zero media family planning adv

‘मचाखाचात मन्त, तर जिगु काल मवः’

२०७३ कार्तिक ४, बिहिबार १५:१३:५७

जाजरकोटया भेरीमालिका नगरपालिका–६ या भीमा वली आः १२० दँय् च्वनाच्वंगु दु । थःम्हं बुइकूपिं १२ म्ह काय्–म्ह्याय्मध्ये ९ म्ह काय्–म्ह्याय्पि सीधुंकल । तर भीमा वली धाःसा आःतकनं म्वाना हे च्वंगु दु ।

१२० दँया भीमा वलीं आःतकनं थःम्हं छुयातःगु कःनि व सियातःगु मुस्या नयेफूगु खँ कनादीगु दु । मिखां मखंम्ह व न्हाय्पं मताःम्ह वलीयात न्वःवायेत धाःसा छुं समस्या खनेमदु ।

६ म्ह काय् व ६ म्ह तःकेहेँ म्ह्याय्पिन्त जन्म ब्यूम्ह वलीं थःम्हं कालयात नं त्याकेधुनागु धयादी । लिपांगु १२ क्वःम्ह सन्तानया रुपं कान्छाम्ह काय् टीकाराम वलीयात २०१६ सालय् जन्म ब्यूगु वय्कलं जानकारी बियादिल ।

जा नयेबलय् थःत ककुइ थाइगु धयादीम्ह भीमा वलीं कःनिया मरी दुरुइ फ्वयाः नये अःपूगु खँ कनादी । प्रायः मेमेगु नसापाखें थःत ख्वाउँइगु धयादीम्ह १२० दँया वलीयात च्या धाःसा न्हियान्हिथं त्वने हे माःगु धयादी ।

न्हिथं जा नयेबलय् धौ, दुरु नं नयाच्वंम्ह वलीं चाउचाउ नयेत नं थःत अतिकं यःगु धयादीम्ह वलीं नापलाः वइबलय् सकसित उज्वःगु उपहार ज्वनाः वयेत सल्लाह बियादी ।

छगू शताव्दीसिबें अप्वः उमेर थ्यंम्ह वलीं थःम्हं जन्म बियापिं १२ म्ह सन्तानमध्ये आः निम्ह काय् व छम्ह म्ह्याय् जक म्वानाच्वंगु दनिगु जानकारी बियादिल । म्वानाच्वंपिं मध्ये काय् हरिबहादुर वली व टीकाराम वली खःसा म्ह्याय् ओइली खत्री खः ।

मेमेपिं ९ म्ह तःकेहेँ व दाजुकिजापिं थ्वसिबें न्ह्यः हे सीधुंकल । बि.सं. २०५२ सालय् नेपाली नागरिकताया प्रमाणपत्र दयेकूम्ह वलीं नेपाल सरकारपाखें बिइगु ज्येष्ठ नागरिक भत्तां थःम्हं फिइगु वसः व नयेत चिनी, च्यापति न्यायेगुलिं खर्च यायेगु खँ कनादिल ।

वय्कःया जन्म बि.सं. १९५२–५३ सालपाखे जूसां नं नागरिकता दयेकूबलय् बि.सं. १९७५ साल च्वयातःगु वय्कलं धयादिल ।