Header Nepal rastra bank Adv

‘सिद्धान्तविहिन’ रविया यात्रा गुखे ?

नेवा: अनलाइन न्युज – ललेन्द्र शाक्य | २०७९ आषाढ ८, बुधबार ११:२१:४८

अझ अमेरिकाय् च्वनाच्वंम्ह थः कलाः व थः मचाखाचातय्त हाकुतिनाः आः रवि लामिछानें मेम्ह ब्याहा यायेधुंकल । थुकी बहुविवाहया खँ नं वइ । रवि लामिछानें मिसापिनिगु हक अधिकारय् छु न्वःवाइगु खः, व स्वये ल्यं हे दनि ।

रवि लामिछानें पशुपतिनाथया दर्शन यानाः पार्टी घोषणा याःबलय् चन्दन तिनातःगु खः । वं चुनाव चिं नं ‘गं’ घोषणा यात । तर, लामिछाने नेतृत्वया नेपाल स्वतन्त्र पार्टीया राजनीतिक सिद्धान्त छु खः व गन्तव्य छु खः स्पष्ट मदु । वं थःत न त हिन्दूवादी धायेफत न त राजसंस्थाया पक्षधर हे । न त वं थःत गणतन्त्रवादी मखु धायेफत । न त धर्म निरपेक्षया विरोधी खः धायेफत ।

लामिछाने अमूर्त तरिकां राष्ट्रिय सभागृहय् न्ह्यःने वःबलय् सर्वसाधारणं फयाच्वंगु पीडाया खँ ल्हात । शासन सत्तँय् दुपिनिगु विरोध यात । व्यवस्था मजूसे अवस्था हिलेत वयागु धाल । थुकिया अर्थ लामिछाने गणतन्त्र, धर्मनिरपेक्ष व संघीयतालिसेंया राजनीतिक व्यवस्थायात स्वीकार यायेगु कथं न्ह्यःने वःगु स्पष्ट जू ।

छुं नं राजनीतिक दलया जग सिद्धान्तय् दनाच्वंगु जुइ । सिद्धान्त व व्यवहारवादया निचाः घःचाःपाखें राजनीतिक रथ न्ह्याःवनी । तर, रवि लामिछाने छु सिद्धान्तपाखें निर्दिष्ट जुयाः दलयात न्ह्याकीगु खः ? स्पष्ट मजू । उकिं ला रविन्द्र मिश्रं थःपिन्सं पार्टी नीस्वंगु इलय् त्रुटी जूगु स्वीकार यासें रवि लामिछानेयात वहे गल्ती दोहोरे मयायेत सुझाब ब्यूगु खः । रविन्द्र मिश्रं पार्टी ला नीस्वन तर व छुं सिद्धान्तया जग म्हुयाः न्ह्यःने वंगु मखु । लिपा जक वं हिन्दू राष्ट्रया पक्षय् व गणतन्त्रया विरोधय् बहस न्ह्याकेत स्वल ।

नेपाःया मू राजनीतिक दलत छुं नं छुं सिद्धान्तया जगय् दनाच्वंगु दु । नेपाली कांग्रेसं समाजवाद, नेकपा एमालें जनताया बहुदलीय जनवाद, नेकपा माओवादी केन्द्रं माओवाद, नेकपा एकीकृत समाजवादी पार्टीं जनवादया आज्जु ज्वनाः समाजवाद, राष्ट्रिय प्रजातन्त्र पार्टीं राष्ट्रवादया सिद्धान्तपाखें जुजु लितहयेगु आज्जु काःगु दु । सिद्धान्तया जगय् दनाच्वंगु उगु दलतय्गु देय् न्यंकं संगठन नं दु । उकिं इपिं टिकेजुयाच्वंगु दु ।

रवि लामिछानें शहरी युवापिनिगु छुं पुचःयात आकर्षित यायेफूगु दु । तर, वया क्रेज देय् न्यंकं संचारकःमिया रुपं दयाच्वंगु दु न त राजनीतिक दलया नेताया रुपं । संचारकःमिपाखें नेताया रुपं रुपान्तरित जूबलय् वं उज्वःगु हे क्रेज टिकेयायेफइगु सम्भावना म्हो जक दु । लोकप्रिय जुइगु व मत कायेगुलि फरक दु । रवियात थन्थाय् लाक्क हे हाथ्या (चुनौती) दु ।

छुं गम्भीर न्ह्यसलय् रवि स्पष्ट जूगु खनेमदु । गुकी धर्म, संस्कृति, भाषा, लिपि, संघीयता, समावेशीता लिसेंया मुद्दात दु । देय् दुने दुहाँ वयाच्वंगु वाह्य सिद्धान्तयात टक्कर बिइगु सिद्धान्तया जगय् रवि दनेफइगु सम्भावना नं म्हो जक दु छाय् धाःसा रवि ताःई अमेरिकाय् च्वन । नेपाःया ध्वाँय् ज्वनाः नेपाली तपुली पूसां नं रवियाके अमेरिकी संस्कृतिया छाप उलि हे दु । थ्व न्ह्यसःया लिसःत आः मालेमाःगु अवस्था वःगु दु । रवियात थुकिया लिसः बिइत अःपु नं मजू ।

अझ अमेरिकाय् च्वनाच्वंम्ह थः कलाः व थः मचाखाचातय्त हाकुतिनाः आः रवि लामिछानें मेम्ह ब्याहा यायेधुंकल । थुकी बहुविवाहया खँ नं वइ । रवि लामिछानें मिसापिनिगु हक अधिकारय् छु न्वःवाइगु खः, व स्वये ल्यं हे दनि ।

Categorized in राजनीति