coved ad

‘राजनीति व्यापारीया कब्जाय् लानाच्वंगु दु’ : नैनसिंह महर

नेवा: अनलाइन न्युज – ललेन्द्र शाक्य | २०७८ पौष २८, बुधबार ११:१५:२३

नेपाली कांग्रेसया केन्द्रीय दुजः नैनसिंह महरं ललिता निवास प्रकरणय् प्रहरीया अनुसन्धान प्रतिवेदन सरकारी वकिलं लितछ्वःगु गैरजिम्मेवार ज्या जूगु धाःगु दु ।

नेता महरं धाःगु दु, ‘धात्थें धायेगु खःसा राजनीति व व्यापारया फरक छुतेमजुल । राजनीति व्यापारीया कब्जाय् दु । नीतिगत भ्रष्टाचार व्यापक दु । नीतिइ हे धावा बिइगु चरित्र राजनीतिइ दु ।’

महरं हाकनं धाःगु दु, ‘ललिता निवास प्रकरणय् प्रहरीया अनुसन्धान प्रतिवेदन सरकारी वकिलं लितछ्वःगु गैरजिम्मेवार ज्या खः । थुकिं सकल नागरिकपिंके एनसेल प्रकरणयाथें खिन्नता ब्वलंगु दु । झीसं धाराया लः जक स्वयां मजिल, मुहान नं स्वयेमाल ।’

सुशासनया नितिं नागरिक निगरानी माःगु नेता महरं ध्वाथुइकूगु दु । महरं धाःगु दु, ‘अख्तियार दुरुपयोग अनुसन्धान आयोगया हे पदाधिकारीपिन्त जघन्य द्वपं लाःगु दु । न्याय व्यवस्था भताभुंग जूगु दु । छगू करोड बजेटय् १५ लखया नं ज्या जुइमखु । न्ह्याथाय् स्वःसां चुवाट हे चुहावट दु । सुशासनया नितिं नागरिक निगरानी माः । सार्वजनिक ओहदाय् च्वनाच्वंपिं व्यक्तिया आयस्रोत मालेगु ई वःगु दु ।’

Categorized in राजनीति