prabhu baink new

‘नेपाल संवतया सम्मान याये फयेमाः’

नायः, डा. महेशमान श्रेष्ठ

हनेबहःम्ह नेवाः न्ह्यलुवाः डा. महेशमान श्रेष्ठ थुुगुसी नेपाल संवत् राष्ट्रिय न्हूदँ समारोह समिति ११३६ या नायः जुयादीगु दु । नायः जूगु दिंनिसें वय्कः न्हूदँया थीथी ज्याझ्वलय् सक्रियरुपं ब्वति कयाः वयाच्वंगु दु ।
न्हूदँ तःजिक हनेगु नितिं समितिया मुज्याया लिसें थःगु स्वास्थ्यकःमि ज्या नं न्ह्याकाच्वंगु दु । वय्कःलिसे नेवाः अनलाइनन्यूजं न्हूदँ ज्याझ्वःयात कयाः यानागु बःचा हाकःगु खँल्हाबल्हा न्ह्यब्वया च्वना ।

स्वास्थ्यकःमि जुया नं न्हूदँया थीथी ज्याझ्वलय् ब्वति कयाः च्वनादीगु दु । गुलितक व्यस्त छि ?

सुथय् थःगु हे क्लिनिक क्षेत्रपाटीइ वनेगु यानाच्वनागु दु । पेशागत कथं स्वास्थ्यकःमि जुयागु हुनिं पासापिन्त १२ ता ईलिपा जक ज्याझ्वः तःसा ज्यू धकाः इनाप याना । तर, मवंसे हे मगाःगु मुज्या वल धाःसा छुं ई क्लिनिक त्वःताः नं वनाच्वनागु दु ।

नायः जुयाः गुज्वःगु अनुभूति यानादियागु दु ?

नेवाः अधिकारया नितिं न्हापांनिसें हे मुज्या ज्याझ्वलय् वनाच्वनागु जूगुलिं उज्वःगु छुं न्हूकथंया अनुभूति ला मजू, तर न्हूदँया आन्दोलनयात न्ह्याकेगु नितिं विशेषरुपं गुगु कथं ज्याझ्वःत तयेमाली थ्वबारे विचाः चाहिँ यानाच्वनागु दु । हाकनं न्हूदँ कछलाथ्व पारुया दिं कन्हय् तःजिगु सभा व सांस्कृतिक ¥याली जुइगु जूगुलिं थ्व ज्याझ्वःयात तःजिक क्वचायेकेगु नितिं नं सहलह समितिया मुज्या च्वनेगु ज्या जुयाच्वंगु दु । मू ज्याझ्वः कन्हय् खः, उकिं सकलसित उगु ज्याझ्वलय् ब्वति कायेत इनाप याना ।

समारोह समितिपाखें फुक्क तयारी क्वचाःगु खःला ?

समारोह समिति टीमवर्क कथं न्ह्यानाच्वंगु जूगुलिं थुगु समितिपाखें अतिकं बांलाक्क ज्याखँत जुयाच्वंगु दु । थीथी समितिया दुजःपिन्सं थःथःगु भालाकथं ज्या याःगुलिं तयारी ज्या सकतां क्वचाःगु दु ।

न्हूदँया लसताय् छिगुपाखें सकल नेपाःमिपिन्त छु कथंया भिंतुना देछानादी ?

दकले न्हापां ला, सकल नेपाःमिपिं सुस्वास्थलिसें भिं जुइमाः धकाः भिंतुना देछाये । थ्वयां लिपा नेपालय् आदिवासी जनजातिपिनिगु अधिकार न्हूगु संविधानं सुनिश्चित याये फयेमाः, नेपाल संवतयात राज्यं राष्ट्रिय संवत धकाः घोषणा यायेधुंकाः थुकियात सम्मान यायेफयेमाः, नेपाःया विकास जुइफयेमाः धकाः भिंतुना देछाये ।