2565 buddha Jayanti ADV

‘कू याःम्ह कर्णेल’ अदालतया आदेशपाखें राष्ट्रपति

नेवा: अनलाइन न्युज – ललेन्द्र शाक्य | २०७८ जेठ १५, शनिबार १४:०१:३२

‘कानूनया गुंगु सिंङ’ धैगु धापू दु । अदालतं ब्यूगु आदेश फुक्कस्यां पालना याये हे माः । तर, गुबलें गुबलें अदालतं थुज्वःगु फैसला याइ कि गुगु संविधान व कानूया मर्म अःखः जुइ । अथेहे जूगु दु अफ्रिकी मुलुक माली दुने ।

शुक्रवाः सनिलय् मालीया संवैधानिक अदालतं अजूचायापूगु आदेश जारी याःगु दु । आदेशय् सैनिक कू पाखें सत्ता ल्हाःतय् काःम्ह ३८ दँया असिमी गोइटायात संक्रमणकाल ज्वःछि देसया नेतृत्व यायेत धाःगु दु । वयात संक्रमणकालीन राष्ट्रपति व राष्ट्रप्रमुख तकंया भाला कुबिइत धाःगु दु । अदालतं थुकिया हुनिं न्ह्यथंसें राष्ट्रपति पद खाली जूगुयात न्ह्यःने तःगु दु । कामकाजी राष्ट्रपति वाह नडवाया राजीनामां पद खाली जूगुलिं गोइटायात पदभार कायेत धाःगु दु ।

थ्वसिबें न्ह्यः गोइटा नडवाया उपराष्ट्रपति खः । वं नडवायात सोमवाः नियन्त्रणय् कयाः मन्त्रिमण्डल पुनर्गठन याःगु खः । गुकी वया विश्वासपात्र सैनिकपिन्त तःगु दु । सोमवाः सैनिक नियन्त्रणय् लाःम्ह नडवां बुधवाः राजीनामा बिइधुंकाः पदमुक्त याःगु खः ।

युद्धग्रस्त मुलुक मालीइ वंगु दँ सैनिक विद्रोहया नेतृत्व काःम्ह कर्णेल असिमी गोइटां थःम्ह देसया सत्ता ल्हातय् काःगु खः । उगु इलय् गोइटा ३७ दँया जक खः । तत्कालीन राष्ट्रपति इब्राहिम बाउबकर केइटायात नियन्त्रणय् कयाः राजनीमा बिइकेत वाध्य याःगु खः ।

अमेरिका व फ्रान्सय् तालिम कयावःम्ह गोइटाया उगु देसलिसे सुमधुर स्वापू दु । वं शक्तिशाली देसतय्गु साथपाखें हे विद्रोहया साहस याःगु विश्लेषण जूगु दु । वंगु दँपाखें हे गोइटा मालीया दकले शक्तिशाली जूगु खः । आः व राष्ट्रप्रमुख हे जूगु दु । अनया संवैधानिक अदालतं वयात हे सदर याःगु दु ।

गोइटां १० महिनाया दौरान निक्वःतक शक्ति ल्हातय् काःगु खः । थ्वसिबें न्ह्यः वं वंगु दँया अगष्टय् मालीया निर्वाचित राष्ट्रपति इब्राहिम बाउबकर केइटायात भ्रष्टाचार व सशस्त्र विद्रोही पुचःयात कारवाही यायेमफूगु द्वपं बिसें नियन्त्रणय् कयाः राजनीमाया नितिं वाध्य याःगु खः । वधुंकाः व उपराष्ट्रपति नियुक्त जूगु खः । विश्वासपात्र सैनिकपिन्सं मन्त्रिमण्डलय् महत्वं जाःगु पद काःगु खः ।

सत्ता व शक्ति ल्हातय् कयाः सर्वेसर्वा जूम्ह शासकं अदालतयात तकं लिच्वः लाकेफु धैगु उदाहरण माली जूगु दु । अनया अदालतं निर्वाचित राष्ट्रपतियात कू यानाः सत्ता ल्हातय् काःम्ह ३८ दँया कर्णेलयात राष्ट्रपतिया स्वःघोषणायात सदर यानाब्यूगु दु । राष्ट्रप्रमुखया दर्जा तकं बिइगु फैसला याःगु दु ।

Categorized in अन्तर्राष्ट्रिय