kmc bidya

‘किपू नपाया फोहोर मैला कर्मचारीपिनिगु रिपोर्ट थौं वइ’ –वडाध्यक्ष रमेशमान डंगोल

नेवा: अनलाइन न्युज – ललेन्द्र शाक्य | २०७७ जेठ ९, शुक्रबार ०९:१०:४१

टेकु अस्पतालया रिपोर्ट मवःनि, थिमिया कोरियन मैत्री अस्पतालपाखें किपूया जनप्रतिनिधिपिनिगु पीसीआर रिपोर्ट नेगेटिभ वःगु सार्वजनिक

किपू नगर नं कोरोना भाइरस संक्रमणया जोखिम थाय् जूगु हुनिं किपू नगरपालिकां सकल जनप्रतिनिधिलिसें कर्मचारीपिनिगु कोरोना परीक्षण याःगु दु ।

किपू नगरपालिकां जेष्ठ ५ गते सोमवाः दकले न्हापांगुखुसि नगरपालिकाया फोहोर मैला व्यवस्थापनय् ज्या यानाच्वंपिं कर्मचारीलिसें थीथी ख्यःया कर्मचारीलिसें मेयर रमेश महर्जनं नं कोरोना परीक्षण याःगु खः ।

जेष्ठ ५ गते सोमवाः थ्यंमथ्यं ६० म्हेसिगु आरडिटी व पीसीआर परीक्षण याःगु खः । उगु परीक्षणय् प्यम्ह फोहोर मैला व्यवस्थापनया कर्मचारीपिनिगु आरडिटी रिपोर्ट पोजेटिभ पिहाँ वःगु खः । थथे पोजेटिभ रिपोर्ट पिहाँ वयेधुंकाः उपिं प्यम्ह कर्मचारीपिन्त नगरपालिकां दयेकातःगु क्वारेन्टाइनय् तःगु खःसा आः नं च्वनाच्वंगु दु ।

थ्वधुंकाः जेष्ठ ६ गते मंगलवाः नगरपालिकाया जनप्रतिनिधि व कर्मचारीपिनिगु कोरोना परीक्षण याःगु खः । उगु परीक्षणय् मुक्कं ६२ म्हेस्यां आरडिटी व पीसीआर परीक्षण याःगु खः । उगु परीक्षणय् प्यम्ह जनप्रतिनिधिलिसें छम्ह स्वास्थ्य विभागया कर्मचारी यानाः न्याम्हेसिगु आरडिटी रिपोर्ट पोजेटिभ पिहाँ वःगु खः ।

थ्व निन्हुया पीसीआर परीक्षण यायेगु नितिं येँया टेकु अस्पतालया प्रयोगशालाय् यंकूगु खः । टेकु अस्पतालय् आपालं पीसीआर परीक्षण यायेमाःगु व क्यू दूगु हुनिं किपू नगरपालिकाया फोहोर मैला कर्मचारीपिनिगु रिपोर्ट आःतक पिहाँ मवःगु खः । थुकिया विषयस किपू नगरपालिका २ वडाया वडाध्यक्ष लिसें नगरपालिकाया पर्यटन, संस्कृति सम्पदा विभागया प्रमुख रमेशमान डंगोलं धयादी, “जेष्ठ ५ व ६ गतेया पीसीआर रिपोर्टया नितिं जिपिं नं पियाः च्वनागु खः । टेकु अस्पतालया प्रयोगशालाय् आपालं परीक्षणया ज्या जुयाच्वंगु व क्यू हे च्वनेमाःगुलिं रिपोर्ट लिपाः लानाच्वंगु खः । जिं स्यू कथं ६०० म्हेसिगु क्वय् किपू नगरपालिका लाःगु दु । सायद थौं शुक्रवाः अवश्यं फोहोर मैलाया कर्मचारीपिनिगु रिपोर्ट पिहाँ वइगु भलसा कयाच्वना ।”

किपुली दकले न्हापां परीक्षण जूपिं फोहोर मैलाया कर्मचारीपिनिगु पीसीआर रिपोर्ट सार्वजनिक मजूसे लिपा परीक्षण याःपिं जनप्रतिनिधिपिनिगु रिपोर्ट न्ह्यः सार्वजनिक जूबलय् किपूया जनमानसय् छुं भच्चा शंका उपशंकाया लकस ब्वलंगु दुसा सामाजिक संजालय् नं तर्कंवितर्कया चर्चा परिचर्चा जुयाच्वंगु दु । वास्तविकता थुइकेगु नितिं किपू नगरपालिकाया मेयर उपमेयरयात मोबाइल स्वापू तयागु खः, तर सम्पर्क मजुल । थ्व धुंकाः किपू नगरपालिकाया पर्यटन सम्पदा संस्कृति विभागया प्रमुख लिसें २ वडाया वडाध्यक्ष रमेशमान डंगोललिसे खँल्हाबल्हा यानाबलय् थुगु विषयस धयादी, “खय्तला, जेष्ठ ५ वडा ६ गते फोहोर मैलाया कर्मचारी व नगरपालिकाया जनप्रतिनिधि कर्मचारीपिनिगु पीसीआर रिपोर्ट नं पिहाँ मवःनि । छाय् धाःसा उगु पीसीआर परीक्षण टेकु अस्पतालया प्रयोगशालाया क्यूलय् लानाच्वंगु दु । गुलि नं खँ दु कि जनप्रतिनिधिपिनिगु पीसीआर रिपोर्ट जक छाय् न्ह्यः पिहाँ वल ले धैगु । जेष्ठ ७ गते बुधवाः किपू नगरपालिकाया जनप्रतिनिधिलिसें कर्मचारीपिं नापनापं जेष्ठ ६ गते आरडिटी परीक्षणय् पोजेटिभ पिहाँ वःपिं प्यम्ह जनप्रतिनिधि व छम्ह स्वास्थ्य विभागया कर्मचारीं हाकनं पीसीआर परीक्षण याःगु खः । थुगु परीक्षणय् नं ६० म्हं मल्याकस्यां पीसीआर परीक्षण याःगु खः । थुगु पीसीआर परीक्षणया नितिं मध्यपुर थिमि नगरपालिकाया कोरियन मैत्री अस्पतालया प्रयोगशालाय् यायेगु नितिं स्वयं मध्यपुर थिमि नगरपालिकाया मेयर मदनसुन्दर श्रेष्ठ किपू झाया उगु अस्पतालया प्रयोगशालाय् यंकाः परीक्षण याःगु खः । टेकु अस्पतालया प्रयोगशालां सिबें न्ह्यः हे उगु मध्यपुर थिमिया कोरियन मैत्री अस्पतालं म्हिगः जेष्ठ ८ गते बिहिवाः आरडिटी परीक्षणय् पोजेटिभ पिहाँ वःपिं प्यम्ह जनप्रतिनिधि व छम्ह स्वास्थ्य विभागया कर्मचारीपिनिगु पीसीआर रिपोर्ट नेगेटिभ पिहाँ वःगु सार्वजनिक याःगु खः । तर टेकु अस्पतालं आःतक किपूया रिपोर्ट सार्वजनिक याःगु मदुनी । सायद थौं जेष्ठ ९ गते शुक्रवाः सुथय् १२ ता ई दुने पिहाँ वइला !”

किपू नगरपालिकाया जनप्रतिनिधि व स्वास्थ्य विभागया कर्मचारी यानाः न्याम्हेसिगु पीसीआर रिपोर्ट मध्यपुर थिमिया कोरियन मैत्री अस्पतालपाखें नेगेटिभ पिहाँ वःगुलिं किपूया सकल बासिन्दां लसताया सासः ल्हाःगु दुसा आः टेकु अस्पतालं सार्वजनिक याइगु किपूया प्यम्ह फोहोर मैला कर्मचारीलिसें प्यम्ह जनप्रतिनिधि व छम्ह स्वास्थ्य विभागया कर्मचारी यानाः ९ म्हेसिगु पीसीआर रिपोर्ट नं नेगेटिभ हे पिहाँ वयेमाः धकाः मनं तुनाच्वंगु दु ।

Categorized in राष्ट्रिय