ad prabhu

“लिम्पियाधुरा इतिहासनिसें हे मदु” –‘झूठ’ खँ ल्हाइम्ह मन्त्री पद्मा अर्याल

नेवा: अनलाइन न्युज | २०७७ बैशाख ३०, मंगलबार १०:२०:५५

“जि स्कूलय् ब्वना बलय् नेपाःया लिम्पियाधुराया नक्सा स्वयं स्कूलय् खनागु दु । उकिं उगु नक्सा नेपाःया इतिहासय् गुबले नं मदु धैगु थ्व गलत खँ खः ।” –नेकपा सांसद भीम रावल

भूमि व्यवस्था, सहकारी व गरिबी निवारणमन्त्री पद्मा अर्यालं संघीय संसदया प्रतिनिधिसभा अन्तर्गत अन्तर्राष्ट्रिय सम्बन्ध समितिइ ‘झूठ’ खँ ल्हाःगु दु ।

सोमवाः च्वंगु समितिया बैठकय् मन्त्री अर्यालं छगू टिभी अन्तर्वार्ताया झ्वलय् न्वःवाःगु खँयात कयाः नेकपाया सांसद भीम रावलं आपत्ति प्वंकेधुंकाः व रावलया न्ह्यसःया लिसः बिइगु झ्वलय् मन्त्री अर्यालं ‘झूठ’ खँ ल्हाःगु खँ पुष्टि जूगु दु ।

मन्त्री अर्यालयात आइतवाःया बैठकय् हे सःतूगु खः । तर, विशेष कारणवश मन्त्री अर्याल आइतवाःया बैठकय् उपस्थित मजूगु खः । म्हिगः सोमवाःया बैठकय् उपस्थित जूम्ह मन्त्री अर्यालयात सभापति पवित्रा निरौलां न्वःवायेगु नितिं ई बिइधुंकाः नेता रावलं सुरुइ हे मन्त्री अर्याल न्वःवाये न्ह्यः थःगु जिज्ञासा दूगु धासें उगु टिभी अन्तर्वार्ताय् न्वःवाःगु खँयात कयाः प्रष्ट यायेत आग्रह याःगु खः ।

भीम रावलं धाःगु खः, “मन्त्री पद्मा अर्यालं न्वःवाये न्ह्यः जिगु बःचाधंगु जिज्ञासा दु, सभापति जू । भूमि व्यवस्था, सहकारी व गरिबी निवारण मन्त्रीं इतिहासय् लिम्पियाधुरा नेपाःया नक्साय् हे मदु धाःगु दु । वं सार्वजनिक रुपं हे धाःगु दु । वं छाय् थथे धाःगु खः ? थ्व नं न्वःवायेबलय् स्पष्ट यायेमाल । जिं थ्व समितिइ न्हापा नं न्वःवानाबलय् स्पष्ट धयागु खः । जि स्कूलय् ब्वना बलय् नेपाःया लिम्पियाधुराया नक्सा स्वयं स्कूलय् खनागु दु । उकिं उगु नक्सा नेपाःया इतिहासय् गुबले नं मदु धैगु थ्व गलत खँ खः ।”

भीम रावलया न्ह्यसःया लिसः बिइगु झ्वलय् मन्त्री अर्यालं सुरुवातय् हे ‘झूठ’ खँ ल्हात । मन्त्री अर्यालं अन्तर्वार्ताबारे स्पष्ट यासें धाःगु खः, “उगु अन्तर्वार्ता ‘जनता जान्न चाहन्छ’ खः । सुथय् ७ ता इलय् जितः सुचं नं मदु । छगू ल्याण्ड लाइनं फोन वल । उगु इलय् जिगु मोबाइल जिगु हे ल्हाःतय् दूगु खः । ल्ह्वना । जिं अन्तर्वार्ता धकाः मसिल । छुं धायेत्यंगु जुइ धैगु जितः ताल । ज्यू धया । व, छक्वलं मन्त्रीजु, ‘जनता जान्न चाहन्छ’ छितः थ्व न्ह्यसः धाल । जूगु थ्व हे खः । आः नं छिसं चायेकादिल धाःसां नं लिंक चायेके फइ । न्हापां पिने गुज्वःगु कथं प्रचार जूगु दु, व अभिव्यक्ति जिगु छुं हे मदु ।”

लिसः बिइगु झ्वलय् मन्त्री अर्यालं ‘जनता जान्न चाहन्छ’ ज्याझ्वः धकाः धाःगु दु । जबकि थ्व अन्तर्वार्ताय् ज्याझ्वः न्ह्याकामिं ‘नेपाली बहसय् छितः लसकुस दु’ धकाः सुरुइ हे धाःगु दु । मन्त्री अर्यालं सुरुइ हे ‘झूठ’ खँ ल्हाःगु दु ।

भीम रावलं मन्त्री अर्यालयात इतिहासय् लिम्पियाधुरा नेपाःया नक्साय् हे मदु धकाः छाय् न्वःवानादिया ? धकाः न्ह्यसः तःगु खः । मन्त्री अर्यालं उगु अन्तर्वार्ताय् ‘लिम्पियाधुरा नेपाःया नक्साय् हे मदु व थ्व इतिहासनिसें हे मदूगु’ दाबी याःगु खः । उगु अन्तर्वार्ताय् मन्त्री अर्यालं न्वःवाःगु अडियो सामाजि संजालय् भाइरल नं जूगु दु ।

लिपुलेक नेपाःया खः, थ्व खँ फुक्कसिनं स्यूगु तर नेपाःया नक्साय् छाय् दुथ्याकेमफुत मन्त्री जु ? धकाः थ्व जनताया न्ह्यसः खः धकाः सुरुइ हे उगु अन्तर्वार्ताय् न्यंगु खः । उकिया लिसलय् मन्त्री अर्यालं नेपाःया नक्साय् कालापानी व लिपुलेक थौं नं द हे दु । गन दु ? क्यनादिसँ ले ? गुलिखे ला नेपाःया नक्साय् लिम्पियाधुरा नं दु धकाः धाःगु दु नि । मन्त्री अर्यालं लिसलय् धाःगु दु, “लिम्पियाधुरा मदु । लिम्पियाधुरा इतिहासनिसें हे मदु । लिपुलेक व कालापानी लिसेंया नक्सा आः नं झीसं प्रचलनय् हयाःगु नक्सा खः ।”

Categorized in राजनीति