kmc bidya

‘छंगु जिगु माया रतन’ म्येया काराओके कासा जुइगु

नेवा: अनलाइन न्युज – विजयरत्न | २०७७ जेठ ८, बिहिबार १३:१५:४७

बलिउडय् तकं नांजाःम्ह नेपाःया गायक उदितनारायण झा व दिपानारायण झा नं हाःगु न्हापांगु नेवाःम्येया रुपय् बय्बय् जुयाच्वंगु “छंगु जिगु माया रतन” म्येया काराओके कासा जुइगु जुउगु दु । 

कलाकःमि सुरेन्द्र तुलाधरं दयेकेगु धकाः घोषणा याःगु “छंगु जिगु माया रतन” नांयागु नेवाः संकिपाया निंतिं धकाः रेकर्ड याःगु थ्व म्ये थौंकन्हे संगीत ख्यलय् तसकं लोकं ह्वानाः वयाच्वंगु म्ये खः । थ्व म्येया छगु भर्सनय् उदित व वयकःया जहान दिपानारायण झालिसे ज्वःम्ये कथं हालातःगु दुसा मेगु छगु भर्सनय् नेपालभाषा संगीतख्यःया मेलोडि क्वीन धकाः धयातःम्ह दिपा महर्जनलिसे हालातःगु दु । 

आः थ्व म्येया काराओके कासा जुइत्यंगु खःसा थुकिया नितिं कासामिपिन्सं थ्वहे जेठ २५ गतेतकया दुने थःथःगु म्ये दुतिनेफइ धकाः धयातःगु दु । थुके ब्वति कायेया निंतिं कलाकःमि सुरेन्द्र तुलाधरया युटुयुबयात दकले न्हापां सब्स्क्राइब निं यायेमाःसा उगु हे युटुयुबय् थःगु म्ये दुतिनेफइ धकाः धयातःगु दु । 

झिनिदँ च्वयेया मिसा व मिजंपिन्सं ब्वति कायेदइगु थ्व ज्व म्ये (डुएट म्ये) जुउगुलिं काराओके कासाय् ब्वति काइपिन्सं छम्ह पासा म्येहालामि नं ल्ययेमाः । थथे ल्ययेबले नेपालभाषाया संगीत ख्यलय् म्ये हालाच्वंम्ह हे जुइमाः धकाः ग्वसाः खलकं धयातःगु दु । थ्व नियम कथं मिजं कासामिं छम्ह मिसा म्येहालामि अले मिसा कासामि जूसा छम्ह मिजं म्येहालामियात पासा कथं ल्ययेमाः । 

थ्व कासाय् सिरपा त्याकुपिनिं निंतिं छपु न्हूगु म्ये रेकर्ड यानाबीगु खँ ग्वसाः खलकं जानकारी बिउगु दुसा थथे रेकर्ड जूगु म्येया म्युजिक भिडियो नं दयेकाबीगु खँ ग्वसाः खलकं न्ह्यथना तःगु दु । 

थ्व “छंगु जिगु माया रतन” म्येया काराओके कासा ताःलाकेया नितिं कलाकःमि सुरेन्द्र तुलाधरया नापनापं नांजाःम्ह संगीतकार नील शाक्य, नांजाःम्ह म्युजिक एरेन्जर जिवित जल्मी, नांजाःम्ह म्येहालामिया नापनापं भिडियोग्राफर अमर चित्रकार, नांजाःम्ह संगीतकःमि सुरेन्द्र श्रेष्ठ व संगीतह्यःमि मन्जिल शाक्यपिं ग्वसाः खलःया दुजः कथं च्वनादीगु दुसा थ्व कासाया सिरपाः क्वछिइया नितिं नील शाक्य, जिवित जल्मी व सुरेन्द्र श्रेष्ठ स्वम्ह दुउगु निर्णायक मण्डल नीस्वनातःगु दु ।

Categorized in कला