क्षमताय् बृद्धि जुइ ।
ल्वगिया बारे मुंकूगु फुक्क विस्तृत डाटातय्गु हे विश्लेषणया लिधँसाय् सुपर कम्प्युरं उम्ह ल्वगि सीगुया अप्वः सम्भावना गबले जुइ धैगु खँया घोषणा याइ । वय्कः डा. हर्गया कथं यदि कम्प्युटरं सुं नं ल्वगिया सीगु घोषणा यानाबिल धाःसा उम्ह ल्वगि लच्छि दुने हे सीगु अस्पतालया प्रमुख हर्गं धयादी ।