(गौतम महर्जन, किपू नगरपालिका १६ वडा नगांया बासिन्दा खः । वय्कः थ्यंमथ्यं ३० दँ न्ह्यःनिसें किपूया १७ वडाय् च्वंगु कीर्तिपुर माध्यमिक विद्यालयस शिक्षक जुयाच्वनादीगु खः । वय्कःया विषय गणित विषय खः । शिक्षक गौतम महर्जनयात उगु स्कुलय् छम्ह बांलाःम्ह गणित शिक्षकया रुपं कायेगु यानाः वयाच्वंगु दु । वय्कःलिसे वय्कःया गणित विषय व कीर्तिपुर मा.वि.या विषययात कया यानागु खँल्हाबल्हाया लिधंसाय् बःचाहाकलं थन न्ह्यब्वया च्वना । –सं.)

• गौतम सरजु, थौकन्हय् छि गन व्यस्त जुयादिया ?

न्हापा न्हापा स्कुलय् आखः ब्वंकेगु नापं स्कुलया व्यवस्थापनय् नं ग्वाहालि यानाः वयाच्वनागु खः । तर २०७१ मंसिर–पौष लिपा ब्वंकेगु बाहेक मेगु छुं नं ज्या यायेगु लकस मदुगुलिं सामाजिक ख्यलय् गुथि गाना, सांस्कृतिक बाजागाजाया ब्वज्याय् ज्या यानाच्वना ।

• शिक्षण पेशाय् ज्या यानादियागु ग्वदँ दत ?

२८ दँ न्ह्यः अर्थात् २०४५ जेष्ठ ९ गतेनिसें किर्तिपुर मा.वि.इ शिक्षण पेशा याना पलाः न्ह्याकाच्वनागु दु ।

• किपू लागाया ऐतिहासिक स्कुलय् शिक्षक जुयाबलय् छितः गुज्वःगु महसुस जूगु तायेकादिया ?

किपू लागाया नांजाःगु दकलय् पुलांगु न्हापां भाषा पाठशाला अन किरण मिडिल विद्यालय, मिडिल स्कुल धुंकाः २०२५ साल जेष्ठ १३ गते पलिस्था जूगु कीर्तिपुर मा.वि.पाखें वि.सं. २०३६ सालय् एस.एल.सी. पासा याना । गुदँ लिपा नीम्ह प्रतियोगी दथुइ प्रतिस्पर्धा याना स्कुलय् दुहां वनेत ताःलाःगु खः । उबले स्कूलया पाठ्यव्रmमय् शिक्षण ज्याया खँय् सैद्धान्तिक ज्ञान विइ कथं शिक्षा शिक्षण विषय तयातःगु कथं शिक्षण ज्याय् थःगु इच्छा दुथें शिक्षण याये दया गर्व महसुस जुल । स्कुलय् न्हापांगु खुसि दुहां वनागु इलय् प्र.अ. नीलकण्ठ अमात्य सरं रुटिन दयेकेगु निसें थीथी ज्याय् माःगु टेबुल वर्क ज्या यानागु खः । उकिं याना ब्वंकेज्या बाहेक प्रशासनिक ज्याय् ग्वाहालि यायेत तिवः बिया । उगु इलय्या शिक्षक पासापिं दथुइया सहकार्य कथं विद्यालया शैक्षिक लकस दयेके ज्याय् नं श्रद्धापूर्वक आस्थापूर्वक ग्वाहालि यायेत नुगः क्वसाल ।

• थौंकन्हय् थुगु कीर्तिपुर मा.वि.लगायत मेमेगु सरकारी स्कुलय् झः झः विद्यार्थीपिं म्हो जुजुं वनाच्वंगु दु धाइ, गथे जुया खः ?

स्कुल छगू शैक्षिक देगः खः । गथे द्यः दुगु देगलय् दुहां वनेत पिने लाकां त्वःताः धार्मिक आस्था तयावनि, अथेहे स्कुलय् दुहां वनेत छुं नं कथंया आग्रह पूर्वाग्रह त्वःताः वनेमा धैगु जिगु नं व्यक्तिगत मान्यता खः । थौंकन्हय् अप्व धैथें सार्वजनिक स्कुलत राजनैतिक पूर्वाग्रहया शिकार जुयाच्वंगु सकलसिन खनाच्वंगु दु । राजनैतिक पार्टी दुने गुट उपगुट दुथें छगू संस्था दुने संस्थाया संस्थागत विकास स्वयां थःथःगु राजनैतिक शक्ति बल्लाकेगु बांमलाःगु संस्कार ब्वलना वःगु खनेदु । छगू संस्थाया नितिं निष्पक्षं व स्वतन्त्र अनुगमनण नितिं नीस्वनातःगु थीथी निकायपाखें नं पद घयेपुइगु वाहेक थःगु दायित्व निर्वाह यानाच्वंगु खनेमदु । सार्वजनिक स्कुलतय्गु हविगत थ्वहे दसु खः ।

• थथे स्कुलय् राजनीति जुइगु गुलितक पाय्छिगु खँ खः । राजनीति जुइबलय् ब्वमि, स्यनामि शिक्षकपिन्त नकारात्मक लिच्वः मलाइला ?

स्कुल लागाय् राजनीतिक जक मखु स्कुलया आन्तरिक व्यवस्थापनया थीथी कमजोरी नं स्यनाच्वंगु खनेदु । गथेकि कीर्तिपुर मा.वि.या लिपांगु घटना कथं न्ह्यब्वयेगु खःसा २०७१ मंसिर ११ गते लिपा तत्कालिन प्र.अ. जनार्दन श्रेष्ठया अनिवार्य अवकाश धुंकाः वय्कःया मा.वि. तहया गणित विषय रिक्त जुइगुलिं गणित विषयया शिक्षणय् वइगु समस्याया खँय् काठमाडौं जिल्ला शिक्षा ज्याकुथियात जेष्ठ, असार ताकाय् विज्ञान शिक्षक नियुक्ति बिया हयेबलय् गणित विषय आखः ब्वंकेफुम्ह ल्यया हःसा बांलाइ धकाः इनाप यानातःगु खँय् स्कुलया वास्तविक अध्ययन मयासे प्र.अ. जनार्दन सरयाके स्पष्टीकरण फ्वनेगु तकं ज्या जुल । तर वय्कःया अवकाश लिपा गणित ब्यंकेपूmम्ह विज्ञान शिक्षक छ्वयाः हयेगुला गन गनं, वय्कःया गणित थासय् मेगु स्कूलय् प्र.अ. जुयाच्वंम्ह सामाजिक विषयया शिक्षकयात तत्कालिन जिल्ला शिक्षा अधिकारीया राजनैतिक रुपं लितकाःम्ह ल्याखं निमित्त प्र.अ. समेत यानाः नियुक्ति यानाहल । शिक्षा क्षेत्रया नितिं थ्वथें जाःगु लज्जागु ज्या जुइका गथे यानाः लिच्वः बांलाके फइ ? कीर्तिपुर मा.वि वना निष्पक्ष अध्ययन व अनुगमण यात धाःसा तथ्य खँ सुना नं त्वःपुइ फइमखु ।

• न्हापा डाक्टर, इन्जियर, पत्रकार, कलाकार, प्राविधिक दक्ष जनशक्ति देसय् उत्पादन यायेत मूवंगु योगदान ब्यूगु थुुगु स्कुल सुथांलाक्क न्ह्याकेत गुज्वःगु पलाः न्ह्याकूसा बाँलाइथें च्वं ? 

देश विकासया नितिं आपालं माःगु डाक्टर, इन्जियर, पत्रकार, कलाकार, प्राविधिक थेंजाःगु प्राविधिक जनशक्ति उत्पादनय् थुगु स्कुलं यानाः वयाच्वंगु योगदान सकसिनं खनाच्वंगु खः । सकल ब्वमिपिन्सं थः ब्वनागु स्कुलयात माया याना लुमंका हे च्वनि । तर थः ब्वनागु स्कुलया अवस्था च्वय् क्वय् जुइगु इलय् थःगु म्हसिका कथं न्ह्यब्वयेगु स्कुलया हुनिं बाँलाः मलाः लिच्वः लाना हे च्वनि । उकिं थःगु स्कुल सदां भिनेमा धकाः स्वभाविक रुपं आस्था तया हे च्वनेमाः ।

• आपालं ब्वमि गणित विषयलय् फेल जुयाच्वंगु दु । थुगुसीया एस.इ.इ—२०७३ बियादीपिं ब्वमिपिं गणित विषय लगायत रिजल्ट बाँलाकेत गथे याःसा जिइथें च्वं ?

स्कुल स्तरया जाँचय् गणित विषयखय् पास मजुगु खँय् स्कुल दुनेया शैक्षिक वातावरणया तःधंगु ल्हाः दु । अप्व धैथें शिक्षकतय्सं स्यनेगु स्वयां ब्वंकेगु जक यानाच्वंगु खनेदु । ब्वंकेगु ज्या स्यनेगु ज्याया स्वयानं यक्व अःपु जुइ । गथेकि च्वय्या तगिंया ब्वमितय्सं नं क्वय्या तगिंपिन्त ब्वंके फयेफु तर स्यने ज्या फइ कि फइमखु छलफलया सवाल जुइ, ब्वमितय्त स्कूल दुने बांलाःगु शैक्षिक वातावरण नितिं ब्वमिया व्यक्तिगत अवस्था, वया छेँया पारिवारिक अवस्थाबारे निरन्तर अध्ययन अनुसन्धान यातधाःसा ब्वमितय्के दुगु कमजोरी चिइकेफइ ।

• अन्त्य छुं धाये ल्यं दनिलाथें ?

स्कुलथें जाःगु पवित्र देगलय् अविवेकपूर्ण निर्णय यानाः छम्ह झिदँ तक अस्थायी शिक्षक जुया ज्या यानाच्वंम्ह निर्दाेष शिक्षकयात गणित शिक्षण मयाःगु द्वपनय् २०७२ साल कार्तिक १५ गतेनिसें जागिर नःगु खँ गननं न्यने म्वालेमाः । थुज्वःगु खँय् सम्बन्धित निकायतय्सं ध्यान बिइ हे माः । छुं नं स्कुलय् थथे स्वयेन्यने म्वालेमाः । नुगःखँ प्वंके खंगुलिं नेवाः अनलाइनन्यूजयात दुनुगलंनिसें सुभाय् देछाना च्वना ।

–रिदेन महर्जन