kmc bidya

“थुलि घाः दिलय् ”या म्येहालामि गंगाधर बज्राचार्य मन्त

नेवा: अनलाइन न्युज | २०७७ जेठ १०, शनिबार ११:३७:४९

“थुलि घाः दिलय् ”या म्येहालामिया म्येहालामि गंगाधर बज्राचार्यया बुद्धबाः मन्त । वयकः ७५ दँया खः ।

 संगीत शिक्षाया निंतिं नांजागु कलानिधि इन्दिरा संगीत महाविद्यालयया दुजः गंगाधर बज्राचार्य मदुम्ह संगीतकःमि पौरुषधर बज्राचार्यया दाजु खः । 

वयकःया “थुलि घाः दिलय् ”या बोलया म्ये तसकं लोकंह्वाःगु म्ये खःसा गायन या नापनापं संगीतकारया रुपय् नं नांजाम्ह संगीतकःमि खः । 

वयकलं जनकवि दुर्गालाल श्रेष्ठं च्वयादीगु “ थुलि घाः दिलय् ”या म्येहालामिया नापनापं संगीतकार नं खःसा वयकलं हालादीगु थिंला पुन्हि तिमिलाया जलय् , लोकेश्वर प्रभुश्री करुणामय बोलया म्ये नं लोकंह्वाःगु हे म्ये खः । लोकेश्वर प्रभुश्री करुणामय बोलया भजनया वयक संगीतकार नं खःसा गायक राजेश महर्जनया लोकेश्वर निभाः छ बिना वने मते म्येया संगीतकार नं खः । ल्याय्म्ह पुस्तायात नं संगीतया ज्ञान बिइमा धका यलय् न्हूपुस्तायात भजन व संगीत प्रशिक्षण नं बिया वया च्वनादिम्ह भजनगुरु नं खः ।

वयकः यलया यशोधर महाविहार बूबहालय् च्वंम्ह खःसा वयकया छेँय् वयकया छम्ह जहान , निम्ह काय् व निम्ह म्ह्याय् दु । मदुम्ह संगीतकःमि गंगाधर बज्राचार्यलिसे न्हापांनिसें स्वापु दुम्ह संगीतज्ञ नांजाम्ह संगीतज्ञ अमरराज शर्मा राजोपाध्यायं वयकया लुमंकुसे धयादिल,“ इपिं दाजु किजा ( गंगाधर व पौरुषधर ) निम्हं न्हापांनिसें संगीतख्यलय् नुगः क्वसाःपिं खः । किजाम्ह छुं न्ह्यःहे मन्त । गंगाधर नं भचा न्ह्यःनिसें मफया च्वंम्ह खः । दँबदँ न्ह्यः गंगाधर नापलाबलय् वं जित किजांला त्वता वन , जि नं ताः ई मनू जुइ मखुत धका आःतक हे झल्झल्ती लुमंसे व । ” संगीतज्ञ राजोपाध्यायं धयादीकथं  गंगाधर बज्राचार्य दँबदँ न्ह्यःनिसें प्वाःया ल्वयय् वासः याकावयाच्वंम्ह खःसा वंगु बुद्धबाः मन्त ।

स्वयादिसँ वयकलं हालादिगु छपू म्ये

 

Categorized in नेवाः