Newa Ekata Diwas Gosthi Adv

‘लकडाउन पालना यायेगु बाहेक मेगु उपाय नं मदुनि’ –साउण्ड प्राविधिक राजकृष्ण श्रेष्ठ

नेवा: अनलाइन न्युज – विजयरत्न | २०७७ बैशाख २३, मंगलबार १२:०४:१८

स्वीन्यादँ न्ह्यःनिसें नेपाःया संकिपा ख्यलय् साउण्ड रेकर्डिङ्गया ख्यलय् ज्या यानाः वयाच्वंम्ह छम्ह पुलांम्ह साउण्ड ज्याकःमि राजकृष्ण श्रेष्ठयात थ्व ख्यःया छगः धिसिलाःगु थां धकाः धायेमाः । संकिपा ख्यलय् छ्यलाबुलाय् वइगु साउण्डया सकतां ज्याय् ल्हाःज्वःम्ह राजकृष्ण श्रेष्ठं आःतकया दुने निसःत्यासिबें अप्वः संकिपाया साउण्ड ख्यलय् ज्या यानादीधुंकल ।

प्रेयसी, देउकी, तृष्णा, विद्रोह, वीर गणेशमान, क्रोध निसें कया थगुनेया बैना, कमाण्डर व थुगुसीया आकाशे खेती तकया संकिपा यात्राय् आपालं सिरपाः त्याकादीधुंकुम्ह नांजाःम्ह साउण्ड प्राविधिक राजकृष्ण श्रेष्ठं त्याकूगु सिरपाःय् विशेष याना तृष्णा संकिपाया निंतिं शिखर फिल्म अवार्ड २०४९, क्रोध संकिपाया निंतिं नेफ्टा फिल्म अवार्ड २०६४, जय शिव शंकर संकिपाया निंतिं केटिभि नेफ्टा फिल्म अवार्ड २०६६ लगायतया नां न्ह्यःने वइसा चीनया तसकं लोकंह्वाःगु टिभि सिरियल जर्नी टु दि वेस्टया नेपाली भर्सनया डबिङ्ग व मिक्सिङ्ग राजकृष्ण श्रेष्ठं हे यानादीगु खः ।

चिनियाँ भाषाया उगु जर्नी टु द वेस्ट नांयागु सिरियल चीनय् स्वीन्यादँ पीदँ न्ह्यः पिहाँ वःगु खःसा उगु इलंनिसें आःतक थीथी टिभिइ लिसालिसा कयाः क्यनाः वयाच्वंगु दुसा नेपालय् नं इन्जिनियस टेलिभिजन व नेपालमण्डल टेलिभिजनय् आः नं क्यनाः वयाच्वंगु दु ।

नेपालमण्डल टेलिभिजनय् ला थ्व नापं स्वक्वःगुखुसि लिसा कयाः क्यनाच्वंगु दु ।

बौद्ध ग्रन्थ त्रिपिटक मालेत चीनं भारत जुयाः नेपाःतक थ्यंकूम्ह चिनियाँ बौद्ध विद्धान ह्वेनसाङ्गया यात्राया बाखंयात दन्त्यकथाया रुप बियाः दयेकातःगु थ्व सिरियलया नेपाली भर्सन नं तसकं लोकंह्वाःगु खः ।

थथे थःगु ख्यलय् तसकं ल्हाः ज्वःम्ह साउण्ड प्राविधिक राजकृष्ण श्रेष्ठं नकतिनि हे जक मेगु छगू चिनियाँ टेलिसिरियल द लिजेण्ड अफ ब्रुसलीया नं नेपाली भर्सनया ज्या क्वचायेकादीगु दुसा थ्व लकडाउनया कारणं थुकिया प्रसारणया खँ दिनाच्वंगु दु ।

चीनं उच्च शिक्षा हासिल यानावःपिं नेपाःमिपिनिगु संगठन अरनिको समाजया कुतलय् नेपाली भर्सनया ज्या जुयाच्वंगु खःसा थ्व ज्याय् छुं दिं न्ह्यः चीनया वुहानय् कोरोनाया महामारी फैलेजुउगु कारणं भतिचा सुलं काःगु खःसा आः वया थन नेपालय् नं कोरोना भाइरसया संक्रमण अप्वयाः वःगुलिं उगु संक्रमणपाखें सुरक्षित जुयाच्वनेगु निंतिं सरकारं लकडाउनया आदेश जारी यानातःगुलिं थुकिया प्रसारणया क्वःछी मफयाच्वंगु खँ उगु द लिजेण्ड अफ ब्रुसलीया नेपाली भर्सनया ज्या यानादीम्ह साउण्ड प्राविधिक राजकृष्णं कनादिल ।

न्ह्याब्लें ल्हाः मदिक्क ज्या यानाः च्वनीम्ह नांजाःम्ह  साउण्ड प्राविधिक राजकृष्ण श्रेष्ठया थौंकन्हे लकडाउनया कारणं यानाः ल्हाः थप्प हे दिनाच्वंगु दु ।

लकडाउनय् वने न्ह्यः नेपाःया छम्ह ननस्टप फिल्म मेकरमध्ये लाःम्ह उदय सुब्बाया आकाशे खेती नांयागु नेपाली संकिपाया डबिङ्ग व मिक्सिङ्गया ज्या यानाः च्वनादीगु खः तर कोरोना संक्रमणया खँ व लकडाउनया कारणं ज्या दित ।

न्ह्याब्लें ज्या यानाच्वंगु बानी दुम्ह वयकःयात थथे छुं मयाःसे सुम्क च्वनाः च्वनेमालाः भतिचा म्हाइपुयाच्वंगु दु । तर कोरोना संक्रमणया संक्रमणपाखें सुरक्षित जुइगु निंतिं झीके मेगु विकल्प नं मदु धकाः वयकलं धयादिल ।

“झीगु देसय् जक मखु संसारय् न्यंक्कभनं हे थ्व संक्रमणं दुःख बियाच्वंगु दु । अले संसारय् दक्वः थासय् लकडाउनया आदेश जारी यानातःगु दु । उकिं जि नं थ्व लकडाउनया आदेश पालना यानाच्वना । थ्व आदेश जारी जुउगु लःत्या (४५दिन) दइन । जिंला छेँया लुखाखलुतक हे हाचां मगाया । छेँययात माःगु किराना हलज्वलं व तरकारी जिमि तिरिमय्जुं न्याना हइ । व अथें पिने पसः वना दुहाँ वइबले साब्वं लखं ल्हाः सिलेगु निसें कया सेनिटाइजर बुलेगु याइ । न्ह्यागुसां छु याये । नयेत्वने नं माल । थः नं सुरक्षित जुयाः च्वनेमाल ।” धकाः थःगु विचाः प्वंकादीम्ह वरिष्ठ साउण्ड प्राविधिक राजकृष्ण श्रेष्ठं आःयात लकडाउनया आदेश पालना यायेगु हे सकसिया निंतिं बाँलाःगु उपाय खः धकाः धयादिल ।

Categorized in कला