prabhu baink new

‘प्रकाशक व पत्रकारपिनिगु स्वापूया नितिं मिडिया सोसाइटी’

नेपाःया पुलांम्ह पत्रकारमध्ये छम्ह पत्रकार खः – पुष्करलाल श्रेष्ठ । नेपालय् न्हापांगु मनोरञ्जनात्मक चलचित्र पत्रिका ‘कामना’पाखें पत्रकारिता ख्यलय् दुहाँ झाःम्ह पत्रकार भाजु पुष्करलाल श्रेष्ठ थौंकन्हय् नेपाःया राष्ट्रिय न्हिपौ नेपाल समाचारपत्रया प्रधान सम्पादक खः ।
भाजु श्रेष्ठ छुं दिं न्ह्यःजक जूगु नेपाल मिडिया सोसाइटीया चुनावय् नायः पदय् निर्वाचित जुयादीगु दु । वय्कः नेपाःया पत्रकारिता इतिहासय् हे नां च्वनीगु कथं पत्रकारिता ख्यलय् संर्घष यानादीधुंकूम्ह व्यक्ति खः । वय्कःया पत्रकारिता संघर्षया इतिहासयात कयाः वय्कःया अनुभव दुथ्याःगु ‘कलम’ नांया सफू नं पिदने धुंकूगु दु । गुगु सफू पत्रकारित ख्यलय् नां जाः ।
नेवाः अनलाइनन्यूजपाखें वय्कःलिसे यानागु बःचाहाकंगु खँल्हाबल्हा थन न्ह्यब्वयाच्वना ।

– नेपाल मिडिया सोसाइटीया नायः पदय् निर्वाचित जुयादीगुलिं दकले न्हापा भिंतुना देछाया च्वना । पुष्कर दाईया आः न्हूगु योजना छु दु ?

छिकपिं सकसित नं भिंतुना दु । सकसियां ग्वाहालि याःगुलिं हे सोसाइटीया नायः पदय् च्वनाः ज्या यायेखंगु खः ।उकिं हाकनं छक्वः जितः प्रत्यक्षरुपं ग्वाहालि याःपिं अले सुभेच्छुकपिन्त दुनुगलंनिसें भिंतुना देछाया च्वना । न्हूगु योजनाया खँय् तत्काल हे थ्वहे धकाः दयेकागु मदुनि । निर्वाचित जुइधुंकाः उद्योग वाणिज्य महासंघ, चेम्बर अफ कमर्श, नेवाः पत्रकार दबू अथेहे थीथी संघसंस्थां भिंतुना देछायेगु ज्या यानाच्वंगुलिं आःया नितिं जि थुकी हे व्यस्त जुयाच्वंगु दु ।

–थ्व संस्थाया उद्देश्य छु खः ?

थ्व संस्था नीस्वनेगु नितिं सन् २००२, अथे धैगु झिंस्वदँ न्ह्यः जिं हे परिकल्पना यानाः नीस्वनागु खः । उकिं थ्व संस्थाया संस्थापक नायः नं जि हे खः ।थुगु ल्याखं धायेगु खःसा मिडिया सोसाइटीया मू उद्देश्य धैगु नेपाःया संचार ख्यलय् लगानी याइपिन्त सुरक्षित यायेगु, प्रकाशक व श्रमजीवि पत्रकारतय्गु दथुया सम्बन्ध बांलाकाः तयेगु नितिं हे खः । प्रकाशक, लगानीकर्ता सुरक्षित मजुल धाःसा श्रमजीवि पत्रकारत नं सुरक्षित जुइमखु । लिसें नेपाःया संचार ख्यःया विकासया नितिं थ्व निगुलिं शक्तियात सन्तुलन यानाः न्ह्याकेमाः । थ्वहे मू उद्देश्य सोसाइटीया खः ।

–थुगु सोसाइटीया दुजःपिं गुलि दु ?

दुजःया ल्याखं कान्तिपुर टेलिभिजन व कान्तिपुर न्हिपौलिसें गुलि नं राष्ट्रिय न्हिपौ दु, उकिया प्रकाशकपिं अले राष्ट्रिय टेलिभिजनया लगानीकर्तापिं थुगु सोसाइटीया दुजःपिं खः । थथे दुजः जुयाच्वंपिं श्रमजीवि पत्रकारपिनिगु रक्षा व नेपाःया संचार ख्यः बांलाःयेमा, लगानीकर्तात सुरक्षित जूसा जक श्रमजीवि पत्रकार सुरक्षित जुइगु भावनां दुजः जुयाच्वंगु खः । थुकी सुं नं संचार संस्थाया प्रकाशकपिं दुजः जुयादीफु ।
–आःया राजनीतिक स्थितिइ संचार ख्यःया तःधंगु भूमिका दु, उकिं मिडिया सोसाइटीपाखें गुकथंया भूमिका म्हितादी त्यनागु खः ?
देय्या स्थिति बांलाः मजू, थ्व खँ झी सकसिनं स्यू । उकिं संचार ख्यःपाखें थ्व इलय् जिम्मेवारीपूर्वक देय् व जनताया नितिं संचार सम्प्रेषण यायेमाःगु मित्रराष्ट्र देय्नाप सन्तुलन जुइगु समाचारत सम्प्रेषण यायेमाःगु दु । थ्वहे खँयात गम्भीर जुयाः मिडिया सोसाइटीं आःया राजनीतिक समस्यायात कयाः समाधानया लँपुइ यंकेगु नितिं ज्याखँ यायेगुपाखे सोसाइटी दुने सहलह यानाः ज्याझ्वःत पितबिइगुपाखे बिचाः यानाच्वनागु दु । तर, छुं ई जिं न्हाचः नं धायेधुन, भिंतुना कालबिल ज्याझ्वःया व्यस्तताय् लानाच्वंगुलिं थ्व ज्याझ्वः क्वचायेवं हे सोसाइटीपाखें थःगु ज्याझ्वः न्ह्यःने हयेगु जुइ ।

–दकले लिपा, नेवाः अनलाइनन्यूजपाखें थ्व अनलाइनया ब्वमिपिन्त छुं सन्देश दु कि ?

पत्रकारिता ख्यः धैगु अतिकं हे जिम्मेवारीया लिसें समर्पणया भावनां ज्या यायेमाःगु ख्यः खः । जिं कामना प्रकाशन नीस्वनाः आःतक निरन्तररुपं पत्रकारिता यानाः वयाच्वनागु दु । थः छम्ह येँया नेवाः जूगु ल्याखं थःपिनिगु प्रकाशन नेपाल समाचारपत्रय् स्थानीय समाचारया लिसेलिसें नेवाःतय्गु थीथी गतिविधिया समाचार सम्प्रेषण यानाच्वनागु दु । लिसें नेपाल संवत् न्हूदँया विशेषांक ल्याः नं दकले न्हापां नेपाल समाचारपत्रं हे पिथनागु खः । व ल्याखं नं छिक्पिं सकसिगुपाखें कामना प्रकाशनं यानावयाच्वनागु पत्रकारितायात ग्वाहालि, हःपाः बियाः थुगु संस्था लिपाथ्यंकं धस्वाकाः तयेगु नितिं ग्वाहालि यानादी धकाः भलसा कयाच्वना । लिसें नेवाः अनलाइनन्यूज नेवाःतय्गु भाषा, बुखँ व देय्न्यंकंया बुखँ, च्वखँ नेवाः भासं बियाः यानावयाच्वंगु ज्याखँयात जिं दुनुगलंनिसें भिंतुनालिसें न्हियांन्हिथं प्रगति जुइमा धकाः कामना याये ।