zero media family planning adv

“व लँपु थ्व पलाः छगू कृति तःगु दृष्टि ” दुने समालोचकपिनि टिप्पणी

 नेपालभाषाया नांजाःम्ह उपन्यासकार भाजु मल्ल के. सुन्दरया व लँपु थ्व पलाः ‘छगू कृति ः तःगू दृष्टि’ समालोचना व टिप्पणी मुना दुने नांजाःपिं समालोचकपिं डा. बज्रराज शाक्य, चित्तरञ्जन नेपाली, डा. कमलप्रकाश मल्ल, भिक्षु कोण्डन्य, सुरेश किरण, पूर्ण ताम्राकार, रीना तुलाधर, डा. चन्द्रमान बज्राचार्य, पुष्कर माथेमा, राजु शाक्य, प्रा. माणिकलाल श्रेष्ठ, प्रा. प्रेमशान्ति तुलाधर, राजेन्द्र महर्जन व सुनिल महर्जनपिसं समालोचना व टिप्पणी याःगु दु । 

डा. बज्रराज शाक्यं ‘व लँपु थ्व पलाः ब्वनाः पिज्वःगु भावना’ शीर्षक तयाः ‘मैक्सिम गोर्कीयागु मां धयागु उपन्यास सुरुयासांनिसें सिमधःतले नःसां, द्यंसां, ट्वाइलेटय् वंसां मदिक्क ब्वनाः क्वचायेके थें तुं मल्ल भाजुया उपन्यास नं ब्वनागु ब्वनाः हे यानाः सिधयेका’ धकाः सफुतिइ न्ह्यथना तःगु दु । 

भाजु चित्तरञ्जन नेपालीं ‘व लँपु थ्व पलाः छगू चर्चा’ शीर्षकय् ‘च्वमि भाजु उपन्यासया नां व लँपु ः थ्व पलाः धकाः छुइ धुंकाः नं लँपु उखे खःसां पलाः थुखे छिनाच्वंगु दु धइगु सन्देशया छुमाकथं उपन्यासयात मेगु छगू उपनां बियादीगु दु’ धइगु खँ न्ह्यथनादीगु दु । 

डा. कमलप्रकाश मल्लं ‘साधारण ब्वँमिया मिखाय् ः मल्लया न्हू उपन्यास’ शीर्षकय् ‘मल्लया न्हू उपन्यास दुने वर्णानात्मक शैलीइ छम्ह सर्वज्ञ सूत्रधार थें कना यंकाच्वंगु खँ, ल्हानाच्वंगु खँल्हाबल्हायात यइपुक दुथ्याकाः  छगू निरन्तर गतिइ न्ह्याकातःगु दु’ धयादीगु दु । 

‘थुगु उपन्यास पूवंक ब्वने धुंकाः ब्वँमिपिन्त नेपालभाषा साहित्य विधाय् जनयुद्धया कथा अले धर्म व जीवन दर्शनयात कःघानाः छगू न्हूगु कुतः न्हूगु पहः – नवीन संगठनया सवाः पिज्वय्फु’ – भिक्षु कोण्डन्यं ‘व लँपु ः थ्व पलाः छगू इमा मन्दः दृष्टि’इ थ्व खँ च्वयादीगु खः । 

‘गुगु लँपु सुयागु पलाः ?’ शीर्षकय् सम्पादक सुरेश किरणं ‘क्रान्तिं मनूयात पाय्छि वहे थासय् थ्यंकीगु ख ःगन धर्मं थ्यंकेगु कुतः यानाच्वंगु दइ । धर्म व क्रान्ति निपु अलग अलग लँपु खः तर उगु लँपुइ न्यासि वनीगु पलाः धाःसा छगू हे जुयाच्वन’ धयादीगु दु । 

भाजु पूर्ण ताम्राकारं ‘व लँपु ः थ्व पलाः दुने बौद्ध दर्शन व माक्र्सवादी चिन्तन’ शीर्षकय् महामानव गौतम बुद्धया बौद्ध दर्शन व दार्शनिक कार्ल माक्र्सया माक्र्सवादी दर्शनं प्रेरित जुयाः हे मल्ल के. सुन्दरजुं व लँपु थ्व पलाः सिर्जना याःगु खनेदु’ धकाः टिप्पणी यानादीगु दु । 

डा. चन्द्रमान बज्राचार्यं ‘मल्ल के. सुन्दरयागु व लँपु थ्व पलाःयागु अध्ययन’ शीर्षकय् ‘थ्व उपन्यासय् उपन्यासकारं न्ह्यथनादीगु प्रमुख न्ह्यसः ‘अहिंसा व हिंसा’ ठीक अःखःगु अर्थबोध शब्द खः । अहिंसा शब्द शान्ति स्थापनाया वकालत यानाच्वनी’ धकाः टिप्पणी यानादीगु दु । 

भाजु पुष्कर माथेमां ‘व लँपु ः थ्व पलाः बुद्ध व युद्धय् समानान्तर’ शीर्षकय् ‘मिसा मू पात्रकथं न्ह्यानाच्वंगु बाखंचुया थ्व उपन्यास बौद्ध दर्शन व द्वन्द्वकालया मिसा मनोवैज्ञानिक न्ह्यब्वया बांलाःगु अवसर खः तर थुकी च्वमि ल्यूने लात’ धकाः टिप्पणी यानादीगु दु । 

सुरेश किरणं कान्तिपुर न्हिपतिइ पिथनादीगु ‘युद्ध व बुद्धया बाखं’ शीर्षकय् ‘युद्धया अतिकं बःचाबःचाधंगु खँयात तकं न्ह्यथनेफुगु अले मेखे बुद्धधर्मया तःजिगु दर्शनयात नं दुवाले फुगुलिं उपन्यास च्वयेत याःगु अनुसन्धान कुतः बांलाक्क खंकेफु’ धकाः न्ह्यथनादीगु दु । 

भाजु राजु शाक्यं ‘व लँपु ः थ्व पलाः उपन्यासय् जिं थ्व नं खना’ शीर्षकय् ‘उपन्यास ब्वब्वं वनेबलय् भारत स्वतन्त्र जुइ न्ह्यःया सामाजिक अवस्थायात न्ह्यब्वयाः च्वयातःगु रुड्यार्थ किप्लिङया विश्व प्रसिद्ध उपन्यास ‘किम’या कथावस्तु न्ह्यःने वः’ धकाः न्ह्यथनादीगु दु । 

प्रा. माणिकलाल श्रेष्ठं ‘मल्ल के. सुन्दरजुया ‘व लँपु थ्व पलाः बारे छुं खँ’ शीर्षकय् ‘जर्ज बर्नार्ड शाया टिप्पणीकथं ड्रामाया मू ज्यान द्वन्द्व खः धइगु खँ नोबेल धयाः पिहाँ वयाच्वंगु फुक्क कृतिइ लागु मजूसां व लँपु थ्व पलाः बारे धाःसा सतप्रतिशत सत्य’ धकाः टिप्पणी यानादीगु दु । 

अथेहे भाजु राजेन्द्र महर्जनं ‘निर्वाण व मुक्तिया फ्यूजन’ शीर्षकय् ‘सत्ता शक्तिया मू लिधंसा अस्त हे खः धइगु मान्यतायात व्यवहारिक ल्याखं हे खण्डन यासें उपन्यासकार मल्लजुं प्रमाणित यायेत स्वःगु दु, ल्वाभः विवशताया तुतां जुइफु, तर शास्वत विकल्प मखु’ धकाः न्ह्यथनादीगु दु । 

सफूया अन्तय् भाजु सुनिल महर्जनं ‘भिक्षुणी व छापामार मय्जुपिं ध्वदूबलय्’ शीर्षकय् अन्तद्र्वन्द्वय् छगू ह्यूपाः वइ, छम्ह छापामार मिसा भिक्षुणीया दुने थः मांया ख्वाः लुइकेगु इच्छा जुइ, अथेहे भिक्षुणीपाखें नं छापामारया ख्वालय् थः हे म्ह्याय् खंकेगु कुतः जुइ’ धकाः थुगु समालोचना व टिप्पणी मुनाय् थःगु बिचाः न्ह्यथनादीगु दु । 

(व लँपु थ्व पलाः छगू कृति ः तःगु दृष्टि – समालोचना व टिप्पणी मुना सफूया सम्पादक प्रा. प्रेमशान्ति तुलाधरजुं उगु सफुतिइ च्वमिपिनि च्वसुइ न्ह्यथनादीगु  “हाइलाइटत मुनाः न्ह्यब्वयागु खः । अर्थ प्रकाशन प्रा.लि.पाखें पिथंगु थुगु सफू सेवा प्रिन्टिङ प्रेसया थुवाः भाजु अमृतमान शाक्यया मां तीर्थकुमारी शाक्यया लुमन्तिइ देछाकथं पिदंगु खः । थुगु सफूया मू १५०/– तका खःसा थाकू सेवा प्रिन्टिङ प्रेस, कम्प्यूटर विपिन कपाली चिकंमूपाखें यानादीगु खः ।)