nepal investment baink

‘फागुन १ गते जनयुद्ध दिवस न्यायेकाः तुं त्वःते’ : ओली व देउवायात प्रचण्डया च्यालेञ्ज

नेवा: अनलाइन न्युज – ललेन्द्र शाक्य | ने.सं. ११४४ सिल्लाथ्व तृतीया

प्रधानमन्त्री पुष्पकमल दाहाल प्रचण्डं सत्ता गठबन्धनबारे पार्टी बैठकय् ब्रिफिङ याःगु दु ।

आइतवाःनिसें येँया राष्ट्रिय सभागृहय् न्ह्याःगु बैठकय् प्रधानमन्त्री व नेकपा माओवादी केन्द्रया नायः तकं जुयाच्वंम्ह प्रचण्डं पार्टी बैठकय् ल्ह्वंगु थीथी विषयस लिसः ब्यूगु खः ।

थौं सोमवाःया बैठकय् प्रचण्डं सरकारया काम कारवाहीनिसें सत्ता गठबन्धनया भविष्यबारे नं सहलह याःगु खः । स्रोतया कथं थौं सोमवाःया बैठकय् प्रधानमन्त्री प्रचण्डं सत्ता साझेदार दल नेपाली कांग्रेसं सरकारयात सोचेयानाथें ग्वाहालि मयाःगु धासें असन्तुष्टि प्वंकूगु खः ।

प्रधानमन्त्री प्रचण्डं कांग्रेसपाखें तःक्वःमछि धोका जूगु धासें थुकिया बारे गम्भीर समीक्षा यायेगु नं प्रतिबद्धता प्वंकूगु अन दुम्ह छम्ह नेतां जानकारी ब्यूगु दु । वया कथं प्रधानमन्त्री प्रचण्डं फागुन १ गते मंगलवाः जनयुद्ध दिवस नं तःजिक न्यायेकेगु न्ह्यथंसें वहे कथं तयारी यायेत नेता व कार्यकर्तापिन्त निर्देशन ब्यूगु दु ।

प्रचण्डया हे नेतृत्वय् झिदँतक नेपालय् जनयुद्ध जूगु खः । वंगु दँ सरकारं फागुन १ गते जनयुद्ध न्ह्याःगु दिंया लुमन्तिइ सार्वजनिक बिदा बिइगु निर्णय याःगु खः । उगु इलय् सरकारय् दूगु दल नेकपा एमाले व प्रतिपक्षीइ दूगु नेपाली कांग्रेसं नं मौन समर्थन याःगु खः । तर, ईया झ्वलय् सत्ता गठबन्धनय् थांक्वाहाँ जुइधुंकाः प्रतिपक्षीइ लाःवंगु नेकपा एमालें जनयुद्धया सार्वजनिक बिदा खारेज यायेत माग यासें वयाच्वंगु खःसा सरकारय् हे दूगु नेपाली कांग्रेसं नं द्वैद्ध चरित्र क्यंगु माओवादीया धापू दु ।

नेपाली कांग्रेसया संस्थापन पक्ष जनयुद्धया बिदालिसें छुं नरम भाव खनेदुसां नं संस्थापन इतरपक्ष खुलस्त जुया हे विरोधय् क्वाहाँ वःगु दु । गुकियात बल गाइगु कथं पार्टी सभापति शेरबहादुर देउवां मौनता क्यनेधुंकाः प्रधानमन्त्री प्रचण्ड असन्तुष्ट जूगु दु ।

सरकारय् च्वनेगु निसें पिहाँ वनेगु तकं विरोध प्वंकेधुंकाः सर्वोच्च अदालतय् रिट दायर जूगु खः । उगु रिटयात सुनुवाई यासें सर्वोच्चया न्यायाधीशपिं आनन्दमोहन भट्टराई व महेश शर्मा पौड्यालया मंकाः इजलासं जनयुद्ध खँग्वःयात संविधानं मस्यूगु धासें निर्णय खारेज यानाब्यूगु खः ।

सर्वोच्चया फैसलां सशंकित जूम्ह प्रचण्डं अदालतया सम्मान यासें देउवा व ओलीयात च्यालेञ्ज बियाः फागुन १ गते जनयुद्ध दिवस तःजिक न्यायेकेगु निर्णयस थ्यंगु स्रोतया दाबी दु ।

पार्टी बैठकय् प्रचण्डया धापू उदृत यासें स्रोतं धाःगु दु, ‘अदालतया सम्मान याये । फागुन १ गते जनयुद्ध दिवस नं न्यायेकेगु जुइ ।’

Categorized in राजनीति