nepal investment baink

‘हाउस पुलिङ्ग’ हे यायेमाः

– ई. सूर्यभक्त साङ्गाछेँ

‘हाउस पुलिङ्ग’ दुनेया शहरया निंतिं दकलय् बांलाःगु विकल्प खः । हाउस पुलिङ्ग छु खः ? हाउस पुलिङ्ग व्यवस्थित शहरया निंतिं दैवी प्रकोपपाखें सुरक्षित जुइगु निंतिं आदिवासीत थःगु भूमि मत्वःतुसे थःगु हे थासय् च्वनाच्वनेगु निंतिं थःगु कला, संस्कृति म्वाका तयेगु निंतिं आर्थिक रुपं सम्पन्न जुइगु निंतिं आदि आदिया निंतिं खः ।
थुकथं हाउस पुलिङ्ग दुनेया शहरय् सम्भव दु ला ? थथे न्ह्यसः दुसा थुकिया निंतिं दकलय् न्हापा त्वाःया दाजुकिजापिं मिले जुइमाः । थः दाजुकिजापिं नाप मिले जुइमाः, थथे मिले जुइ फत धाःसा हाउस पुलिङ्ग सम्भव दु ।
हाउस पुलिङ्ग गुकथं जुइ ? दकलय् न्हापा ला हाउस पुलिङ्ग धइगु छेँ नं दयेब थःगु परम्पराकथं लँ नं दयेक व्यापार याये जिइक, भुखाय् ब्वःसां पिहाँ वये छिंक अले च्वने नं छिंकया नितिं यायेमाःगु खः । छगू आना जग्गा टुक्रा टुक्रा यानाः छगः धलिं अंशवण्डा काये च्वनेत मखु । मेता भुखाय् ब्वःसा सुरक्षित छेँ निर्माण यायेत नं खः हाउस पुलिङ्ग । थुकिया निंतिं छगू त्वाः, छगू बजाःया दाजुकिजापिं मिले जुयाः वल धाःसा धाथें छगू बांलाःगु व्यवसायी, सम्पदा, सुरक्षित व थः च्वने छिंगु त्वाः, चुक, बहाः दयेकेफु । आःतःभुखाय् लिपा थ्व बाहेक मेता विकल्प नं मदु तर थुकिया निंतिं झी मिले जुइमाः ।
हाउस पुलिङ्ग लिपा थुकिया अधिकार, च्वनेगु व्यवस्थाया न्ह्यसलय् न्हापा झीसं तजाःगु छेँया बिचाः याना । तर आः नेवाःतय्गु परम्पराकथं ब्याकथं ताःहाकयेक छेँ दनेगु खः, छ्यलि, मातं, च्वत व बइगः । अले थ्व प्यतँजाः छेँ छम्हस्यां मखु, प्यतजाः प्यम्हसित खः । थथे जुल धाःसा सकतां कथंया सुविधा झीत दइ । छम्हसित छगू स्वाहाने तयाः १२ तल्ला छेँ दनेगु आः मखुत ।
थ्व सम्भव दु । बन्दिपुर स्वयादिसँ, ‘मंकाः छेँ’ बजाः दु । ख्वप स्वयादिसँ जर्मन प्रोजेक्ट लिपाया त्वाः व सरसफाइ, गुथि येँ नं थःगु सम्पदा ल्यंका तयेगु खःसा सुरक्षित बसोबास, व्यवसाय, शहर दयेकेगु खःसा थ्व सम्भव दु । थुकिया निंतिं जिं केशव स्थापित मेयर जुयादीबलय् २३ वडाय् थ्व प्रोजेक्ट तयार यानागु खः । तर अनच्वंपिं मनूत लँ तब्या यायेत वल धकाः भ्रमय् लात । आः तःभुखाय् लिपा २३ वडाया स्थिति छु दु खनेदत । आःतःभुखाय् लिपा हाउस पुलिङ्ग १८ वडाय् यायेगु निंतिं सहलह जुयाच्वगु दु ।
हाउस पुलिङ्गया अर्थ खः छगू व्यवस्थित दुनेया शहर बस्ति गन सकतां कथंया सुरक्षित च्वने छिंगु अले व्यवस्थित शहर खः ।
हाउस पुलिङ्गया नमुना छगू त्वालय् येँय् यायेफत धाःसा येँ दुनेया मेथाय् मेथाय् नं याकनं जुइ । झी सकसिगुं कुतः थुकिया निंतिं जुइमाः थें च्वं ।
(वरिष्ठ इञ्जिनियर सूर्यभक्त साङ्गाछेँनाप जूगु खँल्हाबल्हाया लिधंसाय् – सं.)