नेवा: अनलाइन न्युज – ललेन्द्र शाक्य | २०७९ चैत्र ३, शुक्रबार ०९:४०:२८

लोकंह्वाःम्ह नांजाःम्ह म्येहालामि नीशा देसारं सः बियादीगु म्यूजिक भिडियो “झिंखुदँ दत”या पितब्वज्या बिहिवाः छगू ज्याझ्वःया दथुइ जूगु दु ।

जेनेक्स मिडिया नेपालया न्ह्यब्वयाय् सुजन बज्राचार्य ख्वपय्या निर्देशनय् तयार जूगु ‘झिंखुदँ दत’ बोलया म्यूजिक भिडियोया प्रिमियर यलया एम्बियन्स रेष्टुरेन्टय् जूगु खः ।

निर्माता एवं म्येहालामि कृष्ण डंगोल व निशा देशारया सः दुथ्याःगु थुगु म्येय् म्येहालामि निम्ह नापनापं अतिकं लोकंह्वागु “सालुगु गाचा” म्येया मोडल मनोज महर्जन व नेरिशा महर्जनपिन्सं मोडल जुया म्हितातःगु दु । नारायण बहादुर महर्जनं लय् तयादीगु थ्व म्येया संगीत संयोजन सुमन कपालीं यानादीगु खः । म्ये मदुम्ह संचारकःमि विक्रम शाक्यं च्वयादीगु खः ।

बःचा हाकःगु अनौपचारिक ज्याझ्वः याना प्रिमियर याःगु म्यूजिक भिडियोया बिषयलय् वरिष्ठ सिने पत्रकार बिजयरत्न असंबरें कलाकार एवं प्राविधिकपिन्त दसिपौ लः ल्हानादीगु खः ।

ज्याझ्वलय् नुगःखँ तयेगु झ्वलय् नेपालभाषाया न्हांपाम्ह म्युजिक भिडियो निर्देशक बिजयरत्न असंबरें कृष्ण डंगोलया सांगितिक यात्रा न्ह्यानाच्वंगु बांलाः लिसें हरेक न्हूगु कुतलय् छुं नं छुं सुधार जुयाच्वने हे माः धकाः समीक्षा यानादिल ।

थ्प म्येया किपालुमि मोहनकुमार झिल्लु खःसा सम्पादन अनिल कुमार महर्जनं  यानादीगु खः ।

Categorized in कला