Header Nepal rastra bank Adv

‘ओमिक्रोनया हुनिं यक्व ग्यायेमते, खोपं गम्भीर संक्रमणपाखें बचेयाइ’ : उगुर सहिन

नेवा: अनलाइन न्युज – ललेन्द्र शाक्य | २०७८ मङ्सिर १५, बुधबार १२:४१:५३

खोप निर्माता कम्पनी बायोइन्टेकया प्रमुख कार्यकारी अधिकृतं न्हूगु कोभिड भेरियन्टया हुनिं यक्व मग्यायेत आग्रह याःगु दु ।

बायोइन्टेकया प्रमुख कार्यकारी अधिकृत (सीईओ) उगुर सहिनं छगू अन्तर्वार्ताय् न्हूगु ओमिक्रोन भेरियन्टया हुनिं यक्व मग्यायेत आग्रह याःगु खः । अधिकृत सहिनं वाल स्ट्रिट जर्नललिसें अन्तर्वार्ता बिसें धाःगु दु, ‘यक्व ग्यायेमते, योजना यथावत दु, स्वंगूगु बुस्टर डोजयात तीब्रता बियादिसँ । आःया नितिं जिमिगु सन्देश थ्वहे खः ।’

बायोइन्टेकया सह–संस्थापक व कोभिड खोप आविष्कार तकं याःम्ह सहिनं खोप काःपिं मनूतय्त ओमिक्रोनं संक्रमण यायेफइगु सम्भावना दुसां नं खोप काःपिं मनूत गम्भीर संक्रमणपाखें सुरक्षित जुइगु तकं धाःगु दु ।

ओमिक्रोनया उत्परिवर्तन उच्च दूगु हुनिं खोप कायेधुंकाः विकास जुइगु एन्टिबडीयात थुकिं छलेयायेफइगु तर संक्रमणविरुद्ध ‘टी–सेलं’ प्रदान याइगु सुरक्षा छलेयाइगु सम्भावना म्हो जूगु सहिनया धापू दु ।

सहिनं धाःगु दु, ‘ओमिक्रोनविरुद्ध खोपं ज्या याइगु जिमिगु विश्वास विज्ञानय् आधारित दु । यदि भाइरसं इम्युनिटी छलेयाइगु क्षमता विकास यात धाःसा एन्टिबडीयात जक छलेयायेफइ व गम्भीर ल्वय् पाखें बचेयाइगु इम्युनिटीया निगूगु तह अर्थात् ‘टी–सेल’ नं झीगु म्हगलय् दइ ।’

सहिनं अन्तर्वार्ताया झ्वलय् ओमिक्रोनयात लक्षित यानाः दयेकीगु परिमार्जित खोप बजारय् वयेत सच्छि न्हु तुइगु तर उज्वःगु खोप आवश्यक मजुइफूगु नं धाःगु दु ।

म्हिगः जक हे मोडेर्नाया सीईओ स्टेफाने बान्सेलं ओमिक्रोनविरद्ध विद्यमान खोप म्हो प्रभावकारी जुइगु धाःगु दु । बान्सेलं उगु अभिव्यक्ति लिपा युरोप व एसिया बजारय् हलचल मच्चेजूगु खः ।

Categorized in अन्तर्राष्ट्रिय