prabhu baink new

‘खस शासनय् नेवाः संगीत खस नाप हे प्रतिस्पर्धा यानाः न्ह्यां वनेमाःगु अवस्था दु’ ः संगीतकःमि निल शाक्य

(नेपालभाषाया संगीतकःमि नील शाक्ययात छुं दिं न्ह्यः जक क्यापिटल एफएम नेवाः ज्याझ्वःपाखें ‘लाय्कू राजभाई सिरपाः’ लःल्हाःगु खः । संगीतकःमि भाजु निल शाक्यया आपालं म्येत लोकंह्वाःगु दु । सपनाश्रीं हालादीगु ‘स्वयेगु मन जुल रे...’लिसें आः थौंकन्हय् देविका प्रधान व राजेश महर्जनं हालादीगु ‘जिगु वैशं धाल जिला ल्यासे जुया वल हँ...’ म्ये लोकंह्वानाच्वंगु दु । २७ न्ह्यःनिसें मद्दिक्क संगीत ख्यलय् समर्पित जुयाच्वनादीम्ह संगीतकःमि भाजु निल शाक्यलिसें नेवाः अनलाइनन्युजपाखें ललेन्द्र शाक्यं यानादीगु खँल्हाबल्हाया छुं ब्व थन न्ह्यब्वयाच्वना । सं.)

छिगु बःचाधंगु म्हसीका छिगु हे च्वसां गुकथं च्वयादी ?

दकले न्हापां सकसित ज्वजलपा जिगु । जिगु नां निल शाक्य खः । जि च्वनेगु २२ वडा यलया चाकुपात त्वालय् खः । जिं नेपालभाषा ख्यलय् म्ये हाला, म्ये च्वया अले संगीत तयेगु ज्या यानाः वयाच्वनागु दु । नेपालभाषा ख्यलय् जिगु म्हसीका थ्व हे खः ।

छितः उकुन्हुतिनि सिरपाः लःल्हाःत, छिगु विचालय् उगु सिरपाः छितः छाय् लःल्हाःगुथें च्वं ? अले सिरपाःया दां गन छ्यलाः दिया ?

सिरपाः धैगु छुं नं ज्या यानागुया मुल्यांकनया आधारय् बिइगु छगू चिं खः । दसिपौ थें खः । जितः नं नेपालभाषा ख्यलय् जिं यानागु ज्याया लिधंसाय् हे जितः सिरपाः ब्यूगुथें ताः । अले थ्व ध्येवा जिं संगीत ख्यलय् हे न्हूगु म्ये रिकर्डिङ यायेगु नितिं छ्यलागु दु ।

छिगु विचालय् सिरपाः तःधं कि छिगु प्रतिभा ?

सिरपाः धैगु हे व्यक्तिया प्रतिभायात सम्मान यायेगु नितिं बिइगु चिं खः । उकिं सिरपाःसिबें प्रतिभा हे तःधंथें जितः ताः ।

संगीत छु खः ?

संगीतया परिभाषा थ्वहे खः धकाः जिं धाये मसः, धाये मफु । छाय्कि थ्व व्यक्तिं महसुस यायेगुलि भर परे जुइ । गुलिसियां धाइ संगीत छगू नशा खः, त्वःते मफैगु । गुलिसियां धाइ संगीत न्ह्याइपुकेगु माध्यम खः । गुलिसियां धाइ संगीत छगू वासः खः । तर संगीतविज्ञपिन्सं च्वयातःगु लिधसां धायेगु खःसा म्ये हालेगु, प्याखं ल्हुयेगु, बाजं थायेगु (गीतम् नृत्यम् तालम्) धकाः स्वंगू विधायात कयातःगु दु ।

संगीत ख्यलय् छिगु सिर्जना हिन्दी संगीतपाखें प्रभावित जू धाइ, छिगु विचालय् छु खः ?

सिर्जना यायेगु धैगु हे सिर्जनापाखें प्रभावित जुयाः वथें बांलाक्क अथवा वसिबें बांलाक्क यायेमाः धकाः सोच वइगु खः । चाहे व हिन्दी म्ये, पाकिस्तानी, इंग्लिस, नेपाली, नेवाः म्ये हे छाय् मजुइमा, बांलाःगु म्ये न्यनाः न्ह्याम्ह संगीतकःमिपिं नं प्रभावित जुइ । अले संगीतया सवाः ईकथं हिलाः हिलाः बियाच्वने फयेमा । थ्व बिइगु धैगु हे थीथी भाषाया म्येत न्यनाः अध्ययन यानाः न्हय्गू सुर दुने च्वनाः सिर्जना यायेगु खः । थ्व कारणं सिर्जना यायेबलय् नेवाः म्ये हिन्दी म्येलिसे ल्वाःथें जुइगु हिन्दी म्य नेपाली म्येलिसे ल्वाःथें जुइगु खः ।

नेपालभाषा संगीत ख्यःया स्थिति छिं स्वये गन थ्यनाच्वंगु दुथें च्वं ?

नेपालभाषा संगीत ख्यः मिखां स्वयेबलय् जक न्हापासिबें बांलाःगु दु । न्हूगु न्हूगु म्ये पिहां वयाच्वंगु दु । न्हूपिं म्येहालामिपिं वयाच्वंगु दु । न्हापा म्ये न्यनेगु जक, आः भिज्युअल स्वयेगु नं जूगु दु । थ्व बांलाःगु पक्ष खःसा संगीतया बजाः गथे खः अथेहे तुं तिनि । न्हापासिबें आः झन थाकूगु दु । छाय्धाःसा न्हापा म्ये छगू रिकर्ड यायेबलय् स्वद्वः प्यद्वः तका जक दःसा गाःसा थौंकन्हय् झिंन्याद्व नीद्वः तका दां माः । तर बजाः न्हापा गन खः अन हे तिनिथें जितः ताः ।

थौंकन्हय्या युवापुस्तां नेवाः संगीत मन्यं धैगु आपालं गुनासो दु, छिं स्वये गथे थें च्वं ?

नेवाः संगीत ख्यः च्वन्ह्याकेत फुक्क नेवाः कलाकार छधी जुयाः नेवाः कलाकार संघ दयेकेमाःथें च्वः । अले संगीतयाः थःगु हे कम्पनी दयेकेमाःथें च्वं । गुकिं झीगु संगीत ७५ गू जिल्लाय् हे वनाः नेवाःतय्त भाषा व संगीत स्यनेगु ज्या यायेफुसा बांलाइथें ताः जितः ।

नेवाः संगीत ख्यः च्वन्ह्याकेगु नितिं छु यायेमाःथें च्वं ?

नेवाः संगीतकःमिपिन्त नेवाः ख्यलं खास हे ग्वाहालि याःगु जिं मखं, बरु कलाकारपिन्सं हे थःम्हं फूकथं थःपिनिगु हे खर्चं नेवाः संगीत न्ह्यां वनाच्वंगु अवस्था दु । थ्व अवस्थायात चिंके फत धाःसा जक नेवाः संगीत ख्यः च्वन्ह्याइगु जिं खना ।

संचारमाध्यमया खँ ल्हायेबलय्, संचारमाध्यमय् नेवाः संगीत गथे जुयाच्वंगु दु ?

संचार माध्यमय् नेवाः संगीत ख्यलं उलि थाय् कायेफूगु मदुनि, गुलि नेपाली, हिन्दी म्यें कयाच्वंगु दु । नेवाः म्येया नितिं एकदम हे सिमित थाय् जक बियातःगु दु । झीु नेवाः ज्याझ्वःत नं गुलि थासय् दु, उगु थासय् नेवाः ज्याझ्वःत लिकनाः बन्द जुइधुंकूगु अवस्था दु ।

नेवाः संगीत नेवाः अधिकारया आन्दोलनलिसे स्वापू दुथें च्वं कि मच्वं ?

पक्का हे दु, नेवाः अधिकारलिसे नेवाः संगी जक मखु फुक्क नेपाःमितय्गु स्वापू दु छाय्कि थःगु अधिकार मदयाः हे खः झी थःगु विचाः कथं न्ह्यःने न्ह्यां वनेमफया ल्यूने लानाच्वंगु खः ।

खस शासनय् नेवाः संगीतया स्थिति गथे जुयाच्वंगु तायेकादिया ?

खस शासनय् नेवाः संगीत खस नाप हे प्रतिस्पर्धा यानाः न्ह्यां वनेमाःगु अवस्था दु ।

न्हूपुस्तायात नेवाः संगीतप्रति नुगः क्वसायेकेत छु यायेमाःथें च्व ? छिं थुगु ज्याय् पलाः तयादियागु दुला थें ?

न्हूगु पुस्तापिं नेवाः संगीतप्रति नुगः क्वसानाच्वंगु हे दु । मखुसा न्हूपिं कलाकारपिं पिहां वइ मखु जुइ ! तर झीगु संगीत गबले तक छगू व्यवसायिक कथं न्ह्यां वने फइमखु, सुनानं न्ह्याबलें निरन्तरता बियाच्वने फइमखु । संगीत ख्यःयात संगीतं हे म्वायेफइगु अवस्था झीसं दयेके मफुतले न्हूगु पुस्तापिनिगु नुगः क्वसाकाः यंकत थाकुइथें जितः ताः ।

छि सु संगीतकःमिपाखें प्रभावित ?

जि फुक्क संगीतकःमिपाखें प्रभावित जुया । थ्वहे छम्ह धकाः व्यक्ति मदु, गुम्हेसिया संगीतं जिगु नुगः सालाकाइ, जि फुक्कलिसे प्रभावित जुया ।

छितः यःगु म्ये ?

वंगु दँ २०७२ साल बैशाखं ब्वःगु तःभुखाय् लिपा जिगु संगीतय् निर्माण यानागु प्रार्थना म्ये ‘यंकी यंकी जिगु जिन्दगी बरु, यंकेमते थ्व देय् जिगु’ जितः यःगु म्ये खः ।

छिगु दकले न्हापांगु म्ये÷म्येचाः ?

‘मतिनाया अन्ति’ जिगु न्हापांगु म्येचाः खः ।

छु छु सिरपाः कयादी धुन ?

‘द न्यू ट्यालेन्ट अवार्ड अफ बेष्ट लिरिसिष्ट’ २०५६ सालं व आः नकतिनि जक २०७३ सालं ‘लाय्कू राजभाई सिरपाः’, थ्व निगू जक सिरपाः कायेधुन ।

ग्वदँ दत संगीत ख्यलय् पलाः तयादियागु ?

संगीत ख्यलय् पलाः तयागु ला थनि २७ दँ दत ।

दकले न्हापां गन दबुली दनादिया ?

दकले न्हापां जि छम्ह हुलाप्याखंम्वः जुयाः लकसं पिज्वःगु नाटकय् मस्र्या जुयाः प्रज्ञाभवनया दबुली दनागु खः । अले म्येहालामिया रुपं गुडनाइट एफएमया नेवाः ज्याझ्वलय् सिंहदरबारय् लाइभ प्रोग्रामय् दनागु खः ।

तिरिमय्जुया खँ ल्हाये बलय्, छितः गुलितक ग्वाहालि दु संगीत ख्यलय् जुइत ?

जिमि तिरिमय्जु सविना शाक्यं जितः थ्व संगीत ख्यलय् पलाःपतिकं ग्वाहालि यानाच्वंगुलिं हे जिं थौं थुगु थासय् तक थ्यंकेत ताःलाःगु खः ।

रिमिक्सया जमाना छितः गुलि तक यः ?

रिमिक्स न्हूगु पुस्ताया मागकथं छगू म्ये खः । गुकी बांलाःगु व बांमलाःगु नितां हे दु । छगू पुलांगु तनेधुंकूगु म्येयात रिमिक्स यानाः हालेबलय् हाकनं छक्वः व म्येय् ज्यान वइ, चर्चा जुइ । थ्व जिं स्वयेबलय् बांलाःथें ताः, तर पुलांगु म्येयात थौंकन्हय् रिमिक्स धकाः लय् हे न्हूगु पहलं स्यंकाः स्यंक हालीगु चलन दु, थ्व मज्यूथें जितः ताः ।

थौंकन्हय् नेवाः संगीत गथे जुइमाःथें च्वं ? ईलिसें कुलिचिनाः कम्पिटीशन यायेमाःथें मच्वंलाः मेगु भाय्या संगीतलिसे ?

पक्का नं कम्पिटिशन याये हे माः, प्रतिस्पर्धा जुल कि हे संगीतकःमिपिन्त बांलाकेमाः धैगु सोच वइ, मेहनत अप्वः यायेगु सोच वइ । सिर्जना नं बांलाःगु हे पिहां वइसा संगीत ख्यःयात व्यवसायिक जुइकेत नं प्रतिस्पर्धा यायेमाः, अले जक संगीत ख्यः विकास जुयावइथें जितः ताः ।

दकले लिपा, छिं धाये हे माःगु खँ छुं दःसा धयादिसँ ?

नेवाः संगीत ख्यःयात मतिना यायेनु, नेवाः संगीतया विकास यायेत फुक्क नेवाः कलाकारपिं छधी जुइनु । अले नेवाः अनलाइनन्युजया सकल पुचःयात व छि पासा ललेन्द्रयात यक्व यक्व सुभाय् बियाच्वना ।