2565 buddha Jayanti ADV

‘ओलीं हिन्दु राष्ट्रलिसेंया राजसंस्था लितहयेगु वाचा याःगु दु’ : भारतया पूर्वविदेश सचिव

नेवा: अनलाइन न्युज – ललेन्द्र शाक्य | २०७८ जेठ १५, शनिबार १०:५३:०५

भारतया पूर्वविदेश सचिव श्यामशरणं भारत सरकारं नेपालय् राजसंस्था लितहये चाहेमजूगु प्रष्ट यायेमाःगु धाःगु दु । वं भारतीय जनता पार्टी (भाजपा) नेतृत्वया सरकारं नेपालय् राजसंस्थ लिसेंया हिन्दुराष्ट्र लितहये चाहेजूगु हल्ला वयाच्वंगुलिं उकिया बारे प्रष्ट यायेमाःगु टिप्पणी याःगु खः ।

इन्डियन एक्स्प्रेसय् च्वसूपाखें नेपाःया नितिं पूर्वराजदूत जुइधुंकूम्ह श्यामशरणं च्वःगु दु, ‘भारतं राजसंस्था लितहयेत भूमिका म्हिताच्वंगु चर्चा येँय् जुयाच्वंगु दु ।’ वं राजसंस्थाया अन्त भारतया तःधंगु उपलब्धी धासें लितहयेगुपाखे जुइमज्यूगुलि बः तकं ब्यूगु दु ।

श्यामशरणं राजसंस्थां न्ह्याब्लें नं भारतया हित अःखःया ज्या याःगु टिप्पणी याःगु दु । वं च्वःगु दु, ‘भारत सरकारं राजसंस्था लितहये चाहेमजूगु स्पष्ट यायेमाः ।’ हिन्दु स्वयंसेवक संघया नेतापिन्सं नेपालय् राजसंस्था लितहयेगु अभिव्यक्तित बियाच्वंगुलिं आशंकात अप्वःगु तकं वं टिप्पणी याःगु दु ।

विगतय् राजसंस्थां नेपाःयात भारतपाखें तापाकीगु भूमिका म्हितूगु विषयत तकं न्ह्यथंगु दु । थः राजदूत जुयाः विदेशसचिव जुयाबलय् राजसंस्थाया भूमिका भारतया अहितय् जूग्ु तकं तर्क तःगु दु । वं च्वःगु दु, ‘राजसंस्थं न्ह्याब्लें नं नेपाःयात भारतपाखें तापाक्क तयेत भूमिका म्हितूगु जिगु अनुभव दु ।’

श्यामशरणं प्रधानमन्त्री केपी शर्मा ओली भारतया प्रिय जूगु विषय ब्वलनाच्वंगु तकं च्वःगु दु । वं च्वःगु दु, ‘ओली भारतया प्रिय खः धैगु धारण येँय् जुयाच्वंगु दु । ओलीं भाजपा सरकारयात राजसंस्था लिसेंया हिन्दु राष्ट्र लितहयेत भूमिका म्हितेगु वाचा याःगु बुझाई राजनीतिक व सर्वसाधारणया विचाः जूवःगु दु ।’

Categorized in अन्तर्राष्ट्रिय