banijya bank 2

‘प्रधानमन्त्रीं चीनलिसे चुच्चे नक्साबारे खँ ल्हायेमाः’ – कांग्रेस नेता गोपालमान श्रेष्ठ

नेवा: अनलाइन न्युज | २०८० भाद्र २९, शुक्रबार १०:४८:२६

नेपाली कांग्रेसया थकालीम्ह नेता गोपालमान श्रेष्ठं पुष्पकमल दाहाल प्रचण्ड नेतृत्वया सरकारपाखें पिहाँवनेगु सोच मतयागु धाःगु दु ।

थकालीम्ह नेता श्रेष्ठं धाःगु दु, ‘बालकृष्ण खाँणया खँ पुलां जुल । जिं सरकार पूर्वाग्रही जुल धयागु मदु । शेखर कोइरालां धाःगु खःसा कोइरालायाके हे न्यनादिसँ । कांग्रेस सरकारपाखें पिहाँ वने चायहेजूगु खँ जिं मस्यू । गठबन्धनय् खँमिलेमजुइकं सरकार गुकथं न्ह्याइ ? सरकार न्ह्यःने वनेमा धैगु जिगु चाहना । पार्टीया नं वहे चाहना खः धैगु जितः ताः । आःतक गठबन्धनय् विग्रह खनेदूगु मदु । भविष्यया खँ ला छु धायेफु ले ?’

शान्ति प्रक्रिया सुरु जूगु १५–१६ दँ पुलेधुंकूगुलिं थुकियात दलत दथुइ सहलह यानाः तार्किक निष्कर्षय् थ्यंकेमाःगु नं नेता श्रेष्ठं ध्वाथुइकूगु दु । लिसें ववं प्रधानमन्त्री पुष्पकमल दाहाल प्रचण्डया चीन भ्रमणया झ्वलय् नेपाःया चुच्चे नक्सा थःपिनिगु नक्साय् कःमघाःगु बारे खँल्हाबल यायेमाःगु ध्वाथुइकूगु दु ।

नेता श्रेष्ठं धाःगु दु, ‘चुच्चे नक्साबारे झीसं अन्तर्राष्ट्रिय जगतयात सिइके बिइमाःगु खः । इलय् हे सिइके मबिल धैगु खँ वःगु दु । झीसं चीन व भारत निगुलिं देय्यात लसता पिज्वयेकाः ग्वाहालि व समर्थन कायेमाःगु अवस्था वःगु दु ।’

कांग्रेस नेता  श्रेष्ठं चिनियाँ राजदूत छन् सोङया अभिव्यक्ति भिंकेमाःगु जिकिर नं याःगु दु । श्रेष्ठं धाःगु दु, ‘भारतया राजूतं नेपाः व चीनया सम्बन्धय् टिप्पणी यायेगु, चीनया राजदूतं नेपाः व भारतया सम्बन्धय् टिप्पणी यायेगु खँ वइमखु । राजदूतं अथे न्वःवायेमज्यू । उकियात वयकलं भिंकाः दी धैगु ताःगु दु ।’

लिसें श्रेष्ठं प्रधानमन्त्री प्रचण्डयात मुलुकया हितय् ज्या यानाः वयेत सुझाब ब्यूगु दु ।

नेकपा एमालेया न्वकू सुवास नेम्वाङया निधनं सहमति, सहकार्य व एकताया नितिं अपरिहार्य व्यक्ति गुमेयायेमाःगु नं नेता श्रेष्ठं धाःगु दु ।

Categorized in राजनीति