zero media family planning adv

“पुलांगु म्ये रिमिक्स याइगु यहे मयः जितः” – संंगीतकार गायक राजेश महर्जन

किपू नगरपालिका १ वडा थांबहाः त्वालय् च्वनादीम्ह राजेश महर्जन खय्लता धरानय् जन्म जूम्ह खः । वय्कःया अबुजु ज्या यायेगु झ्वलय् धरान थ्यन, अन हे च्वम्ह मिसानाप ब्याहा जुल । अले राजेश महर्जन नं अन धरानय् हे जन्म जुल । धरानं हे एसएलसी पास यात । अनं किपुली वल । कूल छेँ ला किपूया थांबहाः त्वालय् हे जुल । धरानं किपू वःगु इलय् राजेशं नेवाः भाय् मसः । उकिं राजेशया पासापिन्सं वय्कःयात खय् राजेश धकाः हायेके कथं सःतीगु । आः ला वय्कः छम्ह नेवाः भाय् व नेवाः संगीतयात मतिना याइम्ह, नेवाः नुगः ब्वलंकाः नेवाः संगीत ख्यलय् हे समर्पित जुयाच्वनादीगु दु थौंकन्हय् ।
थौंकन्हय् राजेश महर्जन किपूया छम्ह नांजाःम्ह गायक व संगीतकारया रुपय् म्हस्यूसा छम्ह नेवाः परम्परागत दाफा खलःया म्येहालामि व बाँसुरी खलःया बाँसुरीबादक व बाँसुरी गुरुया रुपय् नं म्हस्यू । वय्कः थःगु हे त्वालय् च्वंगु थांबहाः दाफा व बाँसुरी खलःया दुजः खः । वय्कलं बाँसुरी गुरु जुया किपूया १६ वडा नगां, येँया दक्षिण–पश्चिम भेगया बोसिगां व नैकापय् बाँसुरी स्यनादी धुंकल ।

अथेहे वय्कलं थ्यंमथ्यं झिंच्यादँति न्ह्यः किपुली जूगु संगीत कासाय् म्ये हालाः लियांल्यू सिरपाः त्याकादीगु खः । उगु कासाय् नगांया मचा म्येहालिमिपिं न्हाप, थौंकन्हय् नांजाःम्ह म्येहालामि सतीश महर्जन ल्यू व राजेश महर्जन लियांंल्यू लाःगु खःसा उगु हे इलय् पांगाय् जूगु उज्वःगु हे संगीत कासाय् वय्कः राजेश महर्जन हःपाः सिरपाः लाःगु खः । आः वया ने.सं. ११३२÷३३ स जूगु पेजथ्री नेपालभाषा म्यूजिक अवार्डय् ‘बेष्ट न्यू ट्यालेन्ट सिंगर अवार्ड’ त्याकेत ताःलाःम्ह म्येहालामि व संगीतकार खः । वय्कलं थःम्हं हे च्वयादीगु, लसय् हनादीगु व हालादीगु वय्कलं पिथनादीगु वय्कःया याकः म्येचाः “थ्व नुगः” दुनेया म्ये ‘तुयुगु ख्वालय् ह्याउँगु सिन्हः रे, मय्जुया ख्वाः गुलि बाँलाः रे...’ बोलया थुगु म्येपाखें उगु ‘बेष्ट न्यू ट्यालेन्ट सिंगर अवार्ड’ त्याकादीगु खः । थुगु म्ये आः नकतिनि थिमिपाखें पिदंगु सँकिपा ‘तापलय्’ दुने नं दुथ्याकातःगु दु ।
राजेश महर्जनं छुं दँ न्ह्यः किपुली जूगु किपू महोत्सवया इलय् किपू देय्या धःस्वाःगु न्हाय्या रुपय् किपूया म्येय् लय् चिनाः किपूया म्येहालामिपिं रत्नशोभा महर्जन, सुविन श्रेष्ठ, शान्ति नेपाली व स्वयं थःम्हं नं हाला किपुली बय्बय् याःगु खः ।

छगू सांगितिक इतिहासया रचना यानादीगु दु थुगु म्येपाखें राजेश महर्जनं ।
‘झीगु थःगु तजिलजि दु, झीगु मौलिक म्हसीका दु
थ्व देय्या किपूमि झी, थःगु हे इतिहास दु...’ बोलया थुगु म्ये किपूया म्येच्वमि ललेन्द्र शाक्यं च्वयादीगु खः । थुगु म्येया म्यूजिक भिडियो नं पिदंगु दु । अथेहे वय्कलं आः नकतिनि जक भुखाय् लिपा म्येच्वमि ललेन्द्र शाक्यया हे च्वसाय्  पुनःनिर्माण जागरण म्ये ‘दँ रे दँ नेपाःमि दँ, छ जि मधाःसे झी जुयाः दँ
मानव धर्म खः, मानव जुया मानवता ब्वयेत दँ...’ बोलया म्ये लय् चिनाः किपूया हे म्येहालामिपिं सुविन श्रेष्ठ, स्वस्ती महर्जन, रत्नशोभा महर्जन अले थः स्वयं हालाः म्यूजिक भिडियो पिथंगु दु राजेश महर्जनं । थुगु म्येय् नं वय्कलं मेगु सांगितिक इतिहास च्वयेगु ज्या यानादिल ।
बरिष्ठ संगीतकःमि दीप श्रेष्ठपाखें अतिकं प्रभावितम्ह राजेश महर्जनयात यःपिं श्रष्ठापिं गोल्डेन भ्वाईस अफ नेपाल प्रेमध्वज प्रधान, रफी, किशोर कुमार व नारायणगोपाल खः । सायद उकिं हे जुइ, वय्कःपिनिगु आपालं आपाः म्ये व संगीतया इतिहास स्यू वय्कलं । अले वय्कः श्रष्ठापिनिगु म्येत नं आपालं आपाः हे हालादी राजेश महर्जनं ।

थौंकन्हय्या न्हू पिढीं संगीतयात दुनुगलंनिसें नालाः मकाःसे कर्किया संगीतयात कःघानाच्वंगु दु धकाः थःगु नुगः खँ प्वंकादीम्ह राजेश महर्जनं धयादी, “थौंकन्हय्या पुस्ता थःगु मौलिक संगीत श्रृजना यायेगु त्वःतूथें च्वं जितः । पाश्चात्य संगीतयात नालाः मौलिक संगीतयात हिस्यायेगु याना वयाच्वंगु दु । अझ पुलांगु संगीतयात रिमिक्स यानाः च्वःप्वः मदयेक उगु पुलांगु संगीतयात स्यंकेगु ज्या यानाच्वंगु दु थौंकन्हय् । उकिं जितः पुलांगु मौलिक म्ये व संगीतयात रिमिक्स याइगु यहे मयः जितः ।”

राजेश महर्जनं न्यादँति न्ह्यः थःगु न्हापांगु याकः म्येचाः ‘थ्व नुगः’ ला पिथनादी धुंकल । आः हाकनं वय्कलं मेगु म्येचाः पिथनेगु नितिं च्यापू÷झिपू न्हूगु म्येत थःगु हे खर्चं रिकर्ड याये धुंकल । अय्सां आःतकं राजेश महर्जनं थःगु निगुगू म्येचाः बजारय् महःनि । थुगु विषयस वय्कलं धयादी, “म्येत ला रिकर्ड याये धुन म्येचाःया नितिं, तर आर्थिक अभावया हुनिं जक जिगु मेगु म्येचाः पिथने मफयाच्वंगु खः । थन नेवाः संगीत ख्यलय् समर्पितपिं संगीतकःमिपिन्सं थःम्हं हे खर्च यानाः म्येचाः पिथनेमा, पिथना बिइपिं सुं हे मदुथें च्वं । उकिं नं थाकुया च्वंगु खः जितः ।”
याक एण्ड यति होटलय् फिटनेस क्लबय् छम्ह साधारण कर्मचारीया ज्या यानादीम्ह राजेश महर्जन जीवनय् ज्यामि ज्यांनिसें कया दकःमि ज्या नं यानादी धुंकलसा न्हापा न्हापां उगु होटलय् ज्या यानाबलय् येँसंनिसें चान्हय् किपूतक न्यासि वयेमाःगु खँ लुमंकुसें नुगः मछिंकाः थःगु संघर्षमय् अतीत लुमंकाः दिल वय्कलं ।
दकले लिपा वय्कः संगीत ख्यलय् पलाः गुकथं लात धैगु न्ह्यसःया लिसलय् राजेश महर्जनं धयादी, “खय्तला जिगु दकले न्हापांम्ह गुरु धैम्ह हे जि मदुम्ह अबुजु खः । वय्कः संगीतयात अतिकं मतिना यानादीम्ह, धरानय् जि मचाबलय् बाःया पासा श्रद्धेय बरिष्ठ गायक दीप श्रेष्ठ खः । वय्कःपिनिगु हे हःपालं जि संगीत ख्यलय् मचायेक लाःगु खः ।”
                                                                                                                                                           (न्ह्यब्वःम्ह ः ललेन्द्र शाक्य)