kmc bidya

‘सीमाय् सेना छ्वयेमाः’ –पूर्वरक्षामन्त्री भिमसेनदास प्रधान

नेवा: अनलाइन न्युज – ललेन्द्र शाक्य | २०७७ जेठ ५, सोमबार १७:३९:५१

पूर्वरक्षामन्त्री तकं जुइधुंकूम्ह प्रमुख विपक्षी दल नेपाली कांग्रेसया सांसद भिमसेनदास प्रधानं सेनायात सीमाय् छ्वयेत सरकारयाके आग्रह याःगु दु ।

सांसद प्रधानं थौं सोमवाः प्रतिनिधिसभाय् नीति व कार्यक्रमयात कयाः जूगु सहलह ज्याझ्वलय् ब्वति कासें धाःगु दु, ‘वार्ता जुयाच्वनी । सेनायात सीमाय् छ्वयेमाः । थःगु सीमा रक्षा यायेगु दायित्व सरकारया खः । सीमा खाली त्वःतल धाःसा मिचेयाइपिन्सं मिचेतुं यानाच्वनी ।’

सेना छ्वयेगु नितिं तत्काल सुरक्षा परिषद् बैठक सःतेफइगु सांसद प्रधानं धाःगु दु ।

भुखाय् व खुसिबाः वइबलय् जक सुरक्षा परिषदया बैठक च्वनेगु याइगु धासें सांसद भिमसेनदास प्रधानं सरकारया ध्यानाकर्षण याकूगु दु । सांसद प्रधानं धाःगु दु, ‘झीथाय् खुसिबाः व भुखाय् लिपा जक सुरक्षा परिषदया बैठक च्वनीगु जुयाच्वंगु दु । तत्काल सुरक्षा परिषद बैठक सःताः सेनायात सीमा सुरक्षाय् छ्वयेमाः ।’

Categorized in राजनीति