1142 nhoo dan adv

‘जि प्रधानमन्त्रीसिबें छु कम ?’ –प्रचण्ड

नेवा: अनलाइन न्युज – ललेन्द्र शाक्य | २०७८ मङ्सिर ८, बुधबार १५:४४:०९

‘खय्तला आः जि प्रधानमन्त्री जुयाच्वनागु मदु । तर प्रधानमन्त्रीसिबें कम नं मजू । जिं धयागु खँ मन्यनाः ओली बालुवाटारं बालकोट थ्यन ।’

नेकपा माओवादी केन्द्रया नायः पुष्पकमल दाहाल प्रचण्डं थः आः प्रधानमन्त्री पदय् मदुसां नं प्रधानमन्त्रीसिबें कम मजूगु धाःगु दु ।

कैलालीया भजनी नगरपालिकाया प्रशासकीय भवन उलेज्या ज्याझ्वलय् प्रचण्डं थौं बुधवाः उगु अभिव्यक्ति ब्यूगु खः ।

ज्याझ्वलय् प्रचण्डं धाःगु दु, ‘खय्तला आः जि प्रधानमन्त्री जुयाच्वनागु मदु । तर प्रधानमन्त्रीसिबें कम नं मजू । जिं धयागु खँ मन्यनाः ओली बालुवाटारं बालकोट थ्यन ।’

थःम्हं धयागु खँ मन्यःबलय् एमाले नायः तकं जुयाच्वंम्ह केपी शर्मा ओलीया प्रधानमन्त्री पद गुमेयायेमाःगु धासें प्रचण्डं थुगुखुसि धाःसा अथे मजुइगु धाःगु दु ।

प्रचण्डं धाःगु दु, ‘जिं गुलि धयागु खः उलि छुं नं ज्या मयायेगु कसम नल केपी ओलीं । वहे जुया व बालुवाटारं बालकोट थ्यन । आः न्हयगुलिं प्रदेशपाखें सरकारपाखें ल्हाः सिलेमाल ।’

प्रचण्डं हाकनं धाःगु दु, ‘जिं ला छगू म्हगस खनागु खः, कम्युनिष्टयात छप्पं यायेबलय् देसय् स्थायित्व जुइ, याकनं याकनं विकास जुइ, सामाजिक न्याय जुइ धकाः केपी ओलीयात जिं हे निक्वःतक प्रधानमन्त्री दयेका । तर, ओली नायक मखु, खलनायक का जुयाच्वना । भिलेन जूगुलिं जिं धयागु गुलि खः उलि छुं नं ज्या मयात ।’

ओली नेतृत्वया न्हापांगु सरकारयात प्रचण्डं ‘मखुगु खँ ल्हायेगुलि सिपालु सरकार’ धकाः टिप्पणी यात । तर आःया सरकारयात अथे जुइके मबिइगु प्रचण्डं धाःगु दु ।

प्रचण्डं धाःगु दु, ‘न्हापांगु सरकार जनतायात ठगेयायेत सिपालु सरकार, ज्या मयायेगुलि सिपालु, आः जिमिसं अथे जुइके बियागु मदु ।’

भूमि व्यवस्था मन्त्रालय माओवादी केन्द्रया भागय् लायेधुंकाः महोत्तरीइ लालपूर्जा इनेगु प्रक्रिया न्ह्याःगु धासें प्रचण्डं मेमेगु प्रदेशय् नं अथेहे ज्याया थालनी यायेगु आश्वासन ब्यूगु दु ।

प्रचण्डं धाःगु दु, ‘नकतिनि भूमि व्यवस्था मन्त्रालय झीगु जुइधुंकाः महोत्तरी जिल्लाय् लालपूर्जा इनेगु ज्याया प्रक्रिया सुरु याःगु दु । आः पश्चिम, मध्य, पूर्व फुक्क थासय् छक्वलं लालपूर्जा इनेगु ज्या न्ह्याकेफइ ।’

प्रचण्डं कैलाली जिल्लाया विकासया नितिं नं थःम्हं पहल यायेगु आश्वासन ब्यूगु दु ।

Categorized in राजनीति