zero media family planning adv

‘जेठ २५ या दुने कर पु, मपूसा ब्याज व जरिवाना’ –नेपाल सरकार

नेवा: अनलाइन न्युज – ललेन्द्र शाक्य | २०७७ जेठ २०, मंगलबार १२:००:१८

“जिमिसं निला (२ महिना) ई बिया, आः नं कर उठेमयात धाःसा हिसाब किताब मिलेयायेत थाकुइ । थ्व महामारी गुलितक जुइ मस्यू, जूगु कारोबार व आम्दानीया कर आः क्वःछ्यूगु मितिइ बुझे हे यायेमाः । मखुसा नियम कथं तुइगु ब्याज व जरिवाना कायेगु जुइ ।”

सरकारं लकडाउनया हे दथुइ उद्योगी व व्यवसायीपिन्त क्वःछ्यूगु ई दुने आर्थिक दँया तेस्रो त्रैमासिकया कर भुक्तानी यायेत ताकेता यानाहःगु दु । सरकारं सार्वजनिक सुचं हे पिथनाः लिपांगुखुसि कर पुलेत ब्यूगु म्याद दुने कर पुलेत दबाब ब्यूगु दु ।

लकडाउन जुइधुंकाः सरकारं चैत्र व बैशाख महिनाय् अधिकांश करया भुक्तानी यायेगु समयावधि २५ जेठतकया नितिं थप याःगु खः । १४ बैशाखया मन्त्रिपरिषद बैठकं बैशाख २५ गतेतकया कर पुलेगु ई लच्छि थप यायेगु निर्णय याःगु खः ।

तर, लिपांगुखुसि लकडउान ताःहाकः यासें जेठ ३१ गतेतक विस्तार यायेगु निर्णय याःम्ह सरकारं जेठ २५ लिपाया कर भुक्तानीया नितिं ब्यूगु म्याद थप याःगु मदु ।

बरु आन्तरिक राजस्व विभागं जेठ २५ गते दुने कर पुलाः शुल्क, थप दस्तुर, ब्याज व जरिवानापाखें मुक्त जुइत आग्रह यासें सार्वजनिक सुचं पिकाःगु दु ।

लकडाउन ताःहाकः जुइधुंकाः करदाता बैंक वा कर ज्याकुथितक थ्यंके फयाच्वंगु मदु । थुगु अवधिइ आर्थिक गतिविधि तकं प्रायः ठप्प जूगु दु । थुज्वःगु अवस्थाय् कर पुलेत थप ई बिइमाःगु माग उद्योगी व व्यवसायीपिनिगु दु ।

अर्थ मन्त्रालयया प्रवक्ता उत्तरकुमार खत्रीं धाःसा जेठ २५ लिपा करया विवरण बुझेयायेगु व कर पुलेगु ई थप मजूगु धाःगु दु ।

खत्रीं धाःगु दु, “जिमिसं निला (२ महिना) ई बिया, आः नं कर उठेमयात धाःसा हिसाब किताब मिलेयायेत थाकुइ । थ्व महामारी गुलितक जुइ मस्यू, जूगु कारोबार व आम्दानीया कर आः क्वःछ्यूगु मितिइ बुझे हे यायेमाः । मखुसा नियम कथं तुइगु ब्याज व जरिवाना कायेगु जुइ ।”

आन्तरिक राजस्व विभागया कथं मूल्य अभिवृद्धि कर ऐन कथं फागुन व चैत्र महिनाया मासिक, २०७६ साल माघ फागुन महिनाया द्विमासिक व दोस्रो चौमासिक अवधिया मूल्य अभिवृद्धि कर विवरण व उगु विवरण कथंया कर दाखिला यायेगु म्याद जेष्ठ २५ गतेतक जक दु ।

मूल्य अभिवृद्धि कर फिर्ता प्रयोजनया नितिं मूल्य अभिवृद्धि ऐन कथं कर फिर्ताया नितिं बिइदइगु निवेदन अवधि क्वचायेधुंकाः नं २५ जेष्ठतक हे दु ।

अन्तशुल्क ऐन कथं २०७६ साल फागुन व चैत्र महिनाया बुझेयायेमाःगु विवरण व उगु विवरण कथंया अन्तशुल्क दाखिला यायेगु म्याद नं वहे मितितक दु ।

सूचना कथं आयकर ऐन कथं फागुन व चैत्र महिनाया बुझेयायेमाःगु अग्रिम कर कट्टी व अग्रिम कर असुलीया संशोधित विवरणलिसें निगूगु किस्ताया रकम तकं द्दछ जेष्ठतक बुझेयायेमाःगु नियम दु ।

आर्थिक ऐन कथं फागुन व चैत्र महिनाया शिक्षा सेवा शुल्क, टेलिफोन स्वामित्व शुल्क व दूरसंचार सेवा दस्तुर बुझेयायेमाःगु म्याद तकं वहे दिंतक जक दु ।

Categorized in राजनीति