Arin Enterprises

‘बागू सेकेण्डं’ हे सिटी स्क्यान यायेगु मेसिन नेपालय् थ्यन

नेवा: अनलाइन न्युज – ललेन्द्र शाक्य | २०७९ कार्तिक २५, शुक्रबार १३:०८:५१

नेपालय् ‘बागू सेकेण्डं’ हे सिटी स्क्यान यायेज्यूगु मेसिन दुहाँ वःगु दु । महाराजगञ्जय् च्वंगु त्रिवि शिक्षण अस्पताल मनमोहन कार्डियोथोरासिक भास्कुलर व ट्रान्सप्लान्ट सेन्टरं ‘बागू सेकेण्डं’ हे सिटी स्क्यान यायेज्यूगु सिटी स्क्यान यायेगु मेसिन हःगु खः ।

अस्पतालया कार्यकारी निर्देशक प्रा.डा. उत्तमकृष्ण श्रेष्ठं ‘बागू सेकेण्ड’ दुने हे सिटी स्क्यान यायेज्यूगु मेसिन नेपालय् हे थुगु अस्पतालं जक हयेत ताःलाःगु दाबी याःगु दु ।

कार्यकारी निर्देशक डा. श्रेष्ठं उगु मेसिन ल्वगिया नितिं आपालं फाइदाजनक जूगु धाःगु दु । वया कथं थुगु अस्पतालं नेपालय् हे न्हापांगुखुसि कार्डियो भास्कुलर हाइब्रिड थिएटर नं हःगु दु ।

वं कार्डियो भास्कुलर हाइब्रिड थिएटर अतिक. गुणस्तरीय जूगु धासें उगु अपरेशन थिएटर नेपालय् न्हापांगुखुसि हयेफूगु धाःगु दु । मेमेगु सरकारी व नीजि अस्पतालय् उगु अपरेशन थिएटर मदूगु वया धापू दु ।

डा. श्रेष्ठं नुगःचु (मुटु)या अपरेशन व क्याथ ल्याब उपचार छक्वलं यायेफइगु अत्याधुनिक उपकरण ‘कार्डियो भास्कुलर हाइब्रिड थिएटर’या नितिं नेपालं भारतय् वनाः १५–२० लख तका खर्च यानाः वयाच्वंगु धासें नेपालय् भारतय् सिबें दंगु भावय् उगु सेवा बिइगु धाःगु दु ।

डा. श्रेष्ठं कार्डियो भास्कुलर शाइब्रिड थिएटरपाखें लच्छिया दुने २५ म्ह ल्वगिपिन्सं सेवा कयाः वयाच्वंगु जानकारी नं ब्यूगु दु ।

गोरखापत्र न्हिपौपाखें

Categorized in पत्रपत्रिका