zero media family planning adv

‘कोरोनां नेपालय् महामारीया रुपधारण याये फइमखु’ –प्रम ओली

नेवा: अनलाइन न्युज – ललेन्द्र शाक्य | २०७७ बैशाख ७, आइतबार ०९:०२:१६

“हलिमय् थ्यंमथ्यं डेढ लख मनूत सीगु दु, २० औं लख मनूत संक्रमित जूगु दु । शुक्रवाः जक ४ हजार मनूत सीगु दु, थुज्वःगु स्थिति जिमिसं नेपालय् मवयेमा धैगु नितिं आः कोरोना नियन्त्रणलिसें लकडाउन कायम हे यायेगु जुइ ।”

प्रधानमन्त्री केपी शर्मा ओलीं नेपालय् कोरोना भाइरस कोभिड १९ या संक्रमणं महामारीया रुप कायेमफइगु धाःगु दु । संक्रमणपाखें सुरक्षित जुइगु इलय् हे लकडाउन, सामाजिक दूरी, अन्तर्राष्ट्रिय प्रवेशविन्दु व सीमानाय् बन्द व आवश्यक स्वास्थ्य सतर्कता छ्यःगु प्रम ओलीं धाःगु दु ।

राससयात अन्तर्वार्ता बिसें प्रधानमन्त्री ओलीं कोभिड १९ परीक्षणयात ७७ जिल्लाय् हे विस्तार याःगु, फुक्क थासय् स्वास्थ्य हलंज्वलं व जनशक्ति थ्यंकूगु व संक्रमित व संक्रमण सम्भावितपिनिगु मात्तुमालाः आरडीटी व पीसीआर निगुलिं परीक्षणयात तीव्रता ब्यूगुलिं भयावह रुप कायगु अवस्था थःम्हं मखनागु धाःगु दु ।

लकडाउन मजूगु देसय् बर्बादी जूगु व लकडाउन जूगु थासय् संक्रमण म्हो जूगु धासें लकडाउनयात अर्थतन्त्र, राजनीतिक विचाः व राजनीतिक प्रणालीलिसे स्वायेमज्यूगु प्रम ओलीं धाःगु दु । लिसें कोरोना अन्त्य सुनिश्चित यायेत लकडाउनय् कडाइ यायेगु धाःगु दु ।

प्रम ओलीं धाःगु दु, “हलिमय् थ्यंमथ्यं डेढ लख मनूत सीगु दु, २० औं लख मनूत संक्रमित जूगु दु । शुक्रवाः जक ४ हजार मनूत सीगु दु, थुज्वःगु स्थिति जिमिसं नेपालय् मवयेमा धैगु नितिं आः कोरोना नियन्त्रणलिसें लकडाउन कायम हे यायेगु जुइ ।”

प्रधानमन्त्री ओलीं कोभिड १९ या रोकथाम व नियन्त्रणया नितिं उच्चस्तरीय राजनीतिक संयन्त्रया अर्थ मदूगु धाःगु दु ।

कोरोना भाइरसविरुद्धया सरकारी पहल पर्याप्त मजूगु दाबी विचारहीन व पूर्वाग्रहरी जूगु प्रम ओलीं धाःगु दु । प्रम ओलीं धाःगु दु, “अमर्यादित शैलीं याइगु द्वपनं द्वपं ब्युपिनिगु सांस्कृतिकसतर क्यनी तर जनताया जीवन रक्षा यायेगु थःगु जिम्मेवारीइ सरकार लिचिली मखु । थुकी फुक्कसिगु साथ व समर्थन दु । एकाध मनूतसें कर्कश धनय् आलोचना यायेत व इमिगु प्रवृत्ति खः ।”

लकडाउन ताःहाकः जुजुं वंबलय् मजदूर, श्रमिक व मेमेपिं बेरोजगारपिं स्वनिगलं गामय् वनेत वा भारतं स्वदेश लिहाँ वयेगु क्रमय् ताःहाकःगु पैदलयात्रा तय यायेमाःगु कष्टपूर्ण किपाः खनेदूगु विषयस न्यंगु न्ह्यसलय् प्रधानमन्त्री ओलीं छुं थासय् मनूत अलपत्र लाःसा वा अलपत्र जुयाच्वंगु लुयावःसा सरकारयात सुचं बिइत आग्रह यात ।

ओलीं धाःगु दु, “थुज्वःगु इलय् सरकारयात विरोध यायेत अस्त्रत तयार यानाः सुनां नं म्हितेमज्यू । विशेष परिस्थिति जूगुलिं सकल जनतायात असुविधा जूगु खँ जिमिसं महसुस यानागु दु । न्हापां ला भाइरसपाखें जीवन बचेयायेमाः धकाः छप्पं छधी जुयाः पलाः न्ह्याकेमाः ।”

Categorized in राजनीति