zero media family planning adv

‘जीवनय् उमेर लिसेलिसें मनू झःझं उत्कृष्ट व प्रगतिपाखे न्ह्यःने न्ह्याः वनेगु कुतः यायेमाः’

(पि.के. श्रेष्ठ, किपू नगरपालिका १७ वडा मुगल्छे त्वाःया बासिन्दा खः । थौंकन्हय् वय्कः किपू नगरपालिका २ वडा त्यांगलाफाँटय् च्वनादी । पि.के. श्रेष्ठ नेपालभाषा जक मखु खस भाय्या संकिपा ख्यलय् छम्ह च्वमि, निर्देशक, कलाकारलिसें छम्ह साहित्यकार खः । वय्कलं आपालं संकिपा, नाटक, ख्यालः च्वयादीगु दुसा थीथी संकिपाय् बाखंलिसें पटकथा, संवाद नं च्वयादीगु दु । वय्कः पि.के. श्रेष्ठलिसे जूगु खँल्हाबल्हाया सार संक्षेप थन न्ह्यब्वया च्वना । सं.)

थौंकन्हय् छु यानाः च्वनादिया ?

जि थौंकन्हय् किपूया “संगीतप्रेमी फिल्म प्रोडक्सन”पाखें दयेकेत्यनाच्वंगु संकिपाःया च्वज्या न्ह्याकाच्वनागु दु ।

लेखन पेशां जीवन चले जू लाथें ?

स्वयादिसँ, लेखन धयागु थुज्वःगु छगू श्रृजना ख । ...... श्रृजना गुबले नं सिइमखु । जिं लेखन कलायात ध्यबालिसें तुलना यानाः अपमान यायेगु लँपुइ मजुया । अथेजुया जिं थुकियात पेशाया रुपय् गुबलें नं मस्वया व जिं थुकियात हनाः पूजा याना । गुकिं जिगु भावनायात थुइकाच्वंगु दु जिगु च्वसा नं अनहे न्ह्याइ । भाः क्वछिइमखु ।

थ्वसिबें न्ह्यः छुकि व्यस्त जुयादियाले ?

नकतिनि जिं ‘झरना फिल्म’या “जोकर” धयागु यूट्यूब सिरियलय् ज्यासना । वया लिपा “जोड घटाउ” धयागु संकिपाःया च्वज्या क्वचायेकाः अले नेपालभाषाया फिल्म न च्वयेमा धयागु तायेकाः ‘संगीतप्रेमी फिल्म प्रोडक्सन’या नितिं च्वज्या न्ह्याकेत्यनागु दु ।

छिगु जीवनया मू आज्जु छु खः ?

हा, हा, हा, आज्जु मतःसे सुं न मनू म्वानाच्वनिला ..... । फुक्कसित हनाबना तयेगु, मतिना यायेगु, स्नेह यायेगु, ग्वाहालि यायेगु...... बस जि जिगु नितिं सिबेंनं मेपिनिगु नितिं म्वानाच्वना । थ्वहे खँ जिगु आज्जु ।

लेखन क्षेत्रय् पलाः तयेत सुनां हःपाः बियादिल ?

बांलागु न्ह्यसः .... स्वयादिसँ जितः साहित्य व श्रृजना अतिकं यःगु विषय ! जि स्कूल जीवनय् नं बाखँ, चिनाखँ, म्ये, गजल, पूर्णाङ्की व एकाङ्की नाटकत च्वज्या न्ह्याका थीथी पत्रपत्रिकाय् पिदने धुंकूगु दु । स्कूलय् नाटकतय्के नं म्हिता । मेपिन्त स्यना नं बिया । २०४९ सालपाखें किर्तिपुरव्यापी कविता धेँधेँबल्ला कासा इन्द्रेणी सांस्कृतिक समाजं ग्वसाः ग्वःगुलि जिं न्हाप लायेधुंकाः जिं च्वज्या न्ह्याके फू धैगु हःपाः दत । अय्सा जिं बाखं च्वज्याय् यक्व च्वज्या न्ह्याका । उगु इलय् जिं ‘कथै कथा’, ‘देवी’, ‘हिजो आजको कुरा’, ‘थोरै भए पुगिसरी’थें जाःगु सिरियलतय्के बाखँत च्वया । थीथी पत्रपत्रिका व एफ.एम.तय्के नं जिगु एकाङ्ङ्की नाटकत प्रसारण जूगुलिं तसकं लसता वल । थथेहे जितः हःपाः चूलात ।

संकिपा क्षेत्रय् गुबलेनिसें च्वज्या न्ह्याकादिया ?

२०५४ सालय् जि आर. आर. कलेजय् ब्वनागु इलय् जिगु नाटक ल्यज्या जुल । उत्कृष्ट च्वमिया सिरपाः नं कायेत ताः लात । उबले वरिष्ठ पत्रकार एवम् चलचित्र निर्देशक प्रकाश साय्मिजु निर्णायक मण्डलया मू निर्णायक जुयादीगु खःसा जिगु लेखनशैली खनाः इमिसं उबले दयेकूगु “बडिगार्ड’ संकिपाय् च्वज्या न्ह्याकेत इनाप यानादिल । अय्जुया संकिपा क्षेत्रय् वय्कःया हपालं च्वज्या न्ह्याका । ज्या यानाः वनाबलय् सहायक निर्देशकया रुपय् नं ज्या सना । ‘थः कतः कतः थः’, ‘धम्मावती’ संकिपा च्वया । थथे शुरु जुल संकिपा च्वज्याय् ....।

थौंतक गुलि सकिपाय् निर्देशन व पटकथा च्वज्या न्ह्याके धुन छिं ?

सम्भवत जिं नेपालभाषा व नेपाली भाषा यानाः मुक्कं ४५ गू ति संकिपाय् बाखँ व पटकथा च्वज्या यायेधुन । तर निर्देशन धाःसा आः तिनि न्ह्याकागु दु ।

जीवनयात छु दृष्टिकोणपाखें स्वयादिया छिं ?

जीवन छगू सघंर्ष खः । थन आपालं च्वय् क्वय् वयाच्वनि, अलमलय् मजुइक न्ह्यःने न्ह्याः वनेमाः । आते जुइगु व माते जुइगु पहलं तापाक्क हे च्वनेमाः । लिसें सन्तुष्टिपूर्वक म्वाये सयेकेमाः । न्ह्यापुइकेमाः । छगू मिनेट दुःखी जुइगु धयागु छगू मिनेट लय्ता पिज्वयेगु ह्वःता तंका च्वनागु खः धयागु थुइकेमाः ।

न्यनागु दु कि छिसं यक्व ध्यबा कमेयात हँ संकिपा क्षेत्रय् लगे जुया । छु धात्थे हे खःला ?

जीवनय् उमेर लिसेलिसें मनू झःझं उत्कृष्ट व प्रगतिपाखे न्ह्यःने न्ह्याः वनेगु कुतः यायेमाः । वस् थ्वहे खँ जिगु जीवनय् नं लागु जू । जिं थःगु मिहेनतपाखें थौं थनतक्क थ्यंगु खः । धन ला छन्हु न्हनेफु तर जिं कमे यानागु बौद्धिक धन कमे यायेफुगुलि गर्व ताः जितः । भौतिक रुपय् सम्पन्न जुइ न्ह्यः बौद्धिक रुपय् तःमि जुइगु यात जिं सम्मान याना, बाँकी छुं हे मदु ।

अन्तय् छुं धाये ल्यं दनिगु दुसा धयादिसँ ले ?

दकले न्हापां नेवाः अनलाइन न्यूजयात दुनगलंनिसें सुभाय् देछाना च्वना ! जि भिंचितामिपिं, पासाःपिं फुक्कसित सुभाय् देछासें जितः पी.के. श्रेष्ठ धया म्हस्यूपिं सकल दर्शकपिं, स्रोतापिं व पाठकवर्गपिं लिसेलिसें म्हस्यूपिं सकलसित सुभाय् देछाना च्वना । नेपाःमिपिनिगु तःधंगु मौलिक नखः स्वन्ति नखः लिसें न्हूदँ नेपाल सम्बत ११३७ या लसताय् सकल नेपाःमिपिन्त भिंतुना ।

न्ह्यब्वःम्ह ः रिदेन महर्जन