zero media family planning adv

“ओ कोरोना” या म्ये हालामिं, पत्रकार सुरजबीर बज्राचार्यया न्हिंयान्हिथं

नेवा: अनलाइन न्युज | २०७६ चैत्र १९, बुधबार २१:०२:१०

 थ्व इलय् रेडियोय् मवना । छेँय् हे च्वनाः ज्याझ्वः दयेकाः रेडियोय् छ्वयाच्वना । रिपोर्टस् डायरीपाखें थीथी जिल्लाया विषयय् इमेज एफ.एम. १०३.६ मेगाहर्जपाखें सुथसिया ५ः३० बजे प्रशारण जुयाच्वंगु दु । लकडाउनया निन्हु स्वन्हुतक रेडियोय् वना तर लिपा रेडियोय् नं सकलें मच्वनेगु क्वछिनाकथं ज्याझ्वःया भाला दुम्ह जि नं छेँय् हे च्वनाः ज्या यानाच्वनागु खः । 

संचार कर्मबाहेक सुथय् योग याना, अनंलि सांगीतिक लकसय् च्वना, अले समाचार व अपडेटबारे सीकेगु, जिल्ला जिल्लाया जानकारी मुंकेगु व कार्यक्रमया बारे तयारी यायेगुलिइ हे ध्यान वनी । पत्रकार दबूया नायःया भाला लिपा भचा च्यूता बी मफयाच्वंगु सांगीतिक अभ्यासय् भचा ध्यान बीफत उकिं उकी नं ई फ्याना । मेगु साहित्य सृजनाय् नं ध्यान बिया । 

संगीत ख्यलय् सक्रियपिं, मन क्वसाःपिनिगु सांगीतिक सक्रियता आपालं खनेदत सामाजिक संजालय् । दक्वं स्वयाच्वना । स्वस्वँ नारायण गोपालया आजभोली हरेक साँझ छपु म्ये फेसबुक लाइफ याना । स्वकुमिपिनिगुपाखें हःपा जुइकथं प्रतिक्रिया वल । भ्यूज नं व हे ल्याखं अप्वःगुलिं मेगु छु याय् धकाः बिचाः यानाः च्वनाबलय् हनेबहःम्ह भूषणप्रसाद श्रेष्ठजुया “ओ कोरोना, अय् कोरोना” म्येग्वः दर्शनवीर शाक्यपाखें जिगु मेसेन्जरय् वःगु बांलाक ब्वना । कोरोनाया बारे बीमाःगु सन्देश झीगु थःगु भासं बीत उलि बांलागु म्येग्वःपाखें म्ये दयेकेगु नितिं कुतः याना । हिन्दी म्ये हे अपना दिल तो आवाराया लसय् थुगु म्ये हालाः,  अले पोष्ट याना । उकिया नं सेयर जूगु ल्याः व वःगु कमेन्टपाखें उत्साहित जुया, भूषणप्रसाद श्रेष्ठजु नं लय्ताया दीगु दु । थुकिया ट्रयाक नं युट्युबय् तयेधुनागु दु । मेगु छपु मतिनाया म्ये नं छ्वयाहयादीगु दु । इलं लाकाः व म्ये नं पोष्ट याये ।  

थ्व अति असामान्य अवस्था खः । कोरोना भाइरस संक्रमित जूगु मसीक मसीकं हे नं थःगु कारण मेम्ह संक्रमित जुइगु अवस्थाया बारे बिचाः यायेबलय् झी गुलि जोखिमय् दु धइगु प्रष्ट जू । थुगु अवस्थापाखें तापानाच्वनेगु खःसा लकडाउनया पालना झी सकलेंपाखें अतिकं समर्पणसाथ पालना यायेमा । अथे धयाः च्वँच्वं थः छम्ह संचारकर्मी जुयाच्वनागु नं लोमंके मफु । पत्रकार पासापिनिगु थ्व इलय्या जोखिमयात कयाः चिन्ता नं दु । हानं सकसिगु नितिं मदय्कं मगाःगु सुचं व बुखँ प्रवाहया जिम्मेवारीइ नं सक्रिय जुइत इनाप याये । छेँय् हे च्वनाः सुरक्षित जुयाः ज्या यायेत नं सकलसित इनाप याये । छेँय् च्वनाः जक जिम्मेवारी पूमवनीपिं सकलसिनं थःत सुरक्षित तयेगु सकतां उपाय यानादीत नं इनाप याये । थ्व इलय् छेँनं पिहां मवःसे, वयेबलय् नं तापाक च्वनेगु, माक्स, सेनिटाइजर, पन्जा, चस्मा, वसः सुरक्षित जुइकथं पुनेगु ज्या जक यानाः नं मगाः । झीगु नसात्वँसा, बिचाः बाय् मानसिक स्थिति, विहार, ब्यायाम सकतां नं उत्तिकं महत्वया खँ खः । झीगु शरीरय् कोरोनानाप ल्वायेगु क्षमता सदां दयाच्वनेमा, सकलसिगु भिंउसाँय्या कामना यानाच्वना । सार्वजनिक जूगु कोरोनाविरुद्ध चेतनाया म्येया निझ्वः न्ह्यथने । 

वासः दयके ... खोप लुइके,

मनय् शान्ति(जलं खयके !

न्यँ कोरोना ! – “मनू जिमि नां !”

थ्व जीवन त्याइ, बुइ मखु न्हां !

थ्व हे आत्मविश्वास सदां झीके दयेमा । सुभाय् । 

( वयकः लिसें जुगु खँ खँल्हाबल्हाँया लिधंसाय् , सुरजबीर बज्राचार्य नेवाः पत्रकार दबूया नायः  खः– स. )

Categorized in बिचा: