nepal life 2076 3 18

‘रेष्टुरेन्टय् भ्याट चिइकेमाः’ व्यवसायी

नेवा: अनलाइन न्युज – ललेन्द्र शाक्य | २०७८ श्रावण ८, शुक्रबार १५:०६:३४

रेष्टुरेन्ट व्यवसायीपिन्सं नसाज्वलंया कच्चा पदार्थय् पूर्णरुपं स्वदेशी उत्पादन व कृषि उपज छ्यलाबुला यायेगु धासें रेष्टुरेन्टय् सरकारं काइगु भ्याट तकं चिइकेत माग याःगु दु । अर्थमन्त्री जनार्दन शर्मालिसे नापलासें व्यवसायीपिन्सं थुज्वःगु माग याःगु खः ।

थ्व व्यवस्थां उपभोक्तापिनिगु दथुइ नसाज्वलंया मू सर्वसुलभ जुइगु व थुकिं कृषि उपज तकं खपत अप्वयेकीगु व्यवसायीपिनिगु तर्क दु । वहे हुनिं रेष्टुरेन्टय् शून्य भ्याटया माग व्यवसायीपिन्सं अर्थमन्त्रीयाके याःगु दु । इमिसं मौद्रिक नीतिइ हे थुज्वःगु व्यवस्थाया माग तकं याःगु दु ।

मौद्रिक नीतिइ रेष्टुरेन्ट व बार क्षेत्रया मजदुर कर्मचारीया जिविकोपार्जनया नितिं कम्ती नं ३ लखतकया सहुलियत ब्याजदरय् घरायसी कर्जा उपलब्ध याकेत तकं व्यवसायीपिन्सं माग याःगु दु । 

कोरोना लिपा धरासायी जूगु पर्यटन क्षेत्र बचेयायेत बैंकतसें याइगु लगानीया निश्चित प्रतिशत पर्यटनय् हे जुइमाःगु कथं लगानीया लकस दयेकेत तकं माग याःगु दु ।

‘बैंकया कर्मचारीपिन्त नं भ्रमण विदा’

अथेहे आन्तरिक पर्यटन प्रवर्द्धन यासें पर्यटन व्यवसाय जिवित यायेत नेपाल सरकारं थें हे वित्तीय संस्थाय् तकं अनिवार्य भ्रमण विदा कायम यायेत इमिसं सरकारया ध्यानाकर्षण याकूगु दु ।

चालु आर्थिक दँया बजेटय् सरकारं सरकारी कर्मचारीया नितिं झिन्हु भ्रमण विदा बिइगु घोषणा याःगु दु । थ्व काज विदा जुइ ।

थ्व व्यवस्थाया लसकुस यासें रेष्टुरेन्ट एण्ड बार एसोसिएसन नेपालं वित्तीय संस्थाय् तकं थथेहे व्यवस्था यायेत माग याःगु खः । वित्तीय संस्थां कम्ती नं ५० हजार तका दांतक खर्च यायेगु कथं आन्तरिक भ्रमणय् छ्वयेगु व्यवस्था यायेत व्यवसायीपिन्सं माग याःगु दु ।

थुकिं कर्मचारीं मुलुक चाःहिलेदइगु, होटल रेष्टुरेन्ट व्यवसायीपिन्त करया दायराय् कःघायेत सहज जुइगु, मुलुकया दां विदेशय् मवनीगु व कोभिडपाखें अति प्रभावित आतिथ्य सेवायात छुं मात्राय् जूसां नं राहत जुइगु व्यवसायीपिनिगु धापू दु । 

 

Categorized in बजाः