ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

‘वाह्य शक्तिया हस्तक्षेप अस्वीकार्य’ : न्याम्ह पुलांपिं प्रधानमन्त्री

नेवा: अनलाइन न्युज – ललेन्द्र शाक्य | २०७८ जेठ ३०, आइतबार १४:३९:४४

न्याम्ह पुलांपिं प्रधानमन्त्रीपिन्सं शनिवाः छगू मंकाः विज्ञप्ति सार्वजनिक यासें नेपाःया आन्तरिक राजनीतिइ वाह्य शक्तिया हस्तक्षेप स्वीकार्य मजुइगु धाःगु दु ।

शेरबहादुर देउवा, पुष्पकमल दाहाल प्रचण्ड, झलनाथ खनाल, माधवकुमार नेपाल व डा. बाबुराम भट्टराईपाखें सार्वजनिक याःगु विज्ञप्तिइ नेपाःया विषयस नेपाःमिपिन्सं हे निर्णय यायेमाःगु न्ह्यथसें नेपालय् संवैधानिक व्यवस्थायात निरंकुश हमला जुयाच्वंगु धारणा प्वंकातःगु दु ।

विज्ञप्तिइ न्याम्ह पुलांपिं प्रधानमन्त्रीपिन्सं संवैधानिक व्यवस्था, कानूनी राज्य व लोकतन्त्रया आधारभूत सिद्धान्त व मूल्ययात जुयाच्वंगु निरंकुश हमलाविरुद्ध ऐक्यबद्धता प्वंकेत पुलांपिं प्रधानमन्त्रीपिन्सं जनता, नागरिक समाज व लोकतन्त्रवादी शक्तिपिन्त अपिल याःगु दु ।

पुलांपिं प्रधानमन्त्रीपिन्सं वंगु पुष महिनाय् प्रतिनिधिसभा विघटन याःम्ह प्रधानमन्त्री केपी शर्मा ओलीया ज्या असंवैधानिक धकाः सर्वोच्च अदालतं ठहर याःगु अवस्थाय् हाकनं निक्वःगुखुसि प्रतिनिधिसभा विघटन यानाः प्रधानमन्त्रीं थःत निरंकुश, स्वेच्छाचारी व प्रतिगमनकारी चरित्र ब्वःगु द्वपं ब्यूगु दु ।

‘काम चलाऊ सरकार’या प्रधानमन्त्रीइ परिणत जुइधुंकूगु अवस्थाय् सरकारं अध्यादेशपाखें बजेट घोषणा यायेगु, सरकारया नीति व ज्याझ्वः प्रधानमन्त्रीं वाचन यानाः सार्वजनिक यायेगु, संविधानसभापाखें जारी नेपाःया संविधान संशोधन यायेत धकाः राष्ट्रिय सहमति मयाःसे अतिकं संवेदनशील विषयस स्वेच्छाचारी कथं कार्यदल नीस्वनेगु, मन्त्रिपरिषदया लाक्वपाक्व कथं तःक्वःमछि विस्तार यायेगु ज्या अलोकतान्त्रिक जूगु विज्ञप्तिइ न्ह्यथनातःगु दु ।

नेपाल समाचार पत्र न्हिपौपाखें

Categorized in पत्रपत्रिका