1142 nhoo dan adv

‘म्यान भर्सेस वाइल्ड’ स्वयाः म्वाःपिं न्याँ–की नइम्ह मनू !

२०७२ श्रावण १४, बिहिबार ०८:५५:५६

पश्चिम बंगालया छम्ह मनुखं डिस्कभरी च्यानलं वइगु ‘म्यान भर्सेस वाइल्ड’ टिभी शोपाखें ‘प्रेरणा’ कयाः म्वाःपिं न्याँ व की नयेगु यानाहल ।

२५ दँया राजकुमार दास नांयाम्ह थुम्ह मनुखं उगु टिभी शोपाखें थःगु नयेगु–त्वनेगु बानि हे हीकेवं आपालं मनूतय् ध्यान थःपाखे साःगु दु ।

वयात ‘म्यान भर्सेस वाइल्ड’ तसकं यःगु टिभी शो जुयाच्वन । उगु शोलय् साहसी बियर ग्रिल्स पृथ्वीया दुर्गम थासय् वनीबलय् अन म्वायेगु निंतिं म्वाःपिं सर्प, म्हालयकाय्चा, माकःचा, की लिसें सीपिं जनावरया ला नयाः थःगु यात्रा न्ह्याकी ।

राजकुमारया कथं ६–७ दँया उमेरंनिसें बियर ग्रिल्सयात म्वाःपिं जन्तु व की नःगु स्वयाच्वनागु व थम्हं नं उकथं हे नयेगु बिचाः वःगु खः । न्हापांखुसिइ तसकं थाकुसां लिपा जूलिसे म्वाःपिं न्याँ व की नयेबलय् मजा वःगु राजकुमारं धाःगु दु । राजकुमारं आःया न्हिच्छियंकं हे च्याकः–झिकःतक की व म्वाःपिं न्याँ नयेगु यानाच्वंगु दु ।

राजकुमारया कथं थःगु नयेगु त्वनेगु थुगु ‘असाधारण’ बानियात स्वयाः जीविकोपार्जनया नं न्हूगु लँपु चालीगु आशा दु ।