ad prabhu

‘भारत जक मखु, लिपुलेक विवादय् चीनया नं ल्हाः दु’ –प्रचण्ड

नेवा: अनलाइन न्युज – ललेन्द्र शाक्य | २०७७ बैशाख २९, सोमबार ०७:३६:३०

नेकपा नायः प्रचण्डं सीमा विवादया विषय आः हे अन्तर्राष्ट्रिय अदालतय् यंकेगु विषयस धाःसा छक्वः सोचेयायेमाःगु धाःगु दु ।

नेपाल कम्युनिष्ट पार्टी (नेकपा)या नायः लिसें पुलांम्ह प्रधानमन्त्री पुष्पकमल दाहाल प्रचण्डं लिपुलेकया सीमा विवादय् चीन नं दुथ्याःगु धाःगु दु ।

प्रतिनिधिसभाया राज्य व्यवस्था व सुशासन समितिया बैठकय् प्रचण्डं नेपाः व भारतदथुइ लिम्पियाधुरा दूगु सीमा विवाद आः भारतलिसे जक सहलह यानाः समाधान मजुइगु धाःगु दु ।

प्रचण्डं धाःगु दु, “सुगौली सन्धि कथं लिम्पियाधुरा कालीनदीया मुहान खः । कालीनदीया फुक्क पूर्व नेपाल खः, पश्चिम भारत खः धैगु खँ स्पष्ट यासें थ्व समस्या समाधानया नितिं राजनीतिक कूटनीतिक हल यायेमाः गुगु धाःगु खः । लिपुलेक प्रकरणलिपा थ्व त्रिदेशीयथें जूवंगु दु । थ्व निगू देशं जक हल यानाः नं आः मछिंगु परिस्थितिइ लाःगु दु । अन चीन नं संलग्न जूगु दु, भारत चीनया सम्झौता सहमति जूगु जूगुलिं ।”

भारत व चीनदथुइ लिपुलेक जुयाः ब्यापार विस्तार यायेगु विषयस २०७२ सालय् समझदारी जूगु खः ।

भारतं नेपाली भूमि कःघानाः नक्सा सार्वजनिक यायेधुंकाः वंगु दँ हे याःगु सर्वदलीय व सर्वपक्षीय बैठकं राष्ट्रिय सहमतिया लकस निर्माण याःगु धासें प्रचण्डं थ्व बेठकं प्रधानमन्त्रीयात तःधंगु तागत ब्यूगु जूसां नं ठोस रुपं पहल जुइमफूगु धाःगु दु ।

सीमा मिचेजूगु विषयस नेपालं भारतयात आः हे पौ छ्वयेगु उचित धासें प्रचण्डं पौ जक छ्वयां मगाःगु धारणा तःगु दु ।

प्रचण्डं धाःगु दु, “उगु लेटर नीतिगत रुपं, सैद्धान्तिक रुपं, भावनात्मक रुपं नं ठिक हे जू । उगु लेटरय् गुगु ओरेन्टेसन बियातःगु दु व बेठीक मजू । तर लेटर जक हे ठीक जुयां मज्यू । व एक्सन नं ठीक जुइमाल धैगु माननीय सदस्यपिनिगु भावना विल्कुल सही हे जू ।”

नेकपा नायः प्रचण्डं सीमा विवादया विषय आः हे अन्तर्राष्ट्रिय अदालतय् यंकेगु विषयस धाःसा छक्वः सोचेयायेमाःगु धाःगु दु ।

कालापानीइ भारतीय सेना थ्यंमथ्यं ६०–६५ दँ न्ह्यःनिसें हे च्वनाः च्वंसां नं थ्व समस्या समाधानया नितिं छाय् विगतनिसें हे पहल जुइमफुत धैगु विषयस विश्लेषण जुइमाःगु प्रचण्डं धाःगु दु । थुगु विषयस पंचायतया पालंनिसें आःतकया सरकारं तकं छु यात धैगु नं समीक्षा जुइमाःगु प्रचण्डया धापू दु ।

Categorized in राजनीति