नेवा: अनलाइन न्युज – ललेन्द्र शाक्य | २०७९ चैत्र २, बिहिबार १०:४७:४५

राष्ट्रिय सहकारी महासंघं सहकारी संस्थाया ऋणी दुजःपिन्त इलय् हे ऋणया किस्ता व ब्याज भुक्तानी यायेत आह्वान याःगु दु ।

विज्ञप्ति सार्वजनिक यासें नेपाःया सहकारी अभियानया शीर्षस्थ निकाय राष्ट्रिय सहकारी महासंघं ऋणी दुजःपिन्त इलय् हे नियमित किस्ता व ब्याज भुक्तानी यानाः मेमेपिं दुजःपिनिगु बचत रकम लितबिइत सहज लकस दयेकाबिइत इनाप याःगु खः ।

लिपांगु इलय् छुं छुं सहकारीइ समस्या ब्वलनेधुंकाः सहकारीया वचतकर्तापिन्सं वचत रकम कायेगु यानाहःगु व तरलताय् हाथ्या खनेदूगु महासंघं जानकारी ब्यूगु दु ।

सहकारी संघसंस्थातसें वचत रकमया सामान्य कथं ८० प्रतिशततक दुजःपिन्त हे कर्जा प्रवाह याइगु जूगुलिं वचत लितकायेत सहज लकस दयेकेत ऋणी दुजःपिन्त ऋणया किस्ता पुलेत आह्वान याःगु खः ।

Categorized in बजाः