zero media family planning adv

‘एकल जातिया सत्ताविरुद्ध ल्वानाः न्याय व अधिकार कायेगु लँपुइ न्ह्यज्यां वनेनु’ –खँल्हाबल्हा

सिजन श्रेष्ठ

नायः, हलिं नेवाः गुथि

(सिजन श्रेष्ठ, थौंकन्हय् अमेरिकाया बाल्टिमोरय् च्वनाः च्वनादीगु दु । वय्कलं अमेरिकाय् ट्राभल एजेन्सी व हाण्डिक्राफ्टया व्यापार यानाच्वनादीगु दु । भाजु सिजन श्रेष्ठ आः नकतिनि जक अमेरिकाया बाल्टिमोरय् क्वचाःगु निक्वःगु हलिं नेवाः गुथिया अधिवेशनं नायः पदय् निर्वाचित जुयादीगु खः । वय्कः भाजु श्रेष्ठलिसे नेवाः अनलाइनन्युजया नितिं गंगाबहादुर नेम्कुलं हलिं नेवाः गुथिया विषयस व थीथी विषयस यानादीगु खँल्हाबल्हाया सारसंक्षेप थन न्ह्यब्वया च्वना । सं. )

सिजन जु, छि निक्वःगु हलिं दबूया नायः जुयादिल, धयादिसँ छिगु कार्ययोजना छु छु दु ?

–    जिगु न्हापांगु योजना हलिं गुथिया थीथी पदया नितिं योग्य व्यक्तिपिं नियुक्ति यायेगु खः । थुगु गुथिइ २७ म्ह दुजःपिं दुथ्याइ । थौंतक ७ म्ह जक पदपूर्ति जूगु दु । गुकी नायः जि स्वयं हे जुल । अल मेपिं सिनियर न्वकू दयारत्न शाक्य, डा.नारायण राजभण्डारीलिसें न्वकू स्वयम्भु तुलाधर, मूछ्याञ्जे सुभाषराम प्रजापति, जनसम्पर्क अधिकृत कृष्ण चखुँ व दुजः राजीष श्रेष्ठ च्वनादीगु दु । मेपिं २० म्ह थीथी देय्या नेपालभाषा व संस्कृतिइ योगदान बियाच्वंपिं व्यक्तिपिं ल्ययाः २७ गू पद पूवंके ल्यंदनि ।

ल्यं दनिगु २० गू पदय् युवावर्गपिन्त गुज्वःगु व गुकथं थाय् बिइगु विचाः यानादियागु दु ?

–    हलिं गुथिया लक्ष्य धैगु हे युवावर्गपिन्त न्ह्यःने हयाः ज्या याकेगु खः । आः थुगु गुथिइ युवावर्गपिन्त दुथ्याकाः माःगु तालिम बियाः उपिं युवापिन्त योग्य व दक्ष यानाः थुगु गुथिं पलाः छीगु लक्ष्य तयागु दु ।

सिजन जु, छिं धयादिल युवापिन्त योग्य यायेगु धकाः, युवावर्गया भविष्यया नितिं हलिं गुथिं गुज्वःगु अवसर बिइगु योजना दु ?

–    हलिं गुथिं युवापिन्त नेपालभाषा, नेवाः संस्कार ल्यंकेत व विश्व न्यंकं प्रवद्र्धन यायेत लिसें युवापिनिगु व्यक्तित्व विकास याकेगु सामाजिक ज्याय् साथ बिइत न्ह्यज्याकेगु व छुं युवा पुचलं नेपालभाषाया नितिं ज्या यायेगु मंदुपिन्त ग्वाहालि यायेगु व भाषा साहित्य कला क्षेत्रय् ज्या याइपिन्त नं गुथिं ग्वाहालि यायेगु जुइ । जिं थुगु नेवाः अनलाइनन्युजपाखें थ्व नं धाये कि गुगु युवा पुचलं भाषा साहित्ययात ग्वाहालि जुइगु सर्ट मुभी, कार्टुन प्रोग्राम विश्व न्यंकं छक्वलं यायेफइगु मनोरञ्जनात्मक ज्याझ्वःत दुसा थःगु देसय् च्वंगु गुथियात जानकारी बियादिसँ, हलिं गुथिं फक्व ग्वाहालि यायेगु कुतः याये ।

थुलि बांलाःगु सोचया लिसें वःगु हलिं गुथिया निक्वःगु अधिवेशनय् सुनां सुनां सहभागिता क्यन ?

–    निक्वःगु अधिवेशनय् १३ गूसिबें अप्वः देसया थ्यंमथ्यं ५५० म्ह मनूतसें ब्वति काःगु दु । उकी हलिं गुथिया फुक्क दुजःपिं दुथ्याःगु खः । उकी डाक्टर, इन्जिनीयर, वैज्ञानिक नापं नेपाःपाखें झायादीपिं फुक्क राजनीतिक पार्टीया नेतात तकं दुथ्याः । नेपाःया हनेबहःपिं व्यक्तिपिनिगु नां कायेगु खःसा संघीय समाजवादी फोरम नेपालया सह–अध्यक्ष राजेन्द्र श्रेष्ठ, नेवाः न्ह्यलुवाः मल्ल के. सुन्दर, गोरखापत्रया प्रधानसम्पादक व हलिं गुथि नेपाः च्याप्टरया नायः पुष्कर माथेमा, राप्रपा नेपालया राजाराम श्रेष्ठलिसें थीथी व्यक्तित्वपिं खः ।

दकले लिपा, हलिं गुथ व छिगु व्यक्तिगतपाखें नेपालय् जुयाच्वंगु पहिचानया नितिं आन्दोलनयात गुकथं स्वयादिया ?

–    जिगु विचालय् थ्व आन्दोलन आवश्यक खः । झी नेपाःमिपिन्सं थःगु सांस्कृतिक अधिकार, भाषिक अधिकार गुमे जूगु थौंसिबें २४५ दँ दयेधुंकल । गुगु गोरखा विस्तार यायःगु इलय् जूगु खः । आः व अधिकार लित कायेगु दिं लिक्क लिक्क वयाच्वंगु दु । थुगु इलय् नं झी सकल पहिचानधर नेपाःमिपिं छप्पं छधी जुयाः अधिकार काये मफुत धाःसा लिपा गुबलें नं उगु अधिकार काये खनीमखु । उकिं सकल पहिचान वादी नेपाःमिपिन्त जिं इनाप याये कि झीपिं छप्पं छधी जुयाः एकल जातिया सत्ताविरुद्ध ल्वानाः न्याय व अधिकार कायेगु लँपुइ न्ह्यज्यां वनेनु । सुभाय् ।