Header Nepal rastra bank Adv

‘ब्राण्डेड मेयर’ स्थापित व ‘विरासतया मेयर’ उम्मेदवार सिंहदथुइ तःधंगु धेंधेंबल्ला

नेवा: अनलाइन न्युज – NISCHAL | २०७९ बैशाख २२, बिहिबार १३:५७:२९

वइगु बैशाख ३० गते जुइगु स्थानीय तह चुनावय् सकलसिगु मिखा येँ महानगरय् केन्द्रीत जुयाच्वंगु दु । येँ महानगरया मेयर पदय् नेपाली कांग्रेसपाखें सिर्जना श्रेष्ठ व नेकपा एमालेपाखें केशव स्थापित उम्मेदवार जुइवं देय् न्यंकं हे थुगु चुनावया लिच्वः गुज्वःगु जुइ धैगु उत्सुकता ब्वलंगु दु ।

नेकपा एमालेपाखें २०५४ सालया स्थानीय निर्वाचनय् अत्याधिक बहुमतं मेयर पदय् विजयी जूम्ह केशव स्थापितयात उम्मेदवार दयेकेवं थ्व चुनाव कांग्रेसया नितिं तःधंगु हाथ्या जुइगु अनुमान सकलसिन याःगु खः । स्थापित वाककलाया शक्ति दुम्ह लिसें २०५४ सालय् येँ दुने थीथी विकास निर्माणया ज्या याःम्ह जूगुलिं उगु इलंनिसें हे मेयर पदय् मदुसां मेगु गुगु नं पार्टीइ दुहाँ वनाः दलबदल याःसां प्रदेशय् मन्त्री जूसां येँया जनतां मेयर कथं अप्वः लुमंकातःगुलिं केशव स्थापितयात ‘ब्राण्डेड मेयर’ कथं नं कायेगु याः ।

एमालें थुकथंया राजनीतिक अध्ययन लिपा केशव स्थापितयात उम्मेदवारी ब्यूगु खनेदु । तर, नेपाली कांग्रेसं सर्वमान्य नेता गणेशमान सिंहया भौ कांग्रेसया नांजाःम्ह नेता प्रकाशमान सिंहया जहान सिर्जना सिंहयात उम्मेदवारी बिइवं स्थापित व सिंहया दथुइ तःधंगु धेंधेंबल्ला जुइगु निश्चित जुइधुंकूगु दु ।

गणेशमानया भौथें जाःम्ह सिर्जनाया उम्मेदवारी धैगु राजनीतिक ‘विरासतया उम्मेदवार’ कथं कायेगु यानाः वयाच्वंगु दु । मेखे, मेयर पदय् मिसा उम्मेदवार जूगु हुनिं स्वभाविक रुपं येँया मिसापिनिगु आकर्षण उम्मेदवार सिर्जना जूगु दु । कांग्रेसया केन्द्रीय नेतानिसें स्थानीय नेता व वडास्तरीय नेता कार्यकर्तातक थ्व इलय् सिर्जनायात त्याकेगु नितिं छप्पं जुयाः पलाः न्ह्याकाच्वंगु दुसा सिर्जनाया नितिं अनुकूलता धैगु थीथी राजनीतिक पार्टीया गठबन्धन भोट सुरक्षित जूगुलिं खनेदु ।

थुगु चुनावय् एमाले पार्टी येँय् न्हापालिपाथें चुनावया लहर थ्यंक हयेफूगु स्थिति मदुसा स्थापितया उम्मेदवारीं यानाः न्हूकथंया लहर ब्वलनाच्वंगु दु ।

अथेहे, कांग्रेस येँय् दुने राजनीतिक रुपं एमालेसिबें छुं भच्चा ल्यूने लाःसां सिर्जनाया उम्मेदवारीं कांग्रेसया चुनावी लहर थ्व इलय् आपालं ब्वलनाच्वंगु दु ।

येँया मतदातापिन्सं आः हे थ्वहे उम्मेदवार त्याइ धकाः धायेमफुसां तःधंगु धेंधेंबल्ला जुइगु अनुमान यानाहःगु दु ।

Categorized in बिचा: