2565 buddha Jayanti ADV

‘प्रतिनिधिसभा पुनःस्थापना जुइफूगु’ खनाः ओलीया ध्यान संसदया अंकगणितय् केन्द्रीत

नेवा: अनलाइन न्युज – ललेन्द्र शाक्य | २०७८ जेठ २६, बुधबार १६:१५:१९

प्रधानमन्त्री केपी शर्मा ओलीया ध्यान अझ नं संसदया अंकगणितय् केन्द्रीत जूगु दु । ओलीं मन्त्रिमण्डल पुनःगठनय् विघटित प्रतिनिधिसभाय् सांसद मजूपिं सुयात नं नियुक्त मयात । प्रतिनिधिसभा विघटनया सिफारिस यानाः चुनावया घोषणा तकं जुइधुंकाः नं ओलीया ध्यान छाय् संसदीय अंकगणितय् हाकनं वन ? च्यूताःया विषय जूगु दु ।

विश्वस्त स्रोतया कथं बालुवाटारं प्रतिनिधिसभा पुनःस्थापना जुइगु सम्भावना खंगु दु । संविधानया धारा ७६ या उपधारा ३ कथं प्रधानमन्त्री जूम्ह ओलीं उपधारा ४ या छ्यलाबुला मयाःसे तप्यंक ५ या नितिं लुखा चायेकूगु तर्क याःगु खः । उपधारा ४ कथं वं ३० न्हु दुने विश्वासया मत कायेमाःगु खः ।

विश्वासया मत मकाःसे राजीनामा नं मब्यूसे ओलीं धारा ५ या लुखा चायेका धाःगु खः । थ्वहे त्रुटी जूगु बरिष्ठ अधिवक्ता महादेव यादवं थौं बुधवाः सर्वोच्च अदालतया संवैधानिक इजलासया बसहया झ्वलय् न्वःवाःगु दु । थ्वसिबें न्ह्यःया नजिरयात स्वःसां नं संविधानया धारा ७६ या उपधारा २ कथं प्रधानमन्त्री जूम्ह ओलीं तप्यंक ५ पुसय् प्रतिनिधिसभा विघटन याःबलय् असंवैधानिक ठहर जूगु खः । थुगु खुसि नं धारा ४ य् मवंसे ५ य् न्ह्यःने वंगुलिं त्रुटी खनेदूगु दु ।

प्रतिनिधिसभा पुनःस्थापनया सम्भावना खनाः हे ओलीं नं संसदीय अंकगणितय् हाकनं ध्यान केन्द्रीत याःगु दु । जनता समाजवादी पार्टीया महन्थ ठाकुर पक्षया १० म्हेसित मन्त्री याःबलय् फुक्क विघटित प्रतिनिधिसभाया सांसदपिं हे जूगु दु । मन्त्री जुइगु दौडय् सांसद मजूपिं नं दु । तर, ओलीं नियुक्ति बिइ मानेमजुल ।

नेकपा एमालेपाखें नं सांसद मजूपिं मन्ह्यन । सांसद मजूगुलिं हे सर्वोच्च अदालतया आदेशपाखें ७ म्ह पूर्वमाओवादी मन्त्री आउट जुइमाःगु खः । इमिसं प्रतिनिधिसभा विघटन लिपा पुनःगठन जूगु मन्त्रिमण्डलय् थाय् काये मखन । थुकिया ल्यूने नं ओलीया संसदीय अंकगणितया ध्यान मू कारण खनेदूगु दु ।

ओलीं थःविरुद्ध जूपिं २३ म्ह एमाले सांसदपिन्त नं कारवाहरु याःगु मदुनि । बरु वं उगु पुचःया फयांफतले फुक्कसित थःगु पक्षय् लितहयेगु मखुसा कम्ती नं बच्छियात हयेगु रणनीति तकं दयेकूगु दु । थ्वहे हुनिं मन्त्रिमण्डलय् ६ गू मन्त्रालय थःम्हं हे काःगु दु । उगु मन्त्रालय माधव नेपाल पक्षया विघटित प्रतिनिधिसभाया सांसदपिनिन्त थःपाखे सालेगु आज्जुं तकं तःगु माधव नेपाल पक्षयापिन्त थुइकूगु दु ।

प्रतिनिधिसभा पुनःस्थापना जूसा देउवाया पक्षय् बहुमत खाके मबिइत १३ म्ह सांसद सालेमाःगु बाध्यता ओलीयात वयेफु । उकिया नितिं ओलीं मन्त्री पदयात छ्यलेफइगु सम्भावना खनेदूगु दु । जसपाया सुं सुं सांसद व एमालेया माधव नेपाल पक्षीय सांसदपिन्त नं सालेगु रणनीति ओली पक्षयाके खनेदु ।

विघटित प्रतिनिधिसभाया २६७ म्ह सांसदमध्ये विपक्षी गठबन्धनय् १४६ म्ह खनेदूगु दु । बहुमतया नितिं २३४ म्ह आवश्यक जू । देउवायाके बहुमतसिबें १२ म्ह सांसद अप्वः दु । व म्हो यायेत ओली पुचः आः खने हे दयेत्यंगु दु ।उकिं ओलीं ६ बुँदे एकता प्रस्तावय् देउवायात प्रधानमन्त्री यायेत याःगु ल्हाःचिं लितकायेमाःगु शर्त तःगु खः । प्रतिनिधिसभा विघटन जुइधुंकूगु अवस्थाय् व ल्हाःचिंया छाय् अर्थ दत ? थुकिया ल्यूने प्रतिनिधिसभा पुनःस्थापनाया सम्भावना हे मू कारण खः ।

ओलीं प्रतिनिधिसभा पुनःस्थापना लिपा नं विपक्षीयात बहुमत खाके मबिइगु कथं योजनाबद्ध तरिकां राजनीतिक गोटीत आःनिसें हे सनेधुंकूगु दु । थुकी ओलीं बाजी मारेयाइ कि मयाइ ? प्रतिनिधिसभा पुनःस्थापना जु हे जुल धाःसा वधुंकाःया अवस्थां क्वःछी ।

Categorized in राजनीति