coved ad

‘बैशाख न्ह्यः हे खोनाया विवाद सल्टे जुइमाः’ –सेना

नेवा: अनलाइन न्युज – ललेन्द्र शाक्य | २०७८ पौष २९, बिहिबार १२:३०:०८

नेपाली सेनां स्वदँया दुने निर्माण क्वचायेकेगु खःसा येँ–तराई मधेश द्रुतमार्ग आयोजनाया फुक्क कथंया विवाद व उल्झन वइगु बैशाख न्ह्यः सल्टे यायेमाःगु धाःगु दु । राष्ट्रियसभाया प्रत्यायोजित व्यवस्थापन व सरकारी आश्वासन समितिइ द्रुतमार्ग आयोजनाया प्रमुख सहायक रथी विकास पोखरेलं खोनातकया हे सतक तकं कःघानाः ९,१० व ११ नम्बरया स्वंगू प्याकेजया ठेक्का बैशाखतक आह्वान यायेगु क्वचायेकेमाःगु धाःगु दु ।

द्रुतमार्ग, बाहिरी चक्रपथ व मातातीर्थ–ख्वप १३२ केभी प्रसारण लाइन लिसेंया आयोजनात खोना जुयाः दयेकेगु तयारी जुइधुंकाः स्थानीयबासीं विकासया नामय् सांस्कृतिक सहरयात अतिक्रमण याःगु धासें विरोध प्वंकाः वयाच्वंगु दु । इमिसं मुआब्जा तकं काःगु मदुनि ।

आः नं खोनाया मुआब्जा विवाद क्वमचाःसा ११ नम्बर प्याकेजया टेन्डर यायेमफइगु प्रमुख सहायक रथी विकास पोखरेलया धापू दु । खोनाया प्रस्थानविन्दुया ‘एलाइग्नमेन्ट’ हिलेबलय् थ्वसिबें न्ह्यःया ४ सय रोपनीलिसें थप १६५ रोपनी जग्गा अधिग्रहण यायेमालीगु अवस्था दु ।

आयोजना प्रमुख पोखरेलं धाःगु दु, ‘खोनाय् द्रुतमार्ग हयेगु खःसा स्मार्ट सिटी, प्रसारण लाइन, बागमती करिडोर, बाहिरी चक्रपथ आयोजना संचालन मजुइगु सुनिश्चित यायेगु कथं च्वया हे बिइत स्थानीयं माग याःगु दु । जिमिसं थ्व ज्या यायेफइमखु, योजना आयोगय् थुगु विषययात तयागु दु ।’

११ गू प्याकेजमध्ये प्यंगू प्याकेजय् ठेक्का लायेधुंकूगु व ठेकेदार परिचालनया तयारी जुयाच्वंगु पोखरेलं धाःगु दु । सुरुङमार्ग निर्माणया नितिं डिजाइन क्वचायेकाः रिभ्यू जुयाच्वंगु व छुं दिं दुने स्वीकृत यानाः ठेकेदारयात फिल्डय् छ्वयेगु आयोजनाया धापू दु । मेगु निगू प्याकेजत ठेक्का बिइत मूल्यांकनया लिपांगु चरणय् दूगु सेनां धाःगु दु ।

थ्व दँ आयोजनाया ९ अर्ब थप बजेट माग यानागु धासें सेनां उकिया नितिं अर्थमन्त्रालयं ग्वाहालि याइगु विश्वास प्वंकूगु दु । आःया खुलाया दुने गुलि ज्या जुइ धैगु आधारय् बजेट माग याःगु सेनाया धापू दु । मेगु दँया नितिं ५०–५५ अर्बया स्रोत सुनिश्चित यायेमाःगु सेनां धाःगु दु ।

आयोजना प्रमुख पोखरेलं गुलिखे थासय् न्हापां वातावरणीय अध्ययन मजूगु क्षेत्रय् नं सतकया नितिं जग्गा आवश्यक खनेदूगुलिं अध्ययन मजूसां नं ज्या याकेबिइगु कथं लँपु चायेकेमाःगु माग याःगु दु । मू कथं वातावरणीय अध्ययन जूगु थासय् सिमा पालेमदइगु जूगुलिं समस्या जूगु दु ।

भौतिक पूर्वाधार मन्त्रालयस न्यागू कथंया ग्वाहालि माग याःगु सेनां धाःगु दु । पोखरेलं धाःगु दु, ‘प्रस्थानविन्दुयात आर्क ब्रिजतक हयाः स्वायेगु, सिस्नेरीपाखें सतकय् छुटेजुइगु विन्दु (बाइफर्केसन) दयेकेगु, निगू सिग्नेचर (कलात्मक) तां (पुल) दयेकेगु, बुदुनेपाखें फुर्केचौरतक मदन भण्डारी राजमार्ग स्वाइगु कथंया निगू लेनया सतक दयेकेगु व मदन भण्डारी राजमार्गया क्रसिङयात व्यवस्थित यायेगु ज्याया नितिं भौतिक योजना मन्त्रालयया सहमति आवश्यक जू ।’

Categorized in राजनीति