1142 nhoo dan adv

‘शोले’या रिमेक याःम्ह रामगोपालयात झिगू लख जरिवाना

२०७२ भाद्र १६, बुधबार ०८:१६:५२

भारतया अतिकं लोकंह्वाःगु संकिपा “शोले”या रिमेक याःगु द्वपनय् निर्देशक रामगोपाल बर्मां झिगू लख तका हर्जाना पुलेमाःगु जूगु दु ।
“रामगोपाल बर्माकी आग” नामं “शोले”या रिमेक याःगु पुष्टी जुइधुंकाः शोेलेया निर्माता रमेश सिप्पीया छेँजःयात बर्मां झिगू लख तका दां हर्जाना पुलेमाःगु जूगु खः ।
न्यायाधीश मनमोहन सिंहं ब्यूगु आदेशय् बर्मां प्रतिलिपी अधिकारसम्बन्धी कानूनया उलंघन याःगु न्ह्यथनातःगु दु । पुलांगु फिल्मया निर्माता व लेखकया अनुमति मकाःसे फरक नामं रिमेक याःम्ह बर्माया नैतिक आचरणय् तकं न्यायाधीशं न्ह्यसः तयादीगु खः ।
“रामगोपाल बर्माकी आग”या प्रचार हलंज्वलनय् थ्व पुलांगु शोलेया रिमेक हे खः धैगु क्यनेगु कुतः यानातःगु दु धकाः न्यायाधीशं धयादीगु दुसा “थुगु संकिपाया पटकथा, चरित्रपिं निसें कया संगीत व ब्याकग्राउण्ड म्यूजिक तकं पुलांगु शोलेया नक्कल यानातःगु दु । थुकी प्रतिलिपी अधिकार ऐन आकर्षित जुइ ।” धकाः न्यायाधीश सिंहं धयादीगु दु ।
निर्देशक रामगोपाल बर्माया संकिपा रिलिज न्ह्यः हे रमेश सीप्पी अदालतय् वंगु खः । न्हापां शोले नां तया हे संकिपा रिलिज यायेत्यंम्हं बर्मां लिपा नां हिला संकिपा रिलिज यायेत्यंगु खः ।