zero media family planning adv

“क्यान इन्फोटेक २२ दँ न्ह्यःनिसें जुयाः वयाच्वंगु प्रदर्शनी खः”

(क्यान इन्फोटेक प्रदर्शनी थ्वहे वइगु माघ १५ गतेनिसें येँया भृकुटीमण्डपय् न्यान्हुयंकं जुइत्यंगु दु । थुगु प्रदर्शनी कम्प्युटरया लिसें मोबाइल, थुुगु बस्तुलिसे स्वाःगु थीथी कथंया हलंज्वलं प्रदर्शनी व व्यापार कथं वंगु २१ दँ न्ह्यःनिसें जुयाः वयाच्वंगु खःसा आः जुइत्यंगु प्रदर्शनी २२ क्वःगु खः । थुगु हे प्रदर्शनीयात कयाः क्यान इन्फोटेकया दुजः भीमध्वज श्रेष्ठलिसे नेवाः अनलाइनन्युजलिसे जूगु खँल्हाबल्हाया सार संक्षिप्त थन न्ह्यब्वयाच्वना । –संं.)

क्यान इन्फोटेक प्रदर्शनीया तयारी गुकथं जुयाच्वंगु दु ?

तयारी अन्तिम चरणय् थ्यंगु दु । क्यान इन्फोटेकयाके पुलांगु अनुभव दु । थ्व जुइत्यंगु प्रदर्शनी २२ क्वःगु खः । अथे धैगु २२ दँ न्ह्यःनिसें थुगु प्रदर्शनी जुयाः वयाच्वंगु खः ।

२२ दँ न्ह्यः दकले न्हापां थुगु प्रदर्शनी गन जूगु व छु विचालं न्ह्याःगु खः ?

२२ दँ न्ह्यःदकले न्हापां थ्व प्रदर्शनी येँया त्रिपुरेश्वरय् च्वंगु ब्लूस्टार होटलय् जूगु खः ।  च्यादँ तक ब्लूस्टार होटलय् जुलसा थ्वयां लिपा अन्तर्राष्ट्रिय सम्मेलन केन्द्र न्हूबानेश्वरय् मद्दिक्क जुयाच्वंगु खःसा थ्वयां लिपा संविधानसभाया चुनाव धुंकाः संविधानसभाया भवन अन्तर्राष्ट्रिय सम्मेलन केन्द्र जुइवं मद्दिक्क हाकनं भृकुटीमण्डपय् जुयाच्वंगु खः ।

क्यान इन्फोटेक प्रदर्शनी यायेगु विचाः उगु इलय् नकतिनि नकतिनि जक नेपालय् कम्प्युटर दुहाँवःगु लिसें कम्प्युटरया भाः नं उगु इलय् तसकं थिके । कम्प्युटरया बारे आम मनूतय्के बांलाःगु जानकारी मदु । थ्वहे हुनिं कम्प्युटर प्रविधिसम्बन्धि जानकारी बिइगु आज्जुं थ्व प्रदर्शनी न्ह्याःगु खः ।

आःला थुगु प्रदर्शनी ब्यापार मेला नं जुल मखुला ?

प्रदर्शनी नापनापं ब्यापार मजूसें मगाः । ब्यापार जूसा जक प्रदर्शनीइ तयातःगु ज्वलंत छेँय् छेँय् थ्यनी । उकिसनं कम्प्युटर प्रविधि मनूतय्गु जीवनया छगू अभिन्न अंग धयाथें जुइधुंकूगु इलय् प्रदर्शनीया लिसें ब्यापार जुइगु नं स्वाभाविक खः । लिसें जिमिसं थ्वथ्व दु, थ्वथ्व यायेज्यू धैगु सन्देश प्रदर्शनीपाखें बिइगु इलय् स्वाभाविक रुपं थुकथंया ज्वलं थःत उपयोगी जुइगु जुलधाःसा अन ब्यापार हे जुइ ।

क्यान इन्फोटेक येँय् जक जुयाच्वंगु दुकि पिने जिल्लाय् नं जुयाच्वंगु दु ?

हँ, येँय् दँय्दसं हे जुयाच्वंगु दु । अथेहे, पोखरा, नारायणघाटय् नं दँय्दसं धयाथें जुयाच्वंगु दु । थ्व बाहेक बुटवल, विराटनगर, हेटौडा व मेमेगु जिल्लाय् नं निदँ स्वदँ पाकाः क्यान इन्फोटेक प्रदर्शनी जुयाच्वंगु दु ।
सरकारपाखें थ्व प्रदर्शनीयात ग्वाहालि गुकथं जुयाच्वंगु दु ?

सरकारपाखें खास हे ग्वाहालि धकाः आर्थिकरुपं यानाच्वंगु मदु । तर, सुरक्षानिसें कयाः थीथी मेगु प्रशासनिक ग्वाहालि जक यानाच्वंगु दु । स्वयम् क्यान इन्फोटेकं आर्थिकंनिसें कयाः थुकिया व्यवस्थापन यानाः वयाच्वंगु खः ।

थुगु प्रदर्शनीयात कयाः अन्तय् छिगुपाखें धायेगु छु दु ?

दकले न्हापां ला, माघ १५ गतेनिसें न्ह्याइगु थुगु प्रदर्शनी ज्याझ्वलय् झायेत सकसित इनाप यानाच्वना । मेता खँ थुगु प्रदर्शनीइ आईसीटी ज्वलं गुलि नं दु, व फुक्क प्रदर्शन जुइत्यंगुलिं थःपिन्त माःगु ज्वलं अःपुक्क न्यायेफइगु जूगुलिं थ्व ह्वताः छिक्पिन्सं कयादी फइ । उकिं सकसित न्हूप्रविधिया जानकारी कायेत नं प्रर्दशनीइ ब्वति कायेत इनाप यानाच्वना ।