prabhu baink new

‘नेवाः आन्दोलनयात ज्यापु दिवसं हःपाः बिइ’

– तीर्थमान महर्जन

नायः, श्री अशोक विनायक गुथि, मरुत्वाः
कजि, झिंनिक्वःगु राष्ट्रिय ज्यापु दिवस

थुगुसीया यःमरिपुन्ही खुन्हु राष्ट्रिय ज्यापु दिवस न्ह्याकेगु भाला कजि खलःकथं श्री अशोक विनायक गुथि, मरुत्वाःपाखें काःगु दु । थुगु खलःया नायः तीर्थमान

महर्जनं झिंनिक्वःगु राष्ट्रिय ज्यापु दिवसया कजिया भाला क्वबियादीगु दु । वय्कःलिसे ज्यापु दिवसया जःखःच्वनाः यानागु खँल्हाबल्हा थन न्ह्यब्वयाच्वना ।

झिंनिक्वःगु राष्ट्रिय ज्यापु दिवसया पाःब्वः कयादीगु दु । छिकपिनि त्वाः खलःपाखें थुगु दिवसयात न्हापा न्हापा स्वयां अझ झःझः धायेक क्वचायेके फयेमा धकाः भिंतुना च्वना ।

यक्व यक्व सुभाय् ।

ज्यापु दिवसया पाःब्व कायेगु सोच गुकथं विकास जुल ?

ज्यापु दिवस सुथां लाकेगु निंतिं दँय्दसं ब्वति कया वयाच्वनागु खः । न्हापांनिसें नेवाःतय् दथुइ एकता व नेवाः नखः, सांस्कृतिक, संरक्षण यायेमाः धैगु विचाः दयाः थुगुसीया झिंनिक्वःगु राष्ट्रिय ज्यापु दिवस तःजिक हनेगु, पाःब्व कायेगु बिचाः विकास जुल ।

ज्यापु दिवसयात ताःलाकेगु निंतिं छिकपिनिपाखें छु छु ज्याझ्वःत न्ह्याका दियागु दु ?

थुगु मरुत्वाःपाखें झिंनिक्वःगु ज्यापु दिवस हनेत राष्ट्रिय ज्यापु दिवस समारोह समिति ११३६ नीस्वना नापं कचा कवः गठन यानाः थीथी ज्या क्वःछिना वनागु जुल । वंगु मंसिर १९ गते ६३ त्वाः खलःया नायः, गुरु, कजि व मेमेपिं नाप सहलह ब्याकाः मंसिर २६ गते साइकल ¥याली वा पौष ४ गते सु कु न्दा ¥याली न्ह्याकाः प्रचारकथं याये धुनागु दु ।

ज्यापु दिवस झःझः धायेक हनेगु निंतिं छिकपिनिपाखें छु गुज्वःगु तयारी यानाच्वना दियागु दु ?

ज्यापु दिवस तःजिक हनेत मरु त्वाःया दुजःपिं, ज्यापु संस्कृति विकास कोष, ६३ त्वाः व थीथी खलःपु चःपाखें ग्वाहालि कयाः थाय्थासय् ब्यानर, झलर तयाः सफा यानाः तयारी यानाच्वनागु दु ।

थुगुसी तःभुखाचं यानाः येँलिसें नेपाःया जनजीवन हे अस्तव्यस्त जुयाच्वंगु दुसा मेखे मधेशय् न्ह्यानाच्वंगु आन्दोलनया हुनिं नं स्थिति सहज मजू । थुज्वःगु इलय् ज्यापु दिवसयात गुकथं न्ह्याकेमाः धइगु छिकपिनि बिचाः दु ?

खय्तला थुगुसीया तःभुखाचं जनजीवन सुथां मलाःनि, उकिसनं तराई आन्दोलनं यानाः झन् अस्तव्यस्त जुयाच्वंगु दु । अथेजूसां थुगुसिइ पाःब्व कायेगु बचं बियागु खँ पूवंकेगु कथं पाःब्व कया । झी नेवाःत झीगु दिवस हनेत पंगः नाप लिचिले मखु धैगु क्यनेमाः । थुगु असहज परिस्थितिइ नं झिंनिक्वःगु राष्ट्रिय ज्यापु दिवस सकसिगुं ग्वाहालिं झःझः धायेक हनेफइ धैगु मनंतुनाच्वना ।

ज्यापु दिवसपाखें नेवाःतय्गु एकता व नेवाःतय्सं न्ह्याकावयाच्वंगु आन्दोलनयात गुकथं तिबः जुइगु खंकादिया ?

नेवाः एकता व नेवाः आन्दोलनयात थ्व ज्यापु दिवसं हःपाः बिइकथं सकारात्मक तिबः जुइ ।

ज्यापु दिवसया लसताय् छिकपिनिपाखें दिवस धुंकाः नं छुं ज्याझ्वः यायेगु मनसुवा तयाच्वना दियागु दु कि ? दुसा गुज्वःगुज्वःगु ज्याझ्वःत यायेगु तातुना दु ?

थ्व ज्यापु दिवस धुंकाः नं दच्छिया दुने थुगु मरुत्वाःपाखें थीथी सामाजिक व सांस्कृतिक ज्या यायेगु बिचाः दु । हिदान, स्वास्थ्य शिविर, तीर्थयात्रा, सांस्कृतिक ज्याझ्वः नापं मेमेगु नं छिकपिनिगु ग्वाहालिं पूवंके फइ धइगु भलसा काये ।

ज्यापु दिवस न्ह्याकेगु निंतिं थीथी ज्याझ्वःत न्ह्याकावयाच्वनादीगु दु । थुकिया निंतिं आर्थिक व्यवस्थापन गुकथं यानादिया ?

थुगु दिवस हनेगु निंतिं मरुत्वाः खलःया जः, ६३ त्वाःया खलःपुचः व थीथी संघसंस्थापाखें नं ग्वाहालि कथं आर्थिक संकलन जुयाच्वंगु दु ।

थुगु नेवाः अनलाइनन्यूजपाखें छिकपिन्सं धायेमाःगु छुं खँ दु कि ?

नेवाः अनलाइनन्यूजया स्वकूमि व ब्वमिपिन्त मरुत्वाःया झिंनिक्वःगु राष्ट्रिय ज्यापु दिवसया लसताय् भिंतुना । नापं थ्व दिवस सकल नेवाःतय्गु खः धैगु भाःपियाः तिबः बियादिसँ, नेवाः छवाः जुइगु सल्लाह नं बियादिसँ । हाकनं छकः झीगु देसय् लानाच्वंगुे असहज परिस्थिति याकनं चिला वनाः देसय् भिं जुइमा धैगु नं कामना याये ।